अहिल्यानगर |प्रतिनिधी| Ahilyanagar
अहिल्यानगर- सोलापूर रस्त्यावरील अंबिलवाडी (ता. अहिल्यानगर) शिवारातील एका हॉटेल मध्ये युवतीवर हॉटेल मालकानेच कामगाराच्या मदतीने अत्याचार केल्याची घटना उघडकीस आली आहे. पीडित युवती (वय 22) कर्जत तालुक्यातील असून तिने दिलेल्या फिर्यादीवरून अहिल्यानगर तालुका पोलीस ठाण्यात दोघांविरूध्द अत्याचार, अॅट्रॉसिटी कलमानुसार गुन्हा दाखल करण्यात आला आहे.
हॉटेल मालक जनार्धन जाधव (पूर्ण नाव, पत्ता माहिती नाही) आणि एका अनोळखी कामगारावर गुन्हा दाखल करण्यात आला आहे. पोलिसांकडून मिळालेल्या माहितीनुसार, पीडित युवती एका व्यक्तीची चौकशी करण्यासाठी शनिवारी (11 एप्रिल) सायंकाळी साडेसात वाजताच्या सुमारास हॉटेलवर गेली होती. त्यावेळी तिथे असलेल्या कामगाराने तिला माहिती न देता हॉटेल मालक जनार्धन जाधव याला बोलावले. जाधव याने युवतीसोबत अरवाच्च भाषेत बोलणे सुरू केले. युवतीने विरोध केला असता, कामगाराने तिचा हात धरला आणि मालकाने तोंड दाबून तिला जबरदस्तीने हॉटेलच्या वरील मजल्यावर असलेल्या खोलीत ओढत नेले.
खोलीत नेल्यानंतर कामगाराने पीडितेची ओढाताण केली आणि तो बाहेर निघून गेला. त्यानंतर जनार्धन जाधव याने पीडितेच्या असहायतेचा फायदा घेत तिच्यावर बळजबरीने अत्याचार केला. जाताना खोलीला बाहेरून कडी लावून तिला डांबून ठेवले. पीडितेने हिंमत दाखवून खोलीच्या दरवाजाला लाथ मारून तो उघडला आणि खाली आली. मात्र, दोन्ही संशयित आरोपींनी तिला खाली पाडून मारहाण केली. जर कोणाला काही सांगितले तर तुला जिवंत मारून टाकू, अशी धमकीही त्यांनी दिली असल्याचे फिर्यादीत नमूद आहे. या घटनेनंतर पीडितेने पोलीस ठाणे गाठून रविवारी (12 एप्रिल) फिर्याद दिली. पोलिसांनी गुन्हा नोंदवला आहे. पुढील तपास उपविभागीय पोलीस अधिकारी (अहिल्यानगर ग्रामीण) शिरीष वमने करीत आहेत.
