पुणे, अहिल्यानगर |प्रतिनिधी| Pune | Ahilyanagar
लंडनला फरार झालेला पुण्यातील कुख्यात गुंड निलेश घायवळ आणि विधानपरिषदेचे सभापती राम शिंदेंचा एक व्हिडीओ व्हायरल होत आहे. यामध्ये गुंड निलेश घायवळ हा राम शिंदेंच्या पाया पडतानाचा आहे. त्याच पद्धतीने विधानसभा निवडणुकीच्या वेळी निलेश घायवळ हा राम शिंदेंच्या प्रचारामध्ये भाषण करतानाही दिसत आहे. त्यामुळे निलेश घायवळ आणि राम शिंदेंचे राजकीय संबंध समोर आल्याचा आरोप आमदार रोहित पवार यांनी केला. त्यावर तासाभरातच भाजपाने रोहित पवार यांना प्रत्युत्तर देताना ‘यह रिश्ता क्या कहलाता है?’ म्हणत सचिन घायवळ आणि रोहित पवार यांचेच फोटो पोस्ट केले आहे.
भाजपाचे नवनाथ बन यांनी एक्स वर रोहित पवार व सचिन घायवळ यांचे फोटो पोस्ट करून लिहिले की, आमदार रोहित पवार यांचे सचिन घायवळ यांच्यासोबतचे काही फोटो! परवान्यासाठी अर्ज कसा करायचा यांचे मार्गदर्शन रोहित पवार करत होते का? यह रिश्ता क्या कहलाता है? दरम्यान, निलेश घायवळच्या शोधात पुणे पोलीस असून तो सध्या लंडनमध्ये फरार झाला आहे. त्याचवेळी राम शिंदे आणि निलेश घायवळ यांचे एकत्रित व्हिडीओ समोर आले आहेत. निलेश घायवळ राम शिंदेंच्या एका प्रचारामध्ये भाषण करताना दिसत आहे. राम शिंदेंना मतदान करण्याचं आवाहन तो करताना दिसतोय. शिंदे साहेब आपले आहेत, ते कोणत्याही कामामध्ये आपल्यामागे उभे राहतील असं म्हणताना निलेश घायवळ व्हिडीओमध्ये म्हणताना दिसत आहे.
गुंड निलेश घायवळवरून रोहित पवारांनी राम शिंदे यांच्यासोबत शिंदे गटाचे आमदारांवर खळबळजनक आरोप केले आहेत. संतोष बांगर, तानाजी सावंतांच्या कुटुंबातील व्यक्तींची घायवळला मदत झाली असल्याचा आरोप रोहित पवारांनी केला. घायवळ अहमदाबाद एअरपोर्टवरून पळून गेला. त्याला सोडायला कोण गेलं याची आपल्याकडे माहिती आहे. राम शिंदेंनी बाजार समिती निवडणुकीसाठी घायवळचा उपयोग केला. तसेच गृहराज्यमंत्री योगेश कदमांवर राम शिंदे किंवा थेट गृहमंत्र्यांचाच दबाव असल्याचा आरोपही रोहित पवारांनी केला.
सचिन घायवळ फरार
पुण्यातील गुंड निलेश घायवळ लंडनला पळून गेल्याची घटना ताजी असतानाच त्याचा भाऊ सचिन घायवळचे कारनामेही चर्चेत आले आहेत. धक्कादायक बाब म्हणजे सचिन घायवळचीही भावाप्रमाणे गुन्हेगारी पार्श्वभूमी असताना गृहरात्र्यमंत्री योगेश कदम यांनी पोलिसांना दिलेले आदेश वादाच्या भोवर्यात सापडले आहेत. सचिन घायवळनं काही दिवसांपूर्वी पुणे पोलिसांकडे बंदुकीच्या परवान्यासाठी अर्ज केला होता. मात्र गुन्हेगारी पार्श्वभूमीमुळे पोलिसांनी परवाना देण्यास नकार दिला. याच सचिन घायवळने पुढे शस्त्र परवान्यासाठी थेट गृहराज्यमंत्री योगेश कदम यांच्याकडे अर्ज केला. योगेश कदम यांनीही या अर्जानुसार सचिन घायवळ याला शस्त्र परवाना देण्याचे आदेश दिलेत. मात्र, या आदेशानंतरही पुणे पोलिसांनी सचिन घायवळची गुन्हेगारी पार्श्वभूमी पाहता शस्त्र परवाना देण्यास नकार दिला.
नगरचा घायवळ पुण्याचा डॉन झाला…
– निलेश घायवळ हा मूळचा अहिल्यानगर जिल्ह्यातील जामखेड तालुक्यातील सोनेगाव इथला. हेच त्याचं मूळगाव. त्याचं बालपण तिथेच गेलं. शालेय शिक्षण गावातच पूर्ण झाल्यानंतर तो ग्रॅज्युएशनसाठी पुण्याला आला. पोराटोरांसोबत टुकारक्या करायला लागला. पण, तो शिक्षणात चांगला होता, त्यामुळं पटापट पास होत होता. त्यातच त्याची ओळख गजा मारणेशी झाली. तोच गजा मारणे जो पुण्यातल्या सगळ्यात मोठ्या गँगचा बॉस होता. इथून त्यानं पुण्यातल्या गुन्हेगारीविश्वात आपलं पाऊल ठेवलं.
- निलेशनं मास्टर्स इन कॉमर्स पूर्ण केलं. त्यानंतर त्याच्यापुढे नोकरीचा पर्याय होता. पण, त्यानं ते न निवडता गजा मारणेला निवडलं. त्याच्या गँगमध्ये तो गुंड म्हणून काम करुन लागला. हप्ते वसूल करणं, लोकांना धमकावणं, जमिनींची प्रकरणं सांभाळणं, निवडणुकांमध्ये मागून सगळं मॅनेजमेंट सांभाळणं, पुण्यातल्या इतर गुंडांवर वचक ठेवणं अशी सगळी कामं निलेश करु लागला. त्यामुळे गजा मारणेच्या तो जवळ गेला आणि इथं त्याला पुण्यातला एक भाग सांभाळायला मिळाला. गुन्हेगारी विश्वात मोठी महत्त्वकांक्षा बाळगणार्या निलेशने मारणे गँगमध्येच आपली नवी गँग तयार करण्यास सुरुवात केली. त्यानंतर एका प्रकरणात तो तुरंंंंगातही गेला. त्यानंतर त्याने स्वतः विश्व तयार केलं. त्यातून अनेक कारनामे पुढे आले.
