नवी दिल्ली वृत्तसंस्था | New Delhi
इराण आणि अमेरिका युद्ध फक्त युद्धाच्या मैदानातच नाही तर सोशल मीडियावरही सुरू आहे. इराणचे खार्ग बेट नष्ट करण्याच्या अमेरिकेचे अध्यक्ष डोनाल्ड ट्रम्प यांच्या दाव्याला तेहरानकडून कडक शब्दात फटकारण्यात आले. त्यांनी अमेरिकेनं रशियाकडून तेल खरेदी करण्याबाबत यू टर्न घेतल्यावरून अमेरिकेची खिल्ली उडवली आहे.
सोशल मीडियावर पोस्ट करताना इराणचे परराष्ट्र मंत्री अब्बास अराघची यांनी दावा केला की आता डोनाल्ड ट्रम्प प्रशासन हे भारत आणि इतर देशांकडे रशियाकडून तेल खरेदी करावी यासाठी भीक मागत आहे. यापुर्वी अमेरिकेने भारतासह अनेक देशांना रशियाकडून तेल खरेदी करण्यापासून रोखले होते. त्यासाठी त्यांच्यावर टॅरिफ लावत दबाव टाकला होता.
अमेरिका भीक मागत आहे
अब्बास अराघची यांनी एक्सवर पोस्ट करत म्हंटले आहे, “महिने-महिने, अमेरिका भारतावर रशियन तेल खरेदी करू नये म्हणून दबाव आणत आहे, परंतु इराणशी युद्ध सुरू होऊन अवघ्या दोन आठवड्यांत, व्हाईट हाऊस आता भारतासह जगाला रशियाकडून तेल खरेदी करावे म्हणून भीक मागत आहे.
राज्यात LPG चा तुटवडा; सरकारच्या वतीनं नवी नियमावली जाहीर, कुणाला किती गॅस मिळणार?
युरोपीय देशांनी अनधिकृत युद्धाला पाठिंबा दिल्याबद्दल टीका
इराणच्या परराष्ट्र मंत्र्यांनी युरोपच्या देशांना इराणविरूद्धच्या अनधिकृत युद्धाला पाठिंबा दिल्याबद्दल देखील टीका केली. अराघची म्हणतात की या युरोपीय देशांना आशा आहे की याच्या बदल्यात अमेरिका रशियाविरूद्ध त्यांना पाठिंबा देईल. हे खूप दयनीय आहे.
फायनान्शियल टाईम्सचा हवाला
इराणच्या परराष्ट्र मंत्रालयाने ‘एक्स’ वर त्यांच्या विधानासह फायनान्शियल टाईम्सचा अहवाल पोस्ट केला. फायनान्शियल टाईम्सच्या अहवालात कच्च्या तेलाच्या वाढत्या किमतींमुळे रशियाला कसा फायदा होत आहे आणि त्याचे उत्पन्न कसे वाढत आहे यावर प्रकाश टाकण्यात आला आहे. अराघची यांच्या विधानाच्या काही काळापूर्वी, ट्रम्प प्रशासनाने जगभरातील देशांना रशियन तेल खरेदी करण्यावर ३० दिवसांची सूट जाहीर केली.
अमेरिकेची भारताला सुट
गेल्या आठवड्यात, अमेरिकेचे ट्रेझरी सेक्रेटरी स्कॉट बेसंट म्हणाले की, तेल बाजारात तेल पुरवठा वाढवण्यासाठी वॉशिंग्टनने भारताला रशियाकडून अडकलेले तेल खरेदी करण्याची परवानगी दिली आहे. भारतीय चांगले घटक आहेत. आम्ही त्यांना रशियन तेल खरेदी थांबवण्यास सांगितले आणि त्यांनी तसे केले. त्यांनी अमेरिकेची विनंती मान्य केली. आता आम्ही त्यांना तात्पुरती सूट देत आहोत.
