दिंडोरी | प्रतिनिधी Dindori
दिंडोरी तालुक्यातील धाऊर येथे एक हृदयद्रावक घटना घडली असून, धरणात बुडून एका युवकाचा मृत्यू झाला आहे. सार्थक माणिक पताडे (वय २०) असे मृत युवकाचे नाव आहे. विशेष म्हणजे, त्याची भारतीय सैन्यात नुकतीच निवड झाली होती, या घटनेमुळे परिसरात शोककळा पसरली आहे.
मिळालेल्या माहितीनुसार, धाऊर येथील शेतकरी माणिक मधुकर पताडे यांचा मुलगा सार्थक हा सायंकाळी सुमारे ५.३० वाजण्याच्या सुमारास धरणात मोटरपंप सोडण्यासाठी गेला होता. यावेळी त्याचा पाय घसरल्याने तो पाण्यात पडला आणि दुर्दैवाने बुडून त्याचा मृत्यू झाला.
या अपघाती मृत्यूमुळे संपूर्ण तालुक्यात हळहळ व्यक्त केली जात आहे. एक होतकरू युवक गमावल्याने कुटुंबावर दुःखाचा डोंगर कोसळला आहे.
या प्रकरणाचा पुढील तपास पोलीस निरीक्षक भगवान माथुरे यांच्या मार्गदर्शनाखाली पोलीस हवालदार गुलाब पवार करत आहेत.
