धुळे – Dhule – प्रतिनिधी :
साक्री व बागलान तालुक्याला जोडणार्‍या पिसोळ बारीत बिबट्याच्या हल्लयात शेतकरी ठार झाल्याची घटना समोर आली आहे.
या घटनेमुळे दिघावे परिसर व सटाणा तालुक्यात खळबळ उडाली आहे. दरम्यान बिबट्याच्या हल्यात तरूण ठार झाल्याची ही पहिलीच घटना असल्याचे सांगितले जात आहे.
नंदकिशोर धोंडू पवार (वय 41 रा. दरेगाव ता. सटाणा) असे मयत शेतकर्‍याचे नाव आहे. ते नंदिन शिवारातील शेतात वास्तव्याला होते. ते नेहमी प्रमाणे दुचाकीने दिघावे येथे आले. येथून परत जात असतांना सायंकाळच्या सुमारास पिसोळ बारीत बिबट्याने त्यांच्यावर हल्ला करुन जंगलात ओढून नेले.त्यात पवार याचा जागीच मृत्यू झाला.
रात्री घरी परत न आल्याने त्यांची शोधाशोध केली असता पिसोळबारीत त्यांची दुचाकी आढळून आली. परिसरात शोध घेतल्यावर नंदकिशोर हे गंभीर जखमी अवस्थेत आढळून आले. त्यांचा मृत्यू हा बिबट्याच्या हल्लयाने झाल्याचे निष्पन्न झाले आहे. त्यांच्या पश्चात पत्नी, एक मुलगा व एक मुलगी असा परिवार आहे.
दरम्यान पिसोळबारी ही सटाणा व साक्री तालुक्याला जोडते. सटाणा तालुक्यात व साक्री तालुक्यात येण्या-जाण्यासाठी हा सर्वात जवळचा मार्ग आहे. गेल्या दोन-तीन वर्षापासून हा रस्ता दुरुस्त झाल्याने अनेक वाहनधारक याच रस्त्याचा वापर करतात.
