अहिल्यानगर |प्रतिनिधी| Ahilyanagar
दोन कारची धडक होऊन झालेल्या अपघातात एका वृध्द महिलेचा मृत्यू झाला. पुष्पा पोपटराव गवारे (वय 55 रा. जेऊर बायजाबाई ता. नगर) असे मयत वृध्द महिलेचे नाव आहे. अहिल्यानगर- छत्रपती संभाजीनगर महामार्गावरील धनगरवाडी (ता. नगर) शिवारात हॉटेल स्वागत समोर 15 डिसेंबर 2024 रोजी सकाळी साडेआठच्या सुमारास ही घटना घडली. याप्रकरणी 31 डिसेंबर 2024 रोजी दुपारी कार (एमएच 32 एएस 7699) वरील चालकाविरूध्द एमआयडीसी पोलीस ठाण्यात गुन्हा दाखल करण्यात आला आहे.
प्रताप पोपटराव गवारे (वय 29 रा. जेऊर बायजाबाई) यांनी फिर्याद दिली आहे. प्रताप गवारे हे त्यांच्या कार (एमएच 16 बीवाय 3757) मधून त्यांच्या आईला घेऊन अहिल्यानगर- छत्रपती संभाजीनगर रस्त्याने जात असताना धनगरवाडी शिवारात हॉटेल स्वागत समोर रस्ता ओलांडत असताना अहिल्यानगरकडून छत्रपती संभाजीनगरच्या दिशेने जाणार्या कार चालकाने प्रताप यांच्या कारला धडक दिली असल्याचे फिर्यादीत नमूद केले आहे. अधिक तपास पोलीस अंमलदार थोरवे करत आहेत.
