छत्रपती संभाजीनगर- Chhatrapati Sambhajinagar
ज्युनिअर केजीत शिकणार्‍या पावणेचार वर्षांच्या चिमुकलीवर भयंकर क्रूर अत्याचार केल्याची संतापजनक घटना सिडको एन-४ परिसरातील एका शाळेत उघडकीस आली. दुर्दैवाची बाब म्हणजे तो आरोपी अत्याचार करत असताना एक महिला शिक्षिका त्याला संरक्षण देत होती. त्या शिक्षिकेला पकडण्यात पोलिसांना यश आले आहे.
या खळबळजनक घटनेची गंभीर दखल घेत पुंडलिकनगर पोलिसांनी गुन्हा दाखल करून शिक्षिकेस अटक केली असून तिचा साथीदार फरार आहे. या खळबळजनक घटनेने छत्रपती संभाजीनगर हादरले आहे. गारखेडा परिसरातील अहिल्यादेवी होळकर चौकात राहणाऱ्या एका महिलेची ३ वर्षे ८ महिन्यांची मुलगी सिडको एन- ४ परिसरातील एका शाळेत ज्युनिअर केजीत शिकते. १८ जुले रोजी शाळेतून घरी आल्यावर मुलीने गुप्तांगात त्रास होत असल्याचे सांगितले. तसेच रक्‍ताचे डाग दिसत असल्याने आईने तिला परिसरातील एका डॉक्टरकडे नेले.
डॉक्टरने बाहेरील जखम असल्याचे सांगत औषधोपचार केले. आईने मुलीला विश्‍वासात घेऊन विचारपूस केली असता तिने धक्कादायक माहिती सांगितली. या प्रकरणी आईच्या तक्रारीवरून पुंडलिकनगर पोलीस ठाण्याच्या उपनिरीक्षक मेघा माळी यांनी गुन्हा दाखल करून तत्काळ तपासाची चक्रे फिरवत शिक्षिकेला अटक केली तर अमोल हा फरार असून त्याचा शोध सुरू आहे.
अत्याचारात शिक्षिकाही सामील
चिमुकलीला विश्‍वासात घेऊन विचारपूस केली असता तिने अमोल हा अत्यंत क्रूरतेने लैंगिक छळ करतो तसेच शाळेच्या खोलीत कोंडून हातपाय बांधून पेन्सीलने अत्याचार करण्याचा प्रयत्न करतो. आरडाओरड केल्यास गप्प बसविण्यासाठी बेदम मारहाण करून गॅलरीतून बाहेर फेकण्याची तसेच पंख्याला लटकविण्याची धमकी देतो, असे सांगितले.
आवाज ऐकूणही शिक्षिका ही दरवाजा उघडत नाही. २० दिवसांपासून हे घाणेरडे प्रकार सुरू असल्याचे चिमुकलीने रडत-रडतच सांगितले. दरम्यान, चिमुकलीला उपचारासाठी घाटी रुग्णालयात दाखल करण्यात आले आहे.
