अहिल्यानगर । प्रतिनिधी
अहिल्यानगर महानगरपालिकेच्या सार्वत्रिक निवडणुकीसाठी आज, १५ जानेवारी २०२६ रोजी सकाळी ७:३० वाजल्यापासून मतदानाला सुरुवात झाली आहे. थंडीचा कडाका असूनही शहरात मतदारांचा उत्साह पाहायला मिळत असून पहिल्या चार तासांत, म्हणजेच सकाळी ११:३० वाजेपर्यंत सरासरी २०.१६ टक्के मतदान झाले आहे.
सकाळच्या सत्रात मतदारांनी मतदान केंद्रांवर संमिश्र प्रतिसाद दिला. प्रशासनाकडून प्राप्त झालेल्या अधिकृत आकडेवारीनुसार, सकाळी ११:३० वाजेपर्यंत एकूण ६१,८८१ मतदारांनी आपल्या मतदानाचा हक्क बजावला आहे. यामध्ये ३४,७७५ पुरुष, २७,१०३ महिला आणि ३ इतर मतदारांचा समावेश आहे. सकाळी साडेसात ते साडे नऊ या सुरुवातीच्या दोन तासांत मतदानाची गती काहीशी संथ होती, मात्र त्यानंतर मतदारांच्या संख्येत वाढ झाल्याचे दिसून आले.
शहरात सध्या कडाक्याची थंडी असूनही नागरिक घराबाहेर पडत आहेत. विशेषतः ज्येष्ठ नागरिक आणि तरुणांनी सकाळी लवकर मतदान करण्यावर भर दिला. प्रशासनाने मतदान प्रक्रियेसाठी चोख बंदोबस्त आणि व्यवस्था केली असून, मतदान शांततेत सुरू आहे. मतदानाची ही टक्केवारी पाहता, दुपारच्या सत्रात मतदानाचा टक्का आणखी वाढण्याची शक्यता वर्तवण्यात येत आहे.
प्रशासनाने नागरिकांना मोठ्या संख्येने बाहेर पडून आपले कर्तव्य बजावण्याचे आवाहन केले आहे. दुपारी १२ नंतर मतदानाचा वेग कसा राहतो, याकडे आता सर्वांचे लक्ष लागले आहे.
