नाशिक । प्रतिनिधी

कडधान्याचे भाव गगनाला भिडले असून उडीद १२० तर मूगडाळ ११० रुपये किलो दराने विक्री केली जात आहे. मागील आठवड्यात डाळींच्या किमतीत प्रतिकिलो दहा ते वीस रुपयांनी वाढ झाली आहे. परतीच्या पावसाने कडधान्याचे मोठे नुकसान झाले. त्यामुळे मागणीच्या तुलनेत डाळींचा पुरवठा घटला आहे. केंद्र सरकारने डाळी आयात केल्या तरच दर कमी होण्याची शक्यता वर्तवली जात आहे.
रोजच्या आहारातील प्रमुख घटक असलेल्या डाळींचे भाव कडाडले आहेत.

महाराष्ट्रात मराठवाडा व विदर्भात मोठ्या प्रमाणात कडधान्ये घेतली जातात. तसेच राजस्थान व मध्य प्रदेश या राज्यांतूनदेखील डाळींचा पुरवठा होतो. मात्र यंदा परतीच्या पावसाने राज्यात धुमाकूळ घातला. हातातोंडाशी आलेले कडधान्याचे पीक आडवे झाले. डिसेंबरमध्ये नवीन डाळींचे उत्पादन बाजारपेठेत येऊ शकले नाही. त्यामुळे बाजारपेठेत डाळींचा मोठ्या प्रमाणात तुटवडा निर्माण झाला आहे. मागणी वाढली असून पुरवठा घटला आहे. तूरडाळ, मूगडाळ, हरभरा डाळ, उडीद आदींच्या किमतींनी प्रतिकिलो शंभरी पार केली आहे.

होलसेल किराणा दुकानात साधारण: ९० ते १२० रुपये किलो दराने डाळींची विक्री होत आहे. अनेक दुकानदारांची भिस्त ही डाळींच्या जुन्या स्टॉकवरच आहे. एकाएकी दर वाढल्याने ग्राहकांना जादा पैसे मोजून डाळी खरेदी करावी लागत आहे. त्यावर पर्याय म्हणून काही ग्राहक नेहमीच्या तुलनेत कमी डाळ खरेदी करत आहेत. पुढील काळात डाळींच्या किमतीत आणखी वाढ झाल्यास सर्वसामान्यांच्या ताटातून डाळ गायब होण्याची चिन्हे आहेत. डाळीचे नवीन पीक बाजारात येईपर्यंत दर कमी होण्याची चिन्हे नसल्याची शक्यता व्यापार्‍यांनी वर्तवली आहे.

डाळींचे भाव रुपये
तूरडाळ- ८५ -१००
मूगडाळ- ८५ – ११०
हिरवे मूग- ८५-९०
हरभरा- ६५-७०
उडीद- ११०-१२०

केंद्र सरकार आयात करणार
महाराष्ट्र, राजस्थान, गुजरात, मध्य प्रदेश या राज्यांमध्ये कडधान्याचे मोठ्या प्रमाणात उत्पादन घेतले जाते. यंदा परतीच्या पावसाने कडधान्य पिकांचे अतोनात नुकसान झाले. त्यामुळे चालू हंगामात डाळींचे नवीन पीक बाजारपेठेत येऊ शकले नाही. केंद्र सरकार इतर देशातून डाळी आयात करण्याचा निर्णय घेण्याची शक्यता आहे. आयात केल्यावरच डाळींचे चढे दर कमी होतील.

मागील काही दिवसांत डाळींच्या दरात प्रतिकिलो १० ते २० रुपयांनी वाढ झाली आहे. सद्यस्थितीत डाळींचे दर कमी होण्याची कोणतीही चिन्हे नाहीत. – कैलास मालपुरे, किराणा दुकानदार

नाशिक | विजय गिते

राज्यात नव्याने अस्तित्वात आलेल्या शिवसेना-राष्ट्रवादी काँग्रेस व काँग्रेस महाविकास आघाडीने सत्ता स्थापन केली आहे.हीच परिस्थिती नाशिक जिल्हा परिषदेतही राहणार का? याबाबतच्या चर्चेला उधाण आले आहे.तसे पाहता पूर्वापार चालत आलेली शिवसेना-भाजपा युतीला नाशिक जिल्हा परिषदेत बहुमत होते. मात्र,मागील वेळी अध्यक्षपदाच्या निवडणुकीत शिवसेनेने काँग्रेसला बरोबर घेत भाजपला सत्तेपासून दूर ठेवत कात्रजचा घाट दाखविला होता.मात्र,सभापती निवडीच्यावेळी भाजपने राष्ट्रवादी काँग्रेसशी हातमिळवणी करत त्याचे उट्टे काढले होते.या दोघांनाही फुटीर काँग्रेसच्या सदस्यांची साथ मिळाल्याने चारही सभापतीपदावर या तीन पक्षांना वर्चस्व स्थापन करता आले होते.आता राज्यात नवीन राजकिय समीकरण उदयास आल्याने शिवसेनेचा अध्यक्ष आणि राष्ट्रवादी काँग्रेसचा उपाध्यक्ष होऊ शकतो.मात्र,शिवसेना आणि राष्ट्रवादी काँग्रेसचाच बहुमताचा आकडा पार होणार असल्याने काँग्रेसला सत्तेत वाटा मिळणार की नाही? याबाबतही साशंकता व्यक्त होत आहे.

राज्याच्या राजकारणात नवी अघाडी उदयास आली असली तरी नाशिक जिल्हा परिषदेत मात्र यापूर्वी म्हणजेच ऑक्टोबर २०१७ मध्येच अशा आघाडीतून जिल्हा परिषदेत अध्यक्ष शिवसेनेचा तर उपाध्यक्ष काँग्रेसचा अपक्षांच्या पाठींब्यावर झालेला आहे.राज्यामध्ये युती असताना त्यावेळी जिल्हा परिषदेतही शिवसेनेचा अध्यक्ष तर काँग्रेसचे उपाध्यक्ष पद असे राजकीय गणित जुळवण्यात आले होते.मात्र,याचे उट्टे सत्तेपासून कोसो दूर राहिलेल्या भाजप व राष्ट्रवादी काँग्रेसने एकत्र काढली अन चारही सभापती पदे मिळवली होती.त्यावेळी त्यांना फुटीर काँग्रेसच्या सदस्यांचीही साथ मिळाल्यानेच हे शक्य झाले होते.

आता लवकरच अध्यक्षपदासाठी निवडणूक होणार आहे.जानेवारीमध्ये होणार्‍या अध्यक्ष,उपाध्यक्ष निवडणुकीसाठी आता नव्याने जुळून येणारे समीकरण लक्षात घेतले तर जिल्हा परिषदेवरही महाविकास आघाडीचे वर्चस्व राहणार हे निश्चित झाले आहे.या महाविकास आघाडीतून अध्यक्षपदही अर्थातच शिवसेनेकडे(सर्वाधिक सदस्य संख्या असल्याने) जाणार आहे.राष्ट्रवादी काँग्रेसकडे त्याखालोखाल सदस्य संख्या असून त्यांना उपाध्यक्षपद मिळण्याची शक्यता आहे.शिवसेना आणि राष्ट्रवादी काँग्रेस या दोघांचा मिळूनच बहुमताचा आकडा पार होत असल्याने त्यांना काँग्रेसचीही गरज राहणार नाही.मात्र,राज्यात नव्याने उदयास आलेल्या महाआघाडीचा येथेही प्रयोग झाल्यास त्यांना काँग्रेसलाही नाही म्हटले तरी एखादे पद देणे क्रमप्राप्त होणार आहे.

राज्यात झालेली अघाडी म्हणजे तीन चाकाची गाडी अशी टिप्पणी विरोधकांकडून व्यक्त होत आहे.मात्र,अशा परस्परविरोधी विचारांची आघाडी यशस्वी होऊ शकते आणि कार्यकाळ देखील पूर्ण करू शकते,हे नाशिक जिल्हा परिषदेने दाखवून दिले आहे.त्यामुळे आगामी अध्यक्षपदाच्या निवडणुकीमध्ये शिवसेना राष्ट्रवादी काँग्रेस आणि काँग्रेस हे तीनही पक्ष महाराष्ट्र विकास आघाडीचा झेंडा फडकवतील,अशी परिस्थिती आहे.

जिल्हा परिषदेमध्ये सदस्यांची संख्या ७३असून शिवसेनेकडे २५,भाजप १५,राष्ट्रवादी काँग्रेस१९,काँग्रेस ८ आणि अपक्ष तीन असे बलाबल आहे. मात्र,लोकसभा आणि विधानसभा निवडणुकीमध्ये चार जिल्हा परिषद सदस्यांनी निवडणूक लढविल्याने चार जागा रिक्त झाल्या आहेत.त्यामुळे सद्यस्थितीत शिवसेनेकडे २४,भाजपाकडे १५,राष्ट्रवादी काँग्रेस १६,काँग्रेस ८ तर अपक्ष ३ असे बलाबल आहे.त्यामुळे ७३ वरून ही सदस्यसंख्या ६९ वर आली आहे.यामुळे रिक्त झालेल्या चार जागांपैकी तीन जागांवर पोटनिवडणूक होत आहे.अध्यक्ष,उपाध्यक्षपदाची निवडणूक अद्याप शासनाने जाहीर केलेली नाही.त्यामुळे पोट निवडणुकीतुन विजयी होणारे तीनही सदस्यांना अध्यक्षपदाच्या निवडणुकीत आपला मतदानाचा हक्क बजावता येणार आहे.

राज्यातील महाअघाडीचे समीकरण जिल्ह्यातही जुळून आले तर सध्याचे संख्याबळ पाहता शिवसेनेकडे २४ सदस्य संख्या असल्याने त्यांचा अध्यक्ष पदावर दावा राहणार आहे.असे झाल्यास राष्ट्रवादीकडे सोळा सदस्य असल्याने उपाध्यक्षपद जाऊ शकते.मात्र,असे समीकरण नव्याने जुळवून घेताना राष्ट्रवादी काँग्रेसने शिवसेनेकडे अध्यक्षपदाचा आग्रह धरल्यास त्यात नवल वाटायला नको.कारण आतापासूनच राष्ट्रवादी काँग्रेसचे काही शिलेदारांची भूमिका अध्यक्षपद मिळविण्यासाठी सुरू झाल्याचे चित्र आहे. पूर्वीच्या पारंपारीक युतीतील शिवसेनेचा सहकारी असलेल्या भाजपकडे सध्या पंधरा सदस्य संख्या असून त्यांच्याकडून बहुमतासाठी ३७ हा जादुई आकडा जुळविणे अशक्य होणार आहे.फोडाफोडीच्या राजकारणात भाजपच्या हाती काही लागणार का?हे पाहणेही औत्सुक्याचे ठरणार आहे.

हे आहेत इच्छुक
जिल्हा परिषदेचे अध्यक्षपद हे खुल्या प्रवर्गासाठी असल्यामुळे या पदावर विराजमान होण्यासाठी इच्छुकांची संख्याही मोठ्या प्रमाणात वाढली आहे. प्रत्येक राजकीय पक्षाकडून मोर्चेबांधणीला तशी सुरुवातही झाली असून अनेक जण अध्यक्षपद,उपाध्यक्ष पदासह सभापतीपदासाठी गुडघ्याला बाशिंग बांधून बसले आहेत.अध्यक्षपदी विराजमान होण्यासाठी शिवसेनेकडून विद्यमान अध्यक्षा शीतल सांगळे,बाळासाहेब क्षीरसागर ,दिपक शिरसाट,सुरेखा दराडे,सुनीता पवार,निलेश केदार राष्ट्रवादी काँग्रेसकडून संजय बनकर ,मंदाकिनी बनकर,महेंद्रकुमार काले,किरण थोरे भाजपाच्या मनिषा पवार अशी नावे चर्चेतून पुढे केली जात आहेत.

नाशिक । प्रतिनिधी

जिल्हा परिषदेच्या महिला व बालकल्याण विभाग अंतर्गत विदर्भातील जिल्हा परिषदांना भेट देऊन त्यांच्या कामकाजाची पद्धत जाणून घेण्यासाठी महिला व बालकल्याण समितेचा नियोजित अभ्यास दौरा रद्द करण्याचा निर्णय समितीने घेतला आहे.या अभ्यास दौर्‍यासाठी तरतूद करण्यात आलेल्या पाच लाखांचा निधी जिल्ह्यातील संकटग्रस्त शेतकर्‍यांना दिला जाणार आहे. हा निधी मुख्यमंत्री सहायता निधीमध्ये लवकरच जमा करण्यात येणार असल्याची माहिती महिला व बालकल्याण सभापती अर्पणा खोसकर यांनी दिली.

जिल्ह्यामध्ये अवकाळी पावसाने मोठ्या प्रमाणात थैमान घातले आहे.यामुळे बळीराजा उध्वस्त झालेला आहे नुकसानग्रस्त शेतीमालाचे पाहणी करण्यासाठी राष्ट्रीय व राज्यस्तरीय नेत्यांनी जिल्ह्यात विविध ठिकाणी भेटी देऊन पाहणी केली. यामध्ये राष्ट्रवादी काँग्रेसचे अध्यक्ष शरद पवार, माजी कृषिमंत्री सदाभाऊ खोत,माजी पालकमंत्री गिरीश महाजन,आमदार आदित्य ठाकरे यांचा समावेश आहे.शरद पवार यांनी पंतप्रधान नरेंद्र मोदी यांना याबाबत दिलेल्या निवेदनात नाशिक जिल्ह्याचा आवर्जून उल्लेख केला होता.

नाशिक जिल्ह्यात अवकाळीच्या काळात जिल्ह्यात सहा शेतकर्‍यांनी आत्महत्या केल्याची बाब यातून पुढे आली होती.त्यामुळे अवकाळी पावसाने शेतकरी हवालदिल झालेला असताना दुसरीकडे अभ्यास दौर्‍यावर निधी खर्च करणे संयुक्तिक नाही,असे सांगत सभापती खोसकर यांनी हा दौरा रद्द करण्याचा निर्णय घेतला आहे. महिला व बालकल्याण समिती विदर्भामध्ये अमरावती,वर्धा,नागपूर,गोंदिया,भंडारा जिल्हा परिषदांना भेटी देण्याचे नियोजन होते. समितीच्या अभ्यास दौर्‍यासाठी जिल्हा परिषदेच्या वार्षिक अंदाजपत्रकामध्ये पाच लाख रुपयांची तरतूदही करण्यात आलेली आहे.मात्र,हा दौरा रद्द करण्याचा निर्णय समितीच्या बैठकीत घेण्यात आला आहे.

या दौर्‍यातील निधी संकटग्रस्त शेतकर्‍यांना देण्याचा निर्णय बैठकीत घेण्यात आला आहे.मुख्यमंत्री सहाय्यता निधी वर्ग करून जिल्ह्यातील शेतकर्‍यांना,आत्महत्याग्रस्त कुटुंबांना आर्थिक मदत करण्याची शिफारस समितीच्या सभासदांनी सभापतींकडे केली.त्यानुसार हा निर्णय घेतला असल्याची माहिती सभापती खोसकर यांनी दिली.

नाशिक जिल्ह्यामध्ये अतिवृष्टी झाल्यामुळे शेतकरी मोठ्या प्रमाणात अडचणीत आहेत.अशा वेळी त्यांना मदत करण्याची आवश्यकता आहे. त्यामुळे महिला व बालकल्याण समितीने अभ्यास दौरा रद्द करत हा निधी शेतकर्‍यांना देण्याचा निर्णय घेतला आहे.याबाबत आपण मुख्यमंत्री उद्धव ठाकरे यांची लवकरच बैठक घेणार आहे.यामध्ये फरक केलेला पाच लाखांचा धनादेश मुख्यमंत्री सहाय्यता निधीसाठी दिला जाणार आहे. अर्पणा खोसकर; सभापती महिला व बालकल्याण,जि.प.

 दिंडोरी । प्रतिनिधी

‘ जिल्ह्यात सर्व सहकारी साखर कारखाने बंद पडले असताना कादवाची परिस्थितीही बंद होंण्यासारखची होती. परंतु कादवाचे विद्यमान संचालक मंडळाने अत्यंत प्रतिकूल परिस्थितीत काटकसर, नियोजन व पारदर्शी कारभार करत कारखाना सुस्थितीत सुरू ठेवला असून कादवा यावर्षी अधिक कार्यक्षमतेने गाळप करणार आहे. कोणतेही उपपदार्थ निर्मिती नसताना उसाला सर्वाधिक भाव दिला असून यावर्षीही उत्तर महाराष्ट्रात सर्वाधिक उसाचा भाव (एफआरपी) कादवाची राहणार आहे’,असे आश्वासन कादवा कारखान्याचे चेअरमन श्रीराम शेटे यांनी केले.कादवा सहकारी साखर कारखान्याचे ४३ व्या गळीत हंगामाचा शुभारंभप्रसंगी श्रीराम शेटे बोलत होते कार्यक्रमाच्या अध्यक्षस्थानी कादवाचे माजी चेअरमन अ‍ॅड.बाजीराव कावळे होते.

पुढे बोलताना श्रीराम शेटे यांनी गेल्या बारा वर्षातील कादवाची वाटचाल विशद केली.‘ज्यावेळी सभासदांनी कारखान्याची सत्ता दिली त्यावेळी कादवा प्रचंड मोठ्या आर्थिक अडचणीत होता.मोठी देणी बाकी होती कर्ज थकलेले होते. एकुण किमंत उणे झालेली होती.त्यामुळे कोणतीच बँक कर्ज देत नव्हती .त्यामुळे कारखाना सुरू होईल की नाही याबाबत शंका होती. मात्र अनेक सभासदांनी दोन-तीन कोटी निधी उपलब्ध करून दिला. त्यामुळे कारखाना सुरू झाला.संचालक मंडळाने पारदर्शी कारभार करत योग्य नियोजन व काटकसर करत कादवा अडचणीतून बाहेर काढला असून त्यावेळचे नेटवर्थ उणे ४७७.२८ लाख होते. त्या परिस्थितीवर मात करत आजच्या परिस्थितीत नेटवर्थ अधिक १८६२.३१ लाख झाले असून, म्हणजेच त्यात २३३९.५९ लाखाने वाढ झाली आहे .त्यामुळे तोटाही भरून निघालेला आहे.

कादवाला लेखा परीक्षणात ‘अ’ वर्ग मिळाला आहे. कारखान्याची यत्रणा ५० वर्ष जुनी व पूर्णपणे कालबाह्य झाल्याने विविध यंत्रणा बदलताना त्या १२५० क्षमतेच्या न टाकता दूरदृष्टीचा विचार करून अधिक क्षमतेच्या व अत्याधुनिक टाकल्या आहे. त्यामुळे गाळप कार्यक्षमता वाढली आहे. सर्वाधिक भाव व वेळेवर पैसे अदा होत असल्याने ऊस उत्पादकांची पसंती कादवाला आहे, मात्र कमी गाळप क्षमता असल्याने गाळप मर्यादा येत होत्या. त्यामुळेच नव्याने मिल बॉयलर,टर्बाईन,ग्रेडर आदी विविध मशिनरी बदललेल्या असल्याने गाळप क्षमता वाढणार आहे. यंदा चांगला पाऊस झालेला असल्याने अधिक ऊस लागवड करणे शक्य असून जास्तीत जास्त ऊस लागवड करावी ,’असे आवाहन चेअरमन श्रीराम शेटे यांनी केले.

यावेळी संपतराव शिवराम घडवजे, नरेश भास्करराव देशमुख, भिकनराव गोपाळराव देशमुख, कैलास भगवंत पाटील, विनायक मुरलीधर बर्डे यांंच्या हस्ते सपत्नीक गव्हाण पूजन झाले.जिल्हा बँक संचालक गणपतराव पाटील यांच्या हस्ते नवीन मिलचे पूजन करण्यात आले.मान्यवरांचे हस्ते गव्हाणीत उसाची मोळी टाकण्यात आली.यावेळी माजी चेअरमन अ‍ॅड.बाजीराव कावळे, उपाध्यक्ष उत्तमबाबा भालेराव, साहेबराव पाटील,संचालक बाळासाहेब जाधव आदींची भाषणे झाली.

यावेळी मविप्रचे संचालक दत्तात्रय पाटील, सदाशिव शेळके, रा.कॉ. तालुकाध्यक्ष भास्कर भगरे, बाजार समितीचे उपसभापती अनिल देशमुख, विलास कड, विश्वास राव देशमुख, संजय पडोळ, मधुकर गटकळ, त्र्यंबक संधान, दिनकर जाधव, विश्वनाथ देशमुख, बापू पडोळ, सुभाष शिंदे, सुनील केदार, संदीप शार्दूल, शांताबाई पिंगळ, चंद्रकला घडवजे, कामगार संचालक सुनील कावळे, संपतराव पाटील, संपतराव कोंड, विलासराव वाळके, बबनराव देशमुख, अशोक वाघ, राजेंद्र ढगे, शांताराम बार्‍हाते, सुनील पाटील, कचरु पाटील, डॉ.योगेश गोसावी, शाम हिरे, सुनिल शेटे, तौसिफ मनियार आदीसह सर्व संचालक, सभासद, अधिकारी, कामगार मोठ्या संख्येने उपस्थित होते. प्रास्तविक संचालक शहाजी सोमवंशी यांनी तर सूत्रसंचालन प्रा.लक्ष्मण महाडिक यांनी केले.

गुरुकडून शिष्याला शाबासकीची थाप
कादवाचे माजी चेअरमन अ‍ॅड.बाजीराव कावळे हे विद्यमान चेअरमन श्रीराम शेटे यांचे राजकीय गुरू असून अनेक वर्षानंतर अ‍ॅड.बाजीराव कावळे हे कारखान्याचे गळीत हंगाम शुभारंभास आले होते. यावेळी बोलताना त्यांनी कारखान्याचे प्रगतीबद्दल समाधान व्यक्त करताना आपण गेली चार पाच वर्षांपासून अहवाल बघत नाही. कारण आपल्या शिष्याने कारखाना अत्यंत सुस्थितीत सुरू ठेवला असून त्यांचेवर विश्वास आहे. कारखाना दिमाखात सुरू आहे याचा आनंद होत असल्याचे सांगत श्रीराम शेटे यांच्यासह संचालक मंडळाच्या कामकाजाचे कौतुक केले.

नाशिक ।प्रतिनिधी

शहरातील प्रवाशांकडून मीटरनुसार भाडे आकारणी न करणार्‍या २०० रिक्षाचालकांवर प्रादेशिक परिवहन विभागाकडून पहिल्याच दिवसापासून कारवाई करण्यात आली. आरटीओच्या एका पथकाद्वारे २०० रिक्षा तपासण्यात आल्या. त्यापैकी २९ रिक्षांवर दंडात्मक कारवाई करण्यात आल्याचे प्रादेशिक परिवहन आधिकारी भरत कळसकर यांनी सांगितले.

ठराविक रिक्षा चालकांकडून मनमानी व रिक्षा चालकांचा बेशिस्तपणा यामाध्यमातून सुरू असलेली भाडे आकारणीची दखल पोलिस आणि प्रादेशिक परिवहन विभागाने (आरटीओे) घेतली आहे. शहरात आता नव्याने मीटरप्रमाणे प्रवासी वाहतुकीचा आग्रह पोलिस प्रशासनाकडून धरण्यात आला. पोलिसांपाठोपाठ आता प्रादेशिक परिवहन विभागही बेशिस्त रिक्षाचालकांवर कारवाईसाठी रस्त्यावर उतरला आहे. रविवारी सुटीच्या दिवशीही दोन पथके शहरातील काही मार्गांवर कारवाईसाठी उतरविण्यात आली.

या पथकांनी दिवसभरात सुमारे २०० रिक्षांची तपासणी केली असून त्यामध्ये २९ रिक्षाचालक नियमबाह्य पध्दतीने प्रवासी वाहतूक करीत असल्याचे आढळून आले आहे. त्यामध्ये ठरलेल्या मार्गांवर मीटरप्रमाणे तसेच शेअर पध्दतीने प्रवासी वाहतूक होत नसल्याचे आढळून आले. अशा रिक्षा चालकांवर दंडात्मक कारवाई करण्यात आल्याची माहिती उपप्रादेशिक परिवहन आधिकारी विनय आहिरे यांनी दिली. ही कारवाई सुरूच राहणार असल्याचे स्पष्ट करण्यात आले आहे. दरम्यान, प्रादेशिक परिवहन विभागाने या संदर्भात रविवारी नाशिकरोड बसस्थानकाजवळ रिक्षाचालकांना मार्गदर्शन आंणि आवाहन केले.