अहिल्यानगर |प्रतिनिधी| Ahilyanagar
शहरात वाहतूक नियोजन, पार्किंग व्यवस्था, एकेरी वाहतूक आदींचे नियोजन करत 36 रस्ते व जागांवर ‘पे अँड पार्क’ मंजूर करण्यात आले आहे. यासाठी महानगरपालिकेने नाशिक येथील एका खासगी संस्थेची नियुक्ती केली आहे. लवकरच याची अंमलबजावणी केली जाणार आहे. या माध्यमातून वाहतुकीची, पार्किंगची समस्या मार्गी लागेल, वाहतुकीला शिस्त येईल व महानगरपालिकेलाही उत्पन्न मिळेल, असा विश्वास आयुक्त तथा प्रशासक यशवंत डांगे यांनी व्यक्त केला.
महानगरपालिका प्रशासनाने खासगी एजन्सीमार्फत सर्वेक्षण करून नो पार्किंग झोन, नो हॉकर्स झोन, सम विषम सशुल्क पार्किंग, एकेरी वाहतूक, महापालिकेच्या मोकळ्या जागेत ‘पे अँड पार्क’ आदींच्या नियोजनाचा प्रकल्प अहवाल तयार केला होता. यात 18 प्रमुख रस्त्यांवर नो पार्किंग व नो हॉकर्स झोन करण्यात आले आहेत. तर कापड बाजार व नवीपेठ रस्त्यावर एकेरी वाहतूक प्रस्तावित करण्यात आली आहे. खासगी संस्थेने तयार केलेल्या प्रकल्प अहवालाला महासभेत मंजुरी मिळाल्यानंतर निविदा काढून खासगी संस्थेची नियुक्ती करण्यात आली आहे. शहर वाहतूक शाखेलाही सम विषम पार्किंग, नो पार्किंग झोनच्या अंमलबजावणीबाबत सूचना देण्यात येणार असल्याचे आयुक्त डांगे यांनी सांगितले.
शहरात लक्ष्मी भाऊराव पाटील विद्यालय, बेलदार गल्ली, चाँद सुलताना विद्यालय समोरील रस्ता, गाडगीळ पटांगण, गांधी मैदान, मंगल गेट मटन मार्केट समोरील जागा, नेहरू मार्केट मोकळी जागा, वस्तू संग्रहालय, नोबल हॉस्पिटल लगतचा रस्ता, जुने सिव्हील हॉस्पिटल, लाल टाकी रस्ता अप्पू हत्ती चौक ते स्वास्थ्य हॉस्पिटल ते झेडपी क्वार्टरलगत, पोलीस लाईन लगत, बालिकाश्रम रस्ता नीलक्रांती चौक ते नायरा पेट्रोल पंप, सातभाई मळा, सावेडी जॉगिंग ट्रॅक 1, सावेडी जॉगिंग ट्रॅक 2, मिसगर विद्यालयमागे, वाडिया पार्क मधील दक्षिणेकडील गेट जवळील जागा, एकविरा चौक ते पारिजात चौक रस्ता, इमारत कंपनी, अमरधाम पश्चिमेकडील कपाउंड जवळील जागा, मानकर गल्ली, नीलक्रांती चौक ते चौपाटी कारंजा रस्ता, पांजरपोळ मोकळी जागा (मार्केटयार्ड चौक), पाईपलाईन रस्ता, पुणे बस स्थानकाजवळ, नेताजी सुभाषचंद्र चौक ते नवी पेठ शहर सहकारी बँकेपर्यंत, कोठी रस्ता ते यश पॅलेस हॉटेल, भिस्तबाग चौक ते टीव्ही सेंटर हडको चौकापर्यंत, प्रोफेसर चौक ते प्रेमदान हॉटेल चौक, नवीन कलेक्टर ऑफिस रस्ता, सेंट अण्णा चर्च रस्ता, बंगाल चौकी, चायना मार्केट, सहकार सभागृह रस्ता, सावित्रीबाई फुले संकुल (आकाशवाणी केंद्रा शेजारी) या 36 ठिकाणी ‘पे अँड पार्क’ करण्यात येणार आहे.
असे असेल पार्किंग शुल्क
पार्किंगसाठी आकारण्यात येणारे प्रतीतास शुल्क (जीएसटी अतिरिक्त) निश्चित करण्यात आले आहे. त्यानुसार दुचाकी 5 रुपये, चारचाकी 10 रुपये, टेम्पो 25 रुपये, मिनी बस 50 रुपये, अवजड वाहने 120 रूपये, खासगी बस 150 रुपये, पॅरा ट्रान्झिट नॉन डेझिग्नेटेड एरिया 10 रुपये असे शुल्क आकारण्यात येणार आहे. नो पार्किंग, नो हॉकर्स झोनमध्ये पार्किंग केल्यास दंडाची (जीएसटी अतिरिक्त) रक्कम निश्चित करण्यात आली आहे. दुचाकी (टोविंग) 742 रूपये, दुचाकी (क्लँपिंग) 500 रुपये, चारचाकी (टोविंग) 984 रुपये, चारचाकी (क्लँपिंग) 742 रुपये आकारण्यात येणार आहेत.
