मालेगाव । प्रतिनिधी Malegaon
मुंबई-आग्रा राष्ट्रीय महामार्गावर हॉटेल फाऊंटनजवळ राज्य परिवहन मंडळाची बस व मालट्रक यात जोरदार धडक होऊन झालेल्या दुर्घटनेत बस चालकासह अनेक प्रवासी जखमी झाले. या अपघातात नेमके किती प्रवासी जखमी झाले आहेत याची माहिती अद्याप उपलब्घ होऊ शकली नाही.
पिंपळगाव डेपोची एस.टी. बस क्र. एम.एच.-14-बी.टी.-3327 ही नाशिकहून अंमळनेरकडे जात असतांना समोरून भरधाव वेगाने आलेल्या आर.जे.-11-जी.सी.-3608 या मालट्रकने तिला धडक दिली. फाऊंटन हॉटेलसमोरील महामार्गावर हा मालट्रक दुभाजक ओलांडत असतांना बसवर धडकला. हा अपघात इतका भीषण होता की बसचे पुढचे चाक व चालक कॅबीनचा चुराडा झाला.
घटनास्थळी स्थानिक नागरीकांनी धाव घेत मदतकार्य सुरू केले. जखमींना रूग्णवाहिकेतून मालेगाव येथील रूग्णालयात हलविण्यात आले. बस चालकाची प्रकृती चिंताजनक असून उपचार सुरू आहेत.
