मुंबई | Mumbai
महाराष्ट्र लोकसेवा आयोगाच्या (MPSC) गैरकारभारावरुन राज्यातील स्पर्धा परीक्षार्थी आणि विविध संघटना आक्रमक झाल्या आहेत. औषध निरीक्षक भरती परीक्षेतील कथित पेपरफुटी, परीक्षांमधील गैरप्रकार आणि भरती प्रक्रियेतील अनियमिततेच्या मुद्द्यावरून राज्यात आंदोलनाची तीव्रता वाढत असतानाच संभाजी ब्रिगेडच्या कार्यकर्त्यांनी एमपीएससीचे सचिव महेंद्र हरपाळकर यांच्या तोंडाला काळे फासून निषेध व्यक्त केल्याची घटना शुक्रवारी (११ सप्टेंबर) घडली.
MPSC ची कथित पेपरफुटी आणि परीक्षा प्रक्रियेतील त्रुटी यामुळे या परीक्षेचा अभ्यास करणारे विद्यार्थी आधीच त्रासले आहेत. ज्यामुळे आता या विद्यार्थ्यांचा रोष पाहायला मिळत असून राज्यातील पुणे, छत्रपती संभाजीनगर, नागपूर व नाशिक या ठिकाणी आंदोलन झाले आहे. आज शुक्रवारी (11 सप्टेंबर) संभाजी ब्रिगेडच्या कार्यकर्त्यांनी एमपीएससीचे सचिव महेंद्र हरपाळकर यांच्या तोंडाला काळे फासल्याची घटना नवी मुंबई येथील एमपीएससीच्या मुख्य कार्यालयात घडली आहे. सचिव हरपाळकर यांच्या तोंडावर काळे फासल्याचा व्हिडीओ आता सोशल मीडियावर मोठ्या प्रमाणात व्हायरल होत आहे.
MPSC औषधं निरीक्षक पेपरफुटी संदर्भात संभाजी ब्रिगेड ने ३ ऑगस्ट रोजी राज्यातील सर्व जिल्हाधिकारी कार्यालया समोर आंदोलन केले होते. त्याच वेळी सरकारला आम्ही इशारा दिला होता मात्र सरकार गेंड्याच्या कातडीचे आहे त्यांना ज्या भाषेत समजत त्या भाषेत सांगितलं पाहिजे म्हणून ही संभाजी ब्रिगेड ची प्रतिक्रिया आहे. MPSC चे अध्यक्ष व सचिव यांनी तत्काळ राजीनामा दिला नाही तर पुढचा नंबर हा MPSC अध्यक्षांचा असेल यात तिळमात्र शंका नाही, असे संभाजी ब्रिगेडने म्हटले आहे.
MPSC चा अभ्यास करणाऱ्या २५ लाख विद्यार्थ्यांच्या व महाराष्ट्रातील १२ कोटी जनतेच्या वतीने संभाजी ब्रिगेड ने या भ्रष्ट व्यवस्थेच्या आणि निष्क्रिय सरकारच्या तोंडाला काळे फासले आहे. महेंद्र हरपाळकर यांच्याविरोधातील आंदोलन हे सरकारला जनतेच्या वतीने संभाजी ब्रिगेडने मारलेली थप्पड असल्याचे त्यांनी सांगितले.
