मुंबई | Mumbai
मुंबई-गोवा महामार्गावर (Mumbai-Goa Highway) बावनदी (ता.रत्नागिरी) येथे सीएनजी वाहून नेणारा टँकर आणि एका खासगी ट्रॅव्हल्सचा अपघात होऊन टँकरमधील सीएनजीची (CNG) गळती झाल्याची घटना आज (रविवारी) घडली आहे. हा गळती झालेला सीएनजी हवेत पसरल्यामुळे त्यात लागलेली आग एका घरापर्यंत पोहोचली. या आगीमुळे एक म्हैस भाजली असून, घराजवळची रिक्षा आणि दोन दुचाकींचे नुकसान झाले आहे.
तर अपघातग्रस्त खासगी ट्रॅव्हल्समधील प्रवाशांना (Passengers) दुखापत झाली असून, त्यांना जिल्हा रुग्णालयात पुढील उपचारासाठी दाखल करण्यात आले आहे. तसेच टँकरमधील उरलेला सीएनजी काढून घेण्यासाठी वाहतूक थांबवण्यात आली होती. सकाळी सुमारे ८ वाजेच्या दरम्यान बावनदी परिसरात ही दुर्घटना घडली असून, चिपळूणहून रत्नागिरीकडे निघालेली मिनी बस (वडाप) निवळी गावाजवळ असताना, मागून भरधाव वेगात आलेल्या गॅस टँकरने बसला जोरदार धडक दिली. या धडकेनंतर चालकाचे वाहनावरील नियंत्रण सुटल्याने मिनी बस (Mini Bus) थेट दरीत कोसळली.
मुंबई- रत्नागिरी-गोवा महामार्गावर मिनी बस आणि सीएनजी टँकरचा भीषण अपघात झाला. त्यानंतर गॅस गळती झाल्यामुळे एका घराने पेट घेतला.#MumbaiGoaHighway #Ratnagiri #Accident #CNG #CNGGas #CNGTankar #AccidentNews pic.twitter.com/o1Kc2t0b5O
— Deshdoot (@deshdoot) June 8, 2025
दरम्यान, या धडकेनंतर टँकरमधून गॅसची गळती होऊ लागल्याने परिसरात भीतीचे वातावरण निर्माण झाले. यानंतर स्थानिक नागरिकांनी तातडीने प्रशासनाला याबाबत माहिती दिली. घटनेची माहिती मिळताच पोलीस, अग्निशमन दल व रुग्णवाहिका तातडीने घटनास्थळी दाखल झाली. यानंतर मदत आणि बचावकार्य वेगाने सुरू करण्यात आले असून, जखमींना जवळच्या रुग्णालयात दाखल करण्यात आले आहे. सध्या अपघाताचे (Accident) नेमके कारण स्पष्ट झालेले नाही. तसेच जखमींची अचूक संख्या देखील अजून कळू शकलेली नाही. तर घटनास्थळी प्रशासनाची टीम उपस्थित असून, परिस्थिती नियंत्रणात आणण्याचे काम सुरू आहे.
