मुंबई । Mumbai
महाराष्ट्राच्या राजकारणात गेल्या काही दिवसांपासून अत्यंत वेगवान आणि अनपेक्षित घडामोडी घडत आहेत. उपमुख्यमंत्री अजित पवार यांच्या अपघाती निधनानंतर राज्याच्या राजकारणाची समीकरणे बदलली असून, आता दोन्ही राष्ट्रवादी काँग्रेस पक्षांच्या विलीनीकरणाच्या चर्चेने जोर धरला आहे. या पार्श्वभूमीवर मुख्यमंत्री देवेंद्र फडणवीस यांनी आपली महत्त्वाची प्रतिक्रिया दिली आहे.
२८ जानेवारी रोजी अजित पवार यांचे विमान अपघातात निधन झाले. या दुर्दैवी घटनेनंतर ३१ जानेवारी रोजी त्यांच्या पत्नी सुनेत्रा पवार यांनी महाराष्ट्राच्या पहिल्या महिला उपमुख्यमंत्री म्हणून शपथ घेतली. मात्र, या शपथविधीनंतर शरद पवार आणि जयंत पाटील यांनी केलेल्या एका दाव्याने सर्वांचे लक्ष वेधून घेतले आहे. १२ फेब्रुवारी रोजी दोन्ही राष्ट्रवादी गट एकत्र येणार होते आणि त्याबाबतची चर्चा अंतिम टप्प्यात होती, असा दावा शरद पवार गटाकडून करण्यात आला आहे.
या विलीनीकरणाच्या चर्चेवर भाष्य करताना मुख्यमंत्री देवेंद्र फडणवीस म्हणाले की, “राष्ट्रवादी काँग्रेस पक्ष हा एक स्वतंत्र अस्तित्त्व असलेला पक्ष आहे. त्यांच्या पक्षाचे निर्णय घेण्याचा अधिकार त्यांनाच आहे. आम्ही त्यांचे मित्र आहोत आणि ते आमच्यासोबत सत्तेत सहभागी आहेत. त्यामुळे आम्ही त्या पक्षाच्या पाठीशी पूर्ण ताकदीने उभे आहोत.”
विलीनीकरणाच्या तारखेबाबत विचारले असता फडणवीस यांनी शरद पवार गटाचे दावे फेटाळून लावले. ते म्हणाले, “जर दोन्ही राष्ट्रवादी पक्षांच्या एकत्रिकरणाची चर्चा इतक्या अंतिम टप्प्यात असती, तर अजितदादांनी नक्कीच आम्हाला त्याबद्दल कल्पना दिली असती. अजितदादांचा पक्ष आमच्या सरकारमध्ये सामील आहे, मग आमच्याशी चर्चा न करता ते विलीनीकरणाचा इतका मोठा निर्णय कसा काय घेऊ शकतील?” असा सवाल त्यांनी उपस्थित केला.
शरद पवार आणि अजित पवार यांच्यात गुप्त बैठका झाल्याच्या चर्चेवर बोलताना मुख्यमंत्री म्हणाले की, त्या दोन नेत्यांमध्ये वैयक्तिक स्तरावर काय बोलणे झाले, याची आम्हाला कल्पना नाही. “विलीनीकरणाची कोणतीही तारीख ठरली असती तर ती आम्हाला समजली असती. किमान आमच्या माहितीनुसार, राष्ट्रवादीच्या विलीनीकरणाच्या तारखेबाबत कोणतीही अधिकृत माहिती समोर आलेली नाही,” असेही त्यांनी स्पष्ट केले.
दुसरीकडे, आमदार जयंत पाटील यांनीदेखील या विलीनीकरणाच्या वृत्ताला दुजोरा दिला आहे. दोन्ही गट एकत्र आणण्यासाठी अनेक बैठका झाल्या होत्या आणि लवकरच त्याची घोषणा होणार होती, असे त्यांनी सांगितले. मात्र, अजित पवारांच्या निधनामुळे या प्रक्रियेला ब्रेक लागला की काय, अशी शंका आता उपस्थित केली जात आहे.
सुनेत्रा पवार यांच्या रूपाने राज्याला पहिल्या महिला उपमुख्यमंत्री मिळाल्या असल्या, तरी महायुतीमधील या नव्या राजकीय वळणामुळे येत्या काळात राष्ट्रवादी काँग्रेसच्या दोन्ही गटांतील संबंध नेमके कसे राहतात, हे पाहणे महत्त्वाचे ठरेल. विलीनीकरणाच्या या दाव्यांमुळे महायुतीच्या अंतर्गत समीकरणांवर काय परिणाम होतो, याकडे आता संपूर्ण राज्याचे लक्ष लागले आहे.
