नऊ जणांविरुद्ध गुन्हा; आरोपींच्या नातेवाईकांकडून युवकाच्या आईला दमबाजी

संगमनेर (प्रतिनिधी) – मोबाईलवरून वाईट शिवीगाळ करू नको, असे म्हणाल्याचा राग येऊन नऊ जणांनी एका जणास संगमनेरातून चारचाकी वाहनात घालून उचलले. ते थेट पिंपळवंडी व जुन्नर येथे नेऊन विजेच्या खांबाला बांधून त्यास बेदम मारहाण केल्याची घटना घडली. या प्रकरणी जुन्नर पोलीस ठाण्यात नऊ जणांविरुद्ध अपहरणाचा गुन्हा दाखल करण्यात आला असून हा गुन्हा संगमनेर शहर पोलिसांकडे वर्ग करण्यात आला आहे. तर याच प्रकरणातील आरोपींच्या नातेवाईकांनी अपहरण केलेल्या युवकाच्या आईला दमबाजी केल्याने दोघांविरुद्ध शहर पोलीस ठाण्यात गुन्हा दाखल झाला आहे.

अखलाक असिफ शेख (वय 24, रा. कुरण, ता. संगमनेर) हा घरी असताना त्याच्या भावाच्या मोबाईलवर इमरान कुरेशी हा भावाला शिवीगाळ करत होता. तेव्हा अखलाक याने सदर मोबाईल भावाकडून घेतला व इमरान कुरेशी यास शिवीगाळ का करतो अशी विचारणा केली. याचा इमरान कुरेशी याला राग आला. दरम्यान अखलाक शेख हा रात्री 10 वाजेच्या सुमारास संगमनेर नाटकी येथे रोडवर गॅरेजसमोर उभा होता. त्यावेळी फयाज कुरेशी व इमरान कुरेशी (रा. कसाईवाडा, जुन्नर) हे दोघे तेथे आले. त्यांनी मोबाईलवरुन शिवीगाळ का केली असे विचारत अखलाक शेख याची गचांडी पकडून त्याला मारुती इरटिका चारचाकी वाहनात टाकले. वाहनात अगोदरच कसाईवाडा येथे राहणारे अयाज कुरेशी, मुजाहिद कुरेशी, महम्मद गौस, सादिक गफुर कुरेशी हे बसलेले होते.

त्यावेळी त्यांनी अखलाक शेख यास शिवीगाळ करुन हाताने मारहाण केली व वाहन पुण्याच्या दिशेने सुरु केले. अखलाक शेख याच्या खिशातील 15 हजार रुपये रोख रक्कम व मोबाईल देखील त्यांनी काढून घेतला. पिंपळवंडी येथे पुलावर येऊन आयाज कुरेशी व इमरान कुरेशी यांनी अखलाक यास वाहनातून खाली उतरवून पुलावर नदी पात्रात लटकवून पुन्हा वर घेऊन हाताने मारहाण केली. त्यानंतर त्यांनी पुन्हा वाहनात टाकले व त्याच्यावर पेट्रोल टाकून जाळून टाकू असे म्हणत जुन्नर येथे नेले. तेथे कसाईवाडा येथे विजेच्या खांबाला अकलाख यास जनावरांच्या दोराने बांधले व इमरान कुरेशी, फयाज कुरेशी, इसराल बेपारी, सादीक गफृर बेपारी, शादाफ कुरेशी, अयाज कुरेशी, मुजाहिद कुरेशी, महम्मद गौस, सादिक गफूर कुरेशी व इतरांनी लाकडी दांड्याने बेदम मारहाण केली.

याबाबत अखलाक असिफ शेख याने जुन्नर पोलीस ठाण्यात फिर्याद दिली. त्यानुसार पोलिसांनी वरील 9 जणांविरुद्ध भारतीय दंड संहिता 367, 327, 341, 324, 143, 147, 149 प्रमाणे दाखल केला आहे. दरम्यान अखलाक शेख याचे संगमनेरातून अपहरण केल्याने सदर गुन्हा शून्यने संगमनेर शहर पोलीस ठाण्यात वर्ग करण्यात आला आला असून 641/19 प्रमाणे दाखल झाला आहे.

दरम्यान याप्रकरणातील फिर्यादी अखलाक शेख याची आई निलोफर आसिफ शेख (रा. कुरण, ता. संगमनेर) हिला गुलजार पठाण (जुन्नर), अजीज कुरेशी (जुन्नर) यांनी संगमनेरला येऊन धमकावले. तुझ्या मुलाला फिर्याद मागे घ्यायला लाव नाहीतर तुझ्या मुलांना महागात जाईल, नाहीतर त्यांना परत उचलून घेऊन जाऊ, अशी धमकी दिली. याबाबत निलोफर शेख हिने संगमनेर शहर पोलीस ठाण्यात फिर्याद दिली असून त्यानुसार पोलिसांनी वरील दोघांविरुद्ध गुन्हा दाखल केला आहे. अधिक तपास पोलीस निरीक्षक अभय परमार यांच्या मार्गदर्शनाखाली सुरू आहे.

राहाता (तालुका प्रतिनिधी)- राहाता शहरातील कुंदन लॉनमध्ये लग्न समारंभातून 17 तोळे सोने व 10 हजार रोख असा सात लाख रूपये किमतीचा ऐवज असलेली पर्स अज्ञात चोरट्याने पळविली. याप्रकरणी राहाता पोलीस ठाण्यात अज्ञात चोरट्याविरुध्द चोरीचा गुन्हा दाखल करण्यात आला आहे.

ही घटना गुरुवारी रात्री 7.30 वाजेच्या सुमारास राहाता येथील कुंदन लॉन्समध्ये घडली. श्रीरामपूर येथील उद्योजक मुळे यांच्या कुटुंबातील विवाहासाठी डॉ. मंजुषा नरेंद्र कुलकर्णी, नंदिग्राम कॉलिनी, औरंगाबाद या आल्या होत्या. त्या विवाहस्थळी खुर्चीवर बसल्या होत्या. त्यांच्या बहीणीने ग्रे रंगाची पर्स त्यांच्याकडे सांभाळण्यासाठी दिली होती. त्यांनी ती शेजारील मोकळ्या खुर्चीवर हातातील पर्स ठेवली व नातेवाईकांशी बोलत असताना कोणीतरी अज्ञात चोरट्याने त्यांची नजर चुकवून ती पर्स पळवून नेली.

या पर्समध्ये दोन राणी हार व दोन कानातले जोड वजन साडेतीन तोळे, साखळी मनी व पदक वजन 7 तोळे, नेकलेस, चार बांगड्या, दोन अंगठ्या, एक ब्रासलेट, सॅमसन कंपनीचे दोन मोबाईल, एटीएम, पावर बँक, असे सर्व साहीत्य 17 तोळे सोने व 10 हजार रूपये रोख असा सुमारे सात लाख रुपये किमतीचा मुद्देमाल अज्ञात चोरट्यांनी चोरून नेला.

याप्रकरणी डॉ. मंजुषा कुलकर्णी यांनी राहाता पोलीस ठाण्यात फिर्याद दिली असून राहाता पोलिसांनी अज्ञात चोरट्याविरुध्द चोरीचा गुन्हा दाखल केला आहे. कुंदन लॉन्समधील सीसीटीव्हीचे फुटेज पाहिले असता एक संशयित तरुण हातात पर्स घेऊन जाताना दिसत आहे. गेल्या अनेक दिवसांपासून राहाता शहरातील मंगल कार्यालयात अशा चोरीच्या अनेक घटना घडल्या तसेच बाहेर गर्दीत गंठन चोरीच्या घटनाही घडल्या होत्या. त्या अनेक गुन्ह्यांचा तपास प्रलंबित आहे.

कर्जत (तालुका प्रतिनिधी) – कुकडी प्रकल्पासाठी तालुक्यातील अनेक गावांतील शेतकर्‍यांच्या जमिनी शासनाकडून संपादित करण्यात आल्या होत्या. मात्र त्याचा मोबदला अद्याप शेतकर्‍यांना मिळालेला नव्हता. आमदार रोहित पवार यांनी शासन दरबारी वेळोवेळी पाठपुरावा करून सुमारे 54 गावांच्या भू-संपादन मोबदल्यासाठी प्रयत्न केले.

सध्या तालुक्यातील जळकेवाडी, राशीन, येसवडी, धालवडी, बारडगाव दगडी, तळवडी अशा एकूण 6 गावांचा भूसंपादन मोबदला मंजूर झाला असून उर्वरीत गावांनाही हा मोबदला मिळण्यासाठी आमदार पवार यांच्याकडून पाठपुरावा सुरूच आहे. मंजूर झालेल्या 6 गावांना सुमारे 26 कोटी रुपयांचा मोबदला मिळणार आहे. पहिल्या टप्प्यात जळकेवाडी गावातील 62 लाभार्थीना 6 कोटी 85 लाखांचा मोबदला प्रातिनिधिक स्वरूपात वाटपाचे पत्र व धनादेश देऊन वाटप करण्यात येणार आहे. शासनाकडून जसजशी खरेदी होईल तशी ही खरेदी झालेल्या भूखंडाची रक्कम कोळवडी भूसंपादन विभागाकडे जमा होत आहे.त्यानुसार हे वाटप करण्यात येणार आहे.

कर्जत-जामखेड मतदारसंघाचे आमदार रोहित पवार, कुकडी प्रकल्पाचे अधीक्षक अभियंता धुमाळ, कार्यकारी अभियंता जगताप व स्थानिक पदाधिकारी व उर्वरित भू संपादनाच्या 53 गावांच्या प्रतिनिधींच्या उपस्थितीत आज सकाळी 10 वाजता जळकेवाडी येथे भू संपादन मोबदल्याचे वाटप करण्यात येणार आहे.
कित्येक वर्षांपासून प्रलंबित असलेल्या भू संपादनाच्या प्रश्नावर आमदार रोहित पवार यांनी अनेक वेळा शासन दरबारी पाठपुरावा करत संबंधित वरिष्ठ अधिकारी यांच्याशी कायम समन्वय साधत होते.अनेक गावांतील शेतकर्‍यांच्या संपादित झालेल्या जमिनींचा टप्प्याटप्प्याने मोबदला मिळणार असून कुकडीच्या पाणी वाटपासंदर्भातही आमदार पवार यांनी वेळोवेळी लक्ष घातले आहे. शेतकर्‍यांना हक्काचे पाणी मिळावे, भु-संपादनाचा मोबदला मिळावा यासाठी कायम प्रयत्न केले आहेत.

कुकडीच्या पाण्याबाबत नियोजन बैठक
भू संपादन मोबदला वाटपानंतर आमदार रोहित पवार यांच्या वतीने कोळवडी येथे सकाळी 11 ते दुपारी 2 या वेळेत कुकडीच्या पाण्यासंदर्भात नियोजन बैठक होणार आहे. त्यानंतर सीना धरणावरील 21 गावांच्या पाणी नियोजनाबाबतची बैठक सीना धरणाच्या विश्रामगृहात सायंकाळी 6 वाजता आमदार पवार यांच्या उपस्थितीत पार पडणार असून ते ग्रामस्थांशी चर्चा करणार आहेत.

आरोपी मूळ नेवासा तालुक्यातील तळेवाडीचा

नाशिक – पैसे कमावण्यासाठी एका भामट्याने बनावट नावाने जीवनसाथी डॉट कॉम आणि मॅट्रिमनी डॉट कॉम या संकेतस्थळांच्या माध्यमातून घटस्फोटित, विधवा आणि विवाहेच्छूक अशा तब्बल 52 महिलांना लग्नाचे आमिष दाखवून त्यांच्याकडून लाखो रुपयांचा गंडा घालणार्‍या ठकास गुरुवारी (दि.5) रात्री अटक करण्यात आली. नाशिकमध्ये महिलेला भेटण्यास आलेल्या या भामट्याला खुद्द पीडित महिला, छत्रपती सेना आणि नाशिक पोलिसांनी सापळा रचून अटक केली. संपत चांगदेव दरवडे ऊर्फ मनोज पाटील ऊर्फ मयूर पाटील (34, मूळ रा. तळेवाडी, ता. नेवासा, जि. अहमदनगर, सध्या रा. मुहम्मदवाडी, हडपसर, पुणे) असे अटक झालेल्याचे नाव आहे.

पोलिसांच्या माहितीनुसार, संपत दरवडे याचा 2014 मध्ये आरती बरोबर विवाह झाला होता. मात्र विवाहानंतर सात महिन्यांत त्याच्या पत्नीचा मृत्यू झाला. त्यावेळी त्याच्यावर 13 लाखांचे कर्ज होते. यादरम्यान 2015 मध्ये नागपूर येथे राहणारी व पुण्यात काम करणार्‍या घटस्फोटित महिलेशी त्याची ओळख झाली त्यातून त्यांची जवळीक निर्माण झाली व तिच्यासोबत लग्न केल्यास त्याला आर्थिक मदत देऊन आर्थिक अडचण दूर करण्याचे आश्वासन तिने दिले. त्याला पन्नास हजार रुपयाची मदत केली.

याच प्रकारातून त्याने पैसे कमवण्याची नामी युक्ती शोधून काढली. घटस्फोटीत महिला, विधवा महिला व विवाहित महिलांना हेरून त्यांची जवळीक साधून त्यांना लग्नाचे आमिष दाखवून त्यांच्याकडून आर्थिक लाभ मिळवण्याचा त्याने सपाटाच लावला होता. घटस्फोटित महिला, विधवा आणि विवाहेच्छूक महिलांना हेरून त्यांच्याशी जवळीक साधून त्यांना लग्नाचे आमिष दाखवून त्यांच्याकडून लाखो रुपये उकळत फसवणूक केली.

तो नाशिकमध्ये घटस्फोटित महिलेला भेटण्यास येणार असल्याची माहिती पीडित महिलेकडून छत्रपती सेना आणि काही पीडित महिलांना मिळाली होती. त्यानुसार नागपूर, पुणे, सिंधुदुर्ग येथील पीडित महिला गुरुवारी (दि.5) नाशिकमध्ये दाखल झाल्या. त्यांच्यासह छत्रपती सेनेचे कार्यकर्ते आणि पोलिसांनी भामट्याला पंचवटी कारंजा येथील मानस हॉटेलमधून अटक केली. त्याच्यावर पंचवटी पोलीस ठाण्यात गुन्हा दाखल करण्यात आला आहे.

गणोरे (वार्ताहर) – अकोले तालुक्यातील मतदान केंद्रावर बी. एल. ओ. म्हणून काम करणार्‍या शिक्षकांनी इ. व्ही. पी. पी. द्वारे करावयाच्या कामावर बहिष्कार टाकला आहे. या संदर्भातले निवेदन राज्य निवडणूक आयोगाला पाठविण्यात आले असून, त्याची प्रत तालुका तहसीलदार यांनाही देण्यात आली आहे.
भारतीय निवडणूक आयोगाच्या वेळोवेळी दिल्या जाणार्‍या आदेशाने काम करणारे स्थानिक मतदान केंद्रावरील बीएलओ यांना नव्याने इव्हीपीद्वारे काम करण्यासाठी आदेशित करण्यात आले होते. या संदर्भाने तालुक्यातील सर्व बी. एल .ओ. प्रतिनिधी यांनी एकत्र येऊन यासंदर्भात निवेदन तहसीलदार यांना दिले आहे.

दिलेल्या निवेदनात म्हटले आहे, की सदरची कामे करताना शिक्षकांना विद्यार्थ्यांपासून बराच काळ बाहेर राहावे लागते. त्यामुळे अध्ययन-अध्यापन प्रक्रियेवर त्याचा विपरीत परिणाम होत असतो. तर अनेकदा सकाळपासून तर रात्री उशिरापर्यंत ही कामे सातत्याने करावे लागतात. त्यामुळे त्यांना मानसिक त्रास सहन करावा लागतो. तीन ते चार महिने या कामासाठी शिक्षकांना बाहेर राहवे लागणार असल्याने विद्यार्थ्यांचे नुकसान होणार आहे.

ज्या शिक्षकांना ही कामे दिली जाणार आहेत, त्या शिक्षकांना शिक्षकांच्या जागेवर काम करण्यासाठी अतिरिक्त मनुष्यबळ पुरविण्यात यावे. तसेच सदरचे काम प द्वारे करावयाचे असल्यामुळे संबंधित कर्मचार्‍यांना निवडणूक आयोगाच्या वतीने मोबाईल पुरविण्यात यावा. मोबाईल डेटा उपलब्ध करून द्यावा. तसेच अकोले तालुका अत्यंत दुर्गम व डोंगराळ असल्याने अनेक ठिकाणी नेटवर्क उपलब्ध नाही त्याचाही परिणाम कर्मचार्‍यांना सोसावा लागणार आहे.

मतदान केंद्रावरती बीएलओ म्हणून काम करताना शिक्षकांना मोठ्या प्रमाणावर समस्यांना सामोरे जावे लागत आहे, असे असताना एक राष्ट्रीय काम म्हणून शिक्षक हे काम प्रामाणिकपणे करत आहे. अशा परिस्थितीत ई.व्ही.पी. हे काम करताना मोबाईल द्वारे करावे लागणार आहे. या मतदारांना देण्यात आलेल्या मतदार ओळखपत्राचा क्रमांक पडताळणी करण्यात येणार आहे. तसेच त्याचे निवासस्थान हेदेखील पडताळणी होणार आहे. अशा परिस्थितीत नागरिक ज्या ठिकाणी राहतात.

तिथे नेटवर्क नसेल, अधिक अंतरावर राहत असल्यास त्या नागरिकांची भेट घेणे कठीण होते. गावाकडे असलेल्या मोठ्या प्रमाणावर मजुरी, कर्मचारी हे आपापल्या कामाला जात असल्यामुळे सदरचे काम हे सकाळी किंवा सायंकाळी अशा स्वरूपात करावे लागणार आहेत. त्यातून अनेक नागरिक बाहेरगावी गेले असतील स्थलांतर झाले असेल तर अशा अनेक समस्या उद्भवतात. त्यामुळे हे काम करताना शिक्षकांच्या नाकी नऊ येणार आहेत.

पहिल्या सत्रामध्ये कामाचे दिवस कमी भरले असतानाच त्यावेळी निवडणूक प्रक्रिया आणि द्वितीय सत्रामध्ये अभ्यासक्रम पूर्ण करण्याच्या दृष्टीने शिक्षकांची होणारी धावपळ शालेय शिक्षण विभागाची असणारे प्रशिक्षण, विविध स्पर्धा लक्षात घेतात शिक्षकांना अध्ययन अध्यापन व मूल्यमापनासाठी कमी कालावधी असल्याने सदरची कामे शिक्षकांच्या माथी मारू नयेत अशाप्रकारची विनंती शिक्षकांच्यावतीने प्राथमिक शिक्षक संजय नवले यांनी केली आहे. तसेच हे काम महिला कर्मचार्‍यांना देण्यात येऊ नये. मुख्याध्यापक पदाचा कार्यभार असणार्‍या शिक्षकांना यातून वगळण्यात यावे.

मागील काळातील बीएलओ असलेल्या कर्मचार्‍यांचे मागील काळातील मानधन राजपाल देण्यात यावे. एक हजारापेक्षा अधिक मतदार असलेल्या केंद्रावर बीएलओ यांना सहायक कर्मचार्‍यांची नियुक्ती करून द्यावी. या कामासाठी ग्रामपंचायत स्तरावर संगणक सुविधा, इंटरनेट व कर्मचारी उपलब्ध असल्याने त्यांच्याकडून काम करून घ्यावे किंवा पर्यायी व्यवस्था करण्यात यावी अशा स्वरूपाची मागणी करण्यात आली आहे. शिक्षकांवर हे काम करण्याची सक्ती केल्यास मागणी केल्याप्रमाणे साधनसुविधा उपलब्ध करून दिली तरच सदरचे काम केले जाईल असेही निवेदनात म्हटले आहे. या निवेदनावर सध्या बीएलओ म्हणून मतदान केंद्रावर नियुक्त असलेल्या महिला व पुरुष कर्मचार्‍यांच्या स्वाक्षर्‍या आहेत.

थकित कर जमा करण्यासाठी महापालिकेने जोर वाढविला

अहमदनगर (प्रतिनिधी) – महापालिकेने आता वसुलीसाठी पोलीस बंदोबस्ताची मागणी केली आहे. तसेच यापूर्वी सील केलेल्या मालमत्तांचा लिलाव करण्याचीही तयारी सुरू केली आहे. दरम्यान, शुक्रवारी दि. 6 रोजी 25 लाखांची वसुली करण्यात आली. यामध्ये कृषी उत्पन्न बाजार समितीचे दहा लाख रुपये आहेत.

जिल्हाधिकारी तथा महापालिकेचे प्रभारी आयुक्त राहुल द्विवेदी यांनी पदभार स्वीकारताच वसुली आणि स्वच्छता अभियानाकडे लक्ष केंद्रीत केले आहे. मालमत्ता कराची जवळपास 285 कोटींची थकबाकी असून, त्यातील अनेक प्रकरणे न्यायालयीन प्रवीष्ठ आहेत. मात्र जे न्यायालयात प्रकरणे नाहीत, मात्र जाणीवपूर्वक संबंधित मालमत्ताधारकाकडून कर जमा केला जात नाही, अशांवर कठोर कारवाई करण्याचे आदेश द्विवेदी यांनी दिले आहेत. यासाठी मालमत्ता जप्त करण्यापासून, संबंधित मालमत्तेचे नळजोड तोडण्याचेही आदेश दिले आहेत.

शिवाय थकबाकीदारांची नावे फ्लेक्सवर झळकविण्याचीही तयारी सुरू आहे. द्विवेदी आज महापालिकेत जवळपास चार तास ठाण मांडून होते. या काळात त्यांनी विभागप्रमुखांना स्वतंत्रपणे बोलावून कामकाजाचा आढावा घेतला. तसेच काही महत्त्वाच्या सूचनाही दिल्या. स्वच्छ सर्वेक्षण अंतर्गत थ्री स्टार मानांकन मिळविण्यासाठी ते रोज पाठपुरावा करत आहेत. आजही त्यांनी याबाबत माहिती घेतली. तसेच सायंकाळी उशीरा जिल्हाधिकारी कार्यालयातही महापालिकेच्या अधिकार्‍यांना बोलावून रोजच्या कामाचा आढावा घेतल्याचे समजते.

मालमत्ता कर वसुलीचे प्रत्येक प्रभाग समित्यांना उद्दिष्ट दिलेले असल्याने सर्वच कर्मचारी आता कामाला लागले आहेत. आज याचाच परिणाम म्हणून 25 लाखांची वसुली झाली. बाजार समितीकडे थकित असलेले दहा लाख रुपये कारवाईचा बडगा उगारताच जमा झाले. यापुढे वसुली मोहीम तीव्र होणार आहे. त्यासाठी पोलीस बंदोबस्ताची मागणीही पोलीस यंत्रणेकडे करण्यात आली आहे. यामध्ये एक अधिकारी आणि आठ पुरूष व आठ महिला कर्मचार्‍यांची मागणी केली आहे.

प्रत्येक प्रभाग समितीमध्ये पोलिसांच्या बंदोबस्तात वसुली मोहीम आणि कारवाई करण्यात येणार आहे. अनेकदा जप्तीची कारवाई करताना महापालिका कर्मचार्‍यांना विरोध केला जातो. काही वेळा शिविगाळ व मारहाणीचेही प्रकार घडतात. तसेच यावेळी केवळ जप्तीवरच न थांबता नळजोड तोडण्याचीही कारवाई होणार असल्याने पोलीस बंदोबस्ताची आवश्यकता असल्याचे अधिकार्‍यांनी सांगितल्याने त्यासाठी द्विवेदी यांनी तयारी दर्शवून पोलीस यंत्रणेकडे तसे पत्र दिले आहे. तसेच यापूर्वी थकबाकी जमा न करणार्‍या मात्र त्यामुळे सील केलेल्या मालमत्तांची थकित रक्कम अदा झालेली नाही. जप्तीची कारवाई करूनही मालमत्ताधारक थकबाकी जमा करत नसल्याने या मालमत्तांचा लिलाव करण्याचा निर्णय झाला आहे. महापालिकेने तशी यादी तयार केली असून, त्याची प्रक्रिया हाती घेतली आहे.

प्लॅस्टिकविरोधी कारवाईवरून वादावादी
महापालिकेने प्लॅस्टिक विरोधी कारवाई जोरदार सुरू केली आहे. गुरूवारी 92 हजार रुपयांचा दंड जमा केल्यानंतर शुक्रवारी दिवसभर ही कारवाई सुरू होती. सायंकाळपर्यंत 26 हजारांचा दंड जमा केला होता. मात्र व्यावसायिक आणि कारवाई करणारे कर्मचारी यांच्यात अनेक ठिकाणी खटके उडत होते. कोणत्या प्लॅस्टिकला परवानगी आहे, कोणत्या नाही, हे वादाचे कारण होते. त्या संदर्भातील तक्रारीही महापालिकेच्या वरिष्ठ अधिकार्‍यांकडे येत होत्या. मात्र कारवाई सुरूच ठेवण्यात आल्याने प्लॅस्टिकचा वापर करणार्‍या व्यावसायिकांना दंड भरण्याशिवाय पर्याय राहिला नाही.