अहिल्यानगर |प्रतिनिधी| Ahilyanagar
आधारभूत किंमत खरेदी योजनेंतर्गत जिल्ह्यासाठी पणन महासंघाने तूर खरेदीसाठी 12 केंद्रांना मंजुरी दिली आहे. 9 केंद्रावरून हमीभावाने तूर खरेदीसाठी शेतकर्‍यांची नोंदणी तसेच प्रत्यक्ष खरेदी प्रक्रिया सुरू करण्यात आली असल्याची माहिती जिल्हा पणन अधिकारी बी. आर. पाटील यांनी दिली आहे.
हंगाम 2024-25 साठी तूर या पिकाची 7 हजार 550 प्रति क्विंटल दराने 13 फेब्रुवारी 2025 पासून खरेदी प्रक्रिया सुरू करण्यात आली असून पुढील 9 केंद्रांवरून शेतकर्‍यांची नोंदणी करण्यात येत आहे. शेवगाव तालुक्यामध्ये सुखायू फार्मर प्रोड्युसर कंपनी बोधेगाव, पाथर्डी तालुक्यात जय भगवान स्वयंरोजगार सहकारी संस्था मार्केट यार्ड पाथर्डी, श्रीगोंदा तालुक्यात शिवदत्त फार्मर प्रोड्युसर कंपनी घारगाव, रिअल ग्रो फार्मर प्रोड्युसर कंपनी घुटेवाडी, जय किसान फार्मर प्रोड्युसर कंपनी मांडवगण, राहुरी तालुक्यात राहुरी तालुका सहकारी खरेदी विक्री संघ राहुरी, पारनेर तालुक्यात कृषी उत्पन्न बाजार समिती मार्केट यार्ड पारनेर, कोपरगाव तालुक्यामध्ये कृषी उत्पन्न बाजार समिती मार्केट यार्ड कोपरगाव तर जामखेड तालुक्यात चैतन्य कानिफनाथ फळ प्र. सहकारी संस्था खर्डा उपबाजार समिती येथे नोंदणी करण्यात येईल.
दरम्यान, शेतकर्‍यांनी एफएक्यू दर्जाचा म्हणजेच काहीही कचरा नसलेला चाळणी करून सुकवून माल केंद्रावर आणावा. नाफेड/एनसीसीएफच्या स्पेसीफिकेशननुसार शेतमालाची तपासणी करण्यात येईल. नोंदणी झालेल्या शेतकर्‍यांना नोंदणीच्या क्रमवारीनुसार एसएमएस देऊन खरेदीसाठी बोलावण्यात येईल. देण्यात आलेल्या तारखेस शेतकर्‍यांना माल खरेदी केंद्रावर घेऊन येणे बंधनकारक राहील, असेही कळविण्यात आले आहे.
ऑनलाईन पध्दतीने खरेदी प्रक्रिया
सर्व खरेदी प्रक्रिया ही ऑनलाईन पध्दतीने होणार आहे. शेतकर्‍यांनी नोंदणीसाठी आधारकार्डची, राष्ट्रीयीकृत बँकेचे खाते असलेल्या पासबुकची छायांकित प्रत, चालू वर्षाचा 8-अ व 7/12 उतारा आणि तूर पिकाची नोंद असलेला ऑनलाईन पीकपेरा व चालू मोबाईल क्रमांक देणे आवश्यक असल्याची माहिती जिल्हा पणन अधिकारी पाटील यांनी दिली आहे.
