नवी दिल्ली वृत्तसंस्था | New Delhi
अमेरिका-इस्रायल आणि इराण यांच्यातील युद्ध १४ व्या दिवशीदेखील सुरू आहे. अमेरिका आणि इस्रायलने केलेल्या हल्ल्याला इराणने जोरदार प्रत्युत्तर दिलं आहे. इराणच्या पलटवारने अमेरिका आणि इस्रायल हैराण झाले आहेत. इराणने अमेरिकेला मोठा धक्का दिला असल्याचा दावा करण्यात येत आहे. इराणने अमेरिकेच्या शक्तिशाली युद्धनौकेवर हल्ला केला असल्याचे समोर आले आहे.
इराणने यूएसएस अब्राहम लिंकन या मोठ्या विमानवाहू जहाजावर क्षेपणास्त्रे आणि ड्रोनने हल्ला केल्याचा दावा केला आहे. मीडिया रिपोर्ट्सनुसार, पर्शियन आखातात तैनात असलेल्या जहाजाचे या हल्ल्यात मोठे नुकसान झाले. इराणी सैन्याच्या विशेष युनिट असलेल्या इस्लामिक रिव्होल्यूशनरी गार्ड कॉर्प्स (आयआरजीसी) ने म्हटले आहे की हल्ल्यानंतर विमानवाहू जहाज आता माघार घेत आहे आणि अमेरिकेत परतत आहे. तथापि, अमेरिकन सरकार किंवा लष्कराकडून अद्याप कोणतेही अधिकृत विधान जारी केलेले नाही.
इराणच्या ‘सेंट्रल हेडक्वार्टर ऑफ द होली प्रोफेट’ने जारी केलेल्या निवेदनात म्हटले आहे की, ओमानच्या समुद्रात इराणच्या सागरी सीमेपासून सुमारे ३४० किलोमीटर अंतरावर ही कारवाई करण्यात आली. अत्याधुनिक बॅलिस्टिक क्षेपणास्त्रे आणि आत्मघातकी ड्रोनचा वापर करून या विमानवाहू नौकेला लक्ष्य करण्यात आले. इराणच्या सरकारी टेलिव्हिजनने दिलेल्या वृत्तानुसार, या हल्ल्यानंतर अमेरिकन युद्धनौका आणि त्यांचा ताफा अत्यंत वेगाने त्या भागातून माघार घेताना दिसला.
IRGC ने असा दावा केला आहे की, त्यांच्या अचूक हल्ल्यामुळे ही विमानवाहू नौका आता ‘नॉन-ऑपरेशनल’ (निकामी) झाली आहे. या मोठ्या नुकसानीमुळे अमेरिकेला ही युद्धनौका गल्फमधून मागे घेण्यास भाग पाडले असून ती आता अमेरिकेकडे परतत आहे. इराणच्या या दाव्याने जागतिक राजकारणात मोठी खळबळ उडाली आहे.
टेक्नॉलॉजीचा कमाल! भविष्यातील युद्धात नवे शस्त्र; ड्रोनसोबत हेरगिरीसाठी झुरळंही उतरणार
अमेरिकेने फेटाळला दावा
अब्राहम लिंकन युद्धनौकेवर हल्ला केल्याचा इराणने दावा केल्यानंतर अमेरिकेने लगेचच याला उत्तर देत दावा खोटा असल्याचे सांगितले. अमेरिकेच्या सेंट्रल कमांडने युद्धनौकेचा फोटो प्रसिद्ध करत ती सुरक्षित असल्याचे सांगितले. नौका ऑपरेशन एपिक फ्युरीमध्ये महत्वाची भूमिका बजावत असल्याचेही अमेरिकेने नमूद केले.
इराणी जहाजावर हल्ला
सीबीसीने प्रसिद्ध केलेल्या वृत्तानुसार, अमेरिकेच्या नौदलाने जवळ येऊ पाहणाऱ्या इराणी नौकेवर हल्ला केला. पण, इराणी नौकेला काही इजा झाली अथवा नाही? याची पुष्टी करता आली नसल्याचे अमेरिकन अधिकाऱ्यांनी सीबीसीला माहिती देताना म्हटले. इराणकडून देखील त्यांच्या जहाजाबद्दल कुठलीही माहिती प्रसिद्ध करण्यात आलेली नाही.
यूएसएस अब्राहम लिंकन कॅरियर स्ट्राइक ग्रुप 3 चा भाग
यूएसएस अब्राहम लिंकन विमानवाहू जहाज जानेवारीमध्ये इराणजवळ तैनात करण्यात आले होते. ते यूएस कॅरियर स्ट्राइक ग्रुप-3 चा भाग आहे, ज्यामध्ये अनेक युद्धनौका आणि पाणबुड्यांसह अणुऊर्जेवर चालणारी विमानवाहू जहाजे आहेत. वाहक स्ट्राइक ग्रुप ही एक शक्तिशाली नौदल लष्करी रचना आहे, जी एका विमानवाहू जहाजावर केंद्रित असते आणि त्याच्यासोबत अनेक युद्धनौका आणि पाणबुड्या असतात. अमेरिकन नौदलाच्या अधिकृत वेबसाइट, एपरपॅक नेव्हीनुसार, या गटात सामान्यतः एक विमानवाहू जहाज, यूएसएस अब्राहम लिंकन, तीन ते चार मार्गदर्शित-क्षेपणास्त्र विनाशक असतात, जे हवाई संरक्षण, पाणबुडीविरोधी आणि जमिनीवर हल्ला करू शकतात. या गटात एक क्रूझर देखील समाविष्ट आहे, जे ऑपरेशन दरम्यान कमांड आणि नियंत्रण प्रदान करते.
