धुळे | Dhule
जिल्ह्यात नगरपरिषद आणि नगरपंचायत निवडणूकीत भाजपाचा (BJP) बोलबाला असून दोंडाईचा नगराध्यक्षपद आणि सर्वच जागा यापुर्वीच बिनविरोध झालेल्या आहेत. तर आज जाहिर झालेल्या निकालात शिरपूरात आ. अमरिशभाई पटेल यांचाच करिष्मा कायम राहिला असून नगराध्यक्षपदासह १६ प्रभागातील ३२ पैकी ३१ जागांवर विजय मिळवित विरोधकांना धुळ चारली. नगराध्यक्ष पदाचे उमदेवार चिंतनभाई अमरिशभाई पटेल (Amrish Bhai Patel) यांनी तब्बल १६ हजार ९५९ मतांनी शिवसेनेचे हेमंत पाटील यांना पराभुत केले. एमआयएमला १ जागेवर समाधान मानावे लागले.
पिंपळनेर नगरपरिषदेच्या पहिल्यांदाच झालेल्या निवडणुकीत भारतीय जनता पक्षाने निर्विवाद वर्चस्व मिळविले आहे. नगराध्यक्षपदी भाजपच्या डॉ.योगिता चौरे यांची विजय मिळविला. त्यांना ७ हजार ३६६ मते मिळाली. त्यांनी शिवसेनेच्या ललिता प्रेमानंद गायकवाड यांचा १ हजार ३६६ मतांनी पराभव केला. सदस्य पदाच्या एकुण १८ जागांपैकी भाजपा व शिवसेनेचे प्रत्येकी आठ आठ उमेदवार विजय झाले. तर दोन जागांवर अपक्ष उमेदवारांनी बाजी मारली.
शिंदखेडा नगरपंचायतीच्या लोकनियुक्त नगराध्यक्षपदी राष्ट्रवादी कॉंग्रेस अजित पवार गटाच्या कलावती सुकलाल माळी यांनी विजय प्राप्त करीत इतिहास घडविला. त्यांनी भाजपाच्या उमेदवार रजनी अनिल वानखेडे यांचा पराभव केला. माळी यांना ६ हजार ९९१ मते मिळाली. तर वानखेडे यांना ६ हजार २०० मते मिळाली. एकूण १७ प्रभागांपैकी भाजपाला ११ जागा, राष्ट्रवादी कॉंग्रेस (अजित पवार गट) ४, राष्ट्रवादी (शरद पवार गट) आणि कॉंग्रेसला प्रत्येकी एक जागा मिळाली.
