नवी दिल्ली वृत्तसंस्था | New Delhi
अमेरिकेचे राष्ट्राध्यक्ष डोनाल्ड ट्रम्प रशियावर ५०० टक्के आयातशुल्क (टॅरिफ) लादण्याच्या तयारीत आहेत. या संदर्भातील विधेयक पुढील आठवड्यात संमत होण्याची शक्यता असल्याची माहिती अमेरिकन सिनेटर लिंडसे ग्राहम यांनी दिली आहे. या विधेयकात रशियाकडून तेल खरेदी करणाऱ्या देशांवर, विशेषतः भारत, चीन आणि ब्राझीलवर ५०० टक्क्यांपर्यंत कर लादण्याच्या तरतुदींचा समावेश आहे. रिपब्लिकन सिनेटर लिंडसे ग्राहम यांनी बुधवारी व्हाईट हाऊसमध्ये राष्ट्राध्यक्षांशी चर्चा केली, त्यादरम्यान ट्रम्प यांनी हे विधेयक काँग्रेसमध्ये मांडण्यास हिरवा कंदील दाखवला.
रशियावर ५०० टक्के टॅरिफ लादल्याने अमेरिकेत आयात होणाऱ्या रशियन मालावर ५०० टक्के आयातशुल्क आकारले जाईल. त्यामुळे रशियाला आर्थिक फटका बसून रशिया – युक्रेन युद्ध थांबवण्यास मदत मिळेल, असे ग्राहम यांनी म्हटले आहे. तसेच त्यांनी भारत, चीन व ब्राझील हे देश रशियाकडून स्वस्त तेल खरेदी करत असून रशियाला युद्धात आर्थिक मदत करत असल्याचा दावा केला आहे.हे विधेयक गेल्या अनेक महिन्यांपासून विकसित होत आहे आणि पुढील आठवड्यात काँग्रेसमध्ये त्यावर मतदान होण्याची अपेक्षा आहे. ‘सँक्शनिंग ऑफ रशिया अॅक्ट 2025’ नावाचे हे विधेयक आहे.
“तेव्हा मला मुंबईकर म्हणून लाज वाटते…”; महेश मांजरेकरांकडून खंत व्यक्त
अमेरिकेने रशियन तेलाच्या खरेदीवर आधीच २५ टक्के अतिरिक्त कर लादला आहे. जर हे विधेयक मंजूर झाले तर ते भारतासाठी नवीन अडचणी निर्माण करू शकते. आतापर्यंत भारताला एकूण ५० टक्के कर लादला गेला आहे. यामुळे भारताला अमेरिकेत आपल्या वस्तू विकण्यास अडचणी येत आहेत, ज्यामुळे त्याच्या निर्यातीवर परिणाम होत आहे. काही दिवसांपूर्वीच ट्रम्प यांनी भारतावर आणखी आयातशुल्क लावण्याबाबत इशारा दिला होता. युक्रेन विरूद्धच्या युद्धात भारत रशियाकडून तेल खरेदी करून रशियाला आर्थिक मदत करत असल्याचे ट्रम्प यांनी अनेकदा म्हटले आहे.
लिंडसे ग्राहम यांनी ५ जानेवारी रोजी सांगितले की त्यांनी सुमारे एक महिना आधी भारतीय राजदूत विनय मोहन क्वात्रा यांच्या निवासस्थानी भेट दिली होती. त्या बैठकीतील चर्चेचा मुख्य विषय रशियाच्या तेलाची भारताची खरेदी कमी करणे हा होता. त्यांनी सांगितले की भारतीय राजदूतांनी त्यांना राष्ट्रपती ट्रम्प यांना भारतावर लादलेला अतिरिक्त २५ टक्के कर मागे घेण्याचा संदेश देण्यास सांगितले होते.
ट्रम्पचा भारताला इशारा
डोनाल्ड ट्रम्प यांनी काही दिवसांपूर्वी पत्रकारांशी संवाद साधताना भारतावर आणखी आयातशुल्क (टॅरिफ) लादणार असल्याचा इशारा दिला होता. डोनाल्ड ट्रम्प म्हणाले, “पंतप्रधान नरेंद्र मोदी हे खूप उत्तम व्यक्ती आहेत. मी खूष नाही हे त्यांना माहिती आहे. मला खूष ठेवणं खूप महत्वाचं आहे. ते व्यापार करतात आणि आम्ही त्यांच्यावर लवकरच टॅरिफ लावू शकतो.”
