मुंबई । Mumbai
मुंबईसह महाराष्ट्रातील महापालिका निवडणुकांच्या मतदानादरम्यान ‘बोटावरची शाई’ पुसली जात असल्याच्या तक्रारींवरून आता राजकीय वातावरण चांगलेच तापले आहे. या प्रकरणावरून भाजप नेते आशिष शेलार यांनी उद्धव ठाकरे आणि राज ठाकरे यांच्यावर जोरदार टीकास्त्र सोडले आहे. बोटावरची शाई पुसणे हा निवडणूक प्रक्रियेशी छेडछाड करण्याचा प्रकार असून, अशा व्यक्तींवर तातडीने गुन्हे दाखल करण्याची मागणी शेलार यांनी केली आहे.
निवडणूक प्रक्रियेत पारदर्शकता राखण्यासाठी मतदाराच्या बोटावर शाई लावली जाते. मात्र, अनेक ठिकाणी ही शाई सहज पुसली जात असल्याच्या तक्रारी समोर आल्या आहेत. यावर भाष्य करताना आशिष शेलार म्हणाले की, “बोटावरची शाई पुसली जात आहे, अशा तक्रारी करणाऱ्यांचा नेमका हेतू काय? शाई पुसून या मतदारांना पुन्हा मतदान करायचे होते का?” शाई पुसणे हा गंभीर गुन्हा असून, प्रशासनाने याची चौकशी करून संबंधितांवर कडक कारवाई करावी, असेही त्यांनी स्पष्ट केले.
मतदानाच्या दिवशीच उद्धव ठाकरे यांनी शिवसेना भवनात पत्रकार परिषद घेऊन निवडणूक आयोगाच्या कामकाजावर प्रश्नचिन्ह उपस्थित केले होते. याला प्रत्युत्तर देताना शेलार यांनी ठाकरेंच्या भूमिकेवर सडकून टीका केली. “ठाकरे बंधूंचे सल्लागार सडके आहेत आणि हे दोन्ही बंधू ‘रडके’ आहेत. जर त्यांना केवळ रडायचेच असेल, तर ते निवडणूक का लढवतात?” असा बोचरा सवाल शेलार यांनी केला. तसेच, ठाकरे बंधू हे ‘राजकीय नटसम्राट’ असल्याची उपरोधिक टीकाही त्यांनी यावेळी केली.
आशिष शेलार यांनी उपस्थित केलेल्या मुद्द्यांनुसार, ज्यांच्या बोटावरची शाई पुसली गेली, त्यांनी अधिकृतपणे निवडणूक आयोगाकडे तक्रार का केली नाही? केवळ राजकीय हेतू साध्य करण्यासाठी माध्यमांसमोर प्रदर्शन केले जात असल्याचा आरोप त्यांनी केला. “ठाकरे बंधूंच्या बोटावरची शाई पुसली गेली आहे का? याचे उत्तर त्यांनी आधी द्यावे,” असे आव्हानही त्यांनी दिले. मुंबईकर हे केवळ लढणाऱ्यांच्या पाठीशी उभे राहतात, रडणाऱ्यांच्या मागे जात नाहीत, असा टोलाही त्यांनी लगावला.
दुबार मतदार आणि ईव्हीएम मशिनमधील तांत्रिक बिघाड यांसारख्या मुद्द्यांवरून विरोधकांनी रान उठवले असताना, भाजपने मात्र हा केवळ पराभवाच्या भीतीपोटी केलेला बनाव असल्याचे म्हटले आहे. निवडणूक प्रक्रियेत अडथळा आणणाऱ्या आणि शाई पुसून लोकशाहीचा अपमान करणाऱ्या घटकांचा शोध घेऊन त्यांच्यावर कायदेशीर ठपका ठेवला पाहिजे, अशी ठाम मागणी भाजपने केली आहे. एकूणच, मतदानाच्या दिवशी शाईवरून सुरू झालेला हा वाद आता न्यायालयीन किंवा प्रशासकीय कारवाईपर्यंत पोहोचणार का, हे पाहणे महत्त्वाचे ठरेल.
