राहुरी |प्रतिनिधी| Rahuri
राहुरी तालुक्यातील उंबरे येथील बसस्थानकावर दोन गटात चांगली धुमचक्री झाली. याबाबत राहुरी पोलीस ठाण्यात परस्पर विरोधी फिर्यादी दाखल करण्यात आल्या असून यामध्ये एकूण बारा जणांवर गुन्हा दाखल करण्यात आला आहे. ही घटना शुक्रवार दि. 18 एप्रिल रोजी घडली आहे.
याबाबत अक्षय भाऊसाहेब काळे (वय 28 वर्षे), रा.उंबरे, ता. राहुरी, या तरुणाने राहुरी पोलीस ठाण्यात दिलेल्या फिर्यादीत म्हटले आहे, उंबरे येथील राजेंद्र नामदेव ढोकणे यांचे विरुध्द अक्षय काळे याचे वडील भाऊसाहेब काळे यांनी पोलीस ठाण्यात तक्रार दिली होती. त्या तक्रारीचा राग राजेंद्र नामदेव ढोकणे यांना आला. दि. 18 एप्रिल 2025 रोजी सकाळी 9.30 वाजेच्या सुमारास अक्षय काळे हा उंबरे गावातील बसस्थानक येथे उभा होता. त्यावेळी आरोपी काळ्या रंगाची स्कॉर्पओ गाडी क्रमांक एम. एच. 20- 5005 मध्ये बसून आले. त्यांनी काही न बोलता अक्षय काळे या तरुणाला हॉकी स्टीक, फायबरची काठी, लाकडी दांडा व लाथा-बुक्क्यांनी मारहाण केली. तसेच आकाश ढोकणे याने अक्षय काळे याच्या खिशातील मोबाईल व प्रविण शिरसाठ याने पॅन्टच्या खिशातील 10 हजार 500 रुपये काढुन घेतले. तसेच भाऊसाहेब काळे यांना देखील आरोपींनी मारहाण केली.
अक्षय भाऊसाहेब काळे याच्या फिर्यादीवरून राहुरी पोलीस ठाण्यात आरोपी प्रविण शिरसाठ, रा. देसवंडी, ता. राहुरी, सुनिल आप्पासाहेब दुशिंग, राजेंद्र नामदेव ढोकणे, आकाश राजेंद्र ढोकणे, दिपक गोरक्षनाथ ढोकणे, सर्व रा. उंबरे, ता. राहुरी, अक्षय सोडनर, रा. तमनर आखाडा, ता. राहुरी, साहेबराव चौधरी व जगन्नाथ चौधरी, दोघे रा. कुक्कडवेढे, ता. राहुरी, या आठ जणांवर गु.र.नं. 428/2025 भारतीय न्याय संहिता कलम 115 (2), 118 (1), 119 (1), 189 (1), 189 (2), 190, 191 (2), 191 (3), 351 (2), 352 प्रमाणे गुन्हा दाखल करण्यात आला.
तसेच अक्षय सुधाकर सोडनर, रा. पिंप्री अवघड या ढंपर चालकाने राहुरी पोलीस ठाण्यात दिलेल्या फिर्यादी म्हटले आहे की, दि. 18 एप्रिल 2025 रोजी सकाळी 9 वाजेच्या सुमारास अक्षय सोडनर हा ढंपरमध्ये डिझेल भरण्यासाठी उंबरे बसस्थानकापासून जात होता. तेव्हा अक्षय काळे याने ढंपर थांबविला आणि म्हणाला, तू मला उसने दिलेले 7 हजार 800 रुपये तुला कधीच देणार नाही, ते तू मागू नकोस आणि परत उंबरे गावात दिसायचे नाही. तेव्हा अक्षय सोडनर त्यास म्हणाला, माझे ते कामाचे पैसे आहे, ते तु मला दे. तेव्हा अक्षय काळे व इतर आरोपींनी अक्षय सोडनर याला शिवीगाळ दमदाटी करून लोखंडी गज व लाथाबुक्क्यांनी मारहाण केली. आणि त्याच्या गळ्यातील एक तोळा वजनाची सोन्याची चैन व पॅन्टचे खिशातील 2 हजार 200 रुपये काढुन घेतले. तसेच संगीता काळे ही म्हणाली, मी माझ्या नवर्‍याला औषध पाजुन मारुन टाकुन तुझ्या नावाने चिठ्ठी लिहुन ठेवील, अशी धमकी दिली.
अक्षय सुधाकर सोडनर याच्या फिर्यादीवरून राहुरी पोलीस ठाण्यात अक्षय भाऊसाहेब काळे, भाऊसाहेब दशरथ काळे, संदिप भाऊसाहेब काळे, संगीता भाऊसाहेब काळे, सर्व रा. उंबरे, ता. राहुरी, या चार जणांवर गु.र.न. 426/2025 भारतीय न्याय संहिता कलम 115 (2), 118 (1), 119 (1), 3 (5), 351 (2), 352 प्रमाणे गुन्हा दाखल करण्यात आला आहे. या घटनेचा तपास राहुरी पोलीस करीत आहेत.
