अहिल्यानगर |प्रतिनिधी| Ahilyanagar
पोखर्डी येथे गणपती मंदिराजवळ खेळणार्या सात वर्षीय मुलाला भरधाव कारने धडक दिल्याने त्याचा मृत्यू झाल्याची दुर्दैवी घटना घडली. अथर्व नंदू सुसे असे मयत मुलाचे नाव आहे. याप्रकरणी त्याचे काका राजेंद्र भाऊराव सुसे (वय 41, रा. पोखर्डी) यांनी दिलेल्या फिर्यादीवरून टाटा इंडिगो कार चालक पोपट कुंडलिक वाघ (रा. पिंपळगाव उज्जैनी ता. नगर) याच्याविरुद्ध एमआयडीसी पोलीस ठाण्यात गुन्हा दाखल करण्यात आला आहे.
फिर्यादीनुसार, 8 ऑगस्ट सायंकाळी अथर्व सुसे (वय 7) हा पोखर्डी ते पिंपळगाव उज्जैनी रस्त्यालगत गणपती मंदिराजवळ खेळत होता. यावेळी वाघ याने आपल्या टाटा इंडिगो कारला बेजबाबदारपणे आणि भरधाव वेगाने चालवत अथर्वला पाठीमागून जोरदार धडक दिली. धडकेनंतर चालकाने कोणतीही मदत न करता पळ काढला. या अपघातात अथर्वचा जागीच मृत्यू झाला.
घटनेनंतर राजेंद्र सुसे यांनी तात्काळ एमआयडीसी पोलिसांना माहिती दिली. पोलीस हवालदार गणेश पालवे आणि सहाय्यक एम. बी. चौधरी यांनी घटनास्थळी भेट दिली. अथर्वला सिव्हील हॉस्पिटल नगर येथे नेण्यात आले. मात्र, त्याचा आधीच मृत्यू झाला होता. पोलिसांनी वाघ याच्याविरुद्ध गुन्हा दाखल करून तपास सुरू केला आहे.
