मुंबई । Mumbai
शिवसेना शिंदे गटाचे नेते आणि राज्याचे कॅबिनेट मंत्री संजय शिरसाट यांचा एक व्हिडीओ सध्या सोशल मीडियावर प्रचंड व्हायरल होत आहे. या व्हिडीओत शिरसाट बेडवर बसून सिगारेट ओढत फोनवर बोलताना दिसत आहेत, तर त्यांच्या बेडखाली पैशांनी भरलेली मोठी बॅग ठेवलेली आहे. या व्हिडीओमुळे राजकीय वर्तुळात खळबळ उडाली असून, शिवसेना (उद्धव बाळासाहेब ठाकरे) पक्षाचे नेते आणि युवासेनेचे प्रमुख आदित्य ठाकरे यांनी यावर खोचक शब्दांत टीका केली आहे.
आदित्य ठाकरे यांनी संजय शिरसाट यांच्यावर जोरदार हल्लाबोल करताना म्हटले की, “गेल्या दोन-अडीच वर्षांत 33 देशांमध्ये गद्दारीची नोंद झाली आहे. ’50 खोके एकदम ओके’ अशी घोषणा देणारे आज एक खोका घेऊन दिसले.” शिरसाट यांच्या व्हिडीओवर खोचकपणे टीका करताना ठाकरे म्हणाले, “कदाचित ते आता सांगतील की, बॅगेत फक्त महात्मा गांधींच्या छापेचे बनियन होते, दुसरे काही नव्हते. पण सत्य सर्वांसमोर आहे.” ठाकरे यांनी शिंदे गटावर भ्रष्टाचाराचे गंभीर आरोप केले. ते म्हणाले, “संजय शिरसाट हे कॅबिनेट मंत्री आहेत. त्यांच्यावर हॉटेल आणि जमीन बळकावण्याचे आरोप आहेत. खुद्द मुख्यमंत्र्यांनी याप्रकरणी उच्चस्तरीय चौकशीचे आदेश दिले आहेत. पण प्रश्न हा आहे की, या ‘भ्रष्टनाथ मिंधे’ गटाचा बॉस खरोखर कारवाई करणार का? मला याची शंका आहे.”
आदित्य ठाकरे यांनी पुढे सांगितले की, शिरसाट यांना अलीकडेच आयकर विभागाची नोटीस मिळाली आहे. “ही नोटीस खूप उशिरा आली, पण आता प्रश्न आहे की, त्यांना क्लीन चीट मिळणार की भाजप खरोखर कारवाई करणार? हे पाहणे महत्त्वाचे ठरेल,” असे ते म्हणाले. ठाकरे यांनी शिंदे गटाच्या नेत्यांवरही निशाणा साधला. ते म्हणाले, “कालच काही नेत्यांना नोटीसी मिळाल्या, काहींनी गुरुपौर्णिमेच्या निमित्ताने दिल्लीत भेटीगाठी केल्या. कोण कोणाला भेटले, याची यादी आमच्याकडे आहे. इतक्या निर्लज्जपणे हा सगळा कारभार सुरू आहे.”
ठाकरे यांनी मुख्यमंत्री एकनाथ शिंदे यांच्यावरही प्रश्न उपस्थित केले. ते म्हणाले, “जर मुख्यमंत्र्यांना खरोखर भ्रष्टाचाराविरोधात लढायचे असेल, तर हा व्हिडीओ पाहून ते कठोर पावले उचलतील, अशी आशा आहे.” त्यांनी शिंदे गटातील नेत्यांच्या कथित गैरकारभारावर प्रकाश टाकताना सांगितले की, अलीकडेच एका आमदाराचा मारामारीचा व्हिडीओ समोर आला होता आणि आता शिरसाट यांचा पैशांच्या बॅगेसह व्हिडीओ व्हायरल झाला आहे. “हे सगळे प्रकार उघडकीस येत आहेत, पण कारवाई होईल की नाही, हे पाहावे लागेल,” असे ठाकरे यांनी नमूद केले.
