मुंबई । Mumbai
तब्बल दोन दशकांनंतर मनसेप्रमुख राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे एका व्यासपीठावर एकत्र आले. 5 जुलै रोजी मुंबईतील एनएससीआय डोममध्ये त्रिभाषा सूत्राच्या विजयानिमित्त आयोजित मराठी मेळाव्यात हा ऐतिहासिक क्षण घडला. उद्धव ठाकरेंनी “आम्ही एकत्र आलो आहोत आणि एकत्र राहू,” अशी भावनिक भूमिका मांडली, तर राज ठाकरेंनी युतीबाबत सावधगिरी दाखवली. या मेळाव्याने महाराष्ट्राच्या राजकारणात नव्या चर्चांना तोंड फोडले आहे.
शिवसेना खासदार संजय राऊत यांनी पत्रकार परिषदेत या मेळाव्यावर भाष्य केले. ते म्हणाले, “5 जुलैचा मराठी विजय उत्सव हा महाराष्ट्रातील जनतेने गेल्या 20 वर्षांपासून ज्या क्षणाची वाट पाहिली होती, तो क्षण होता. या एकजुटीमुळे जनतेच्या अपेक्षा वाढल्या आहेत.” ठाकरे बंधूंनी आपली भूमिका स्पष्ट करावी, अशी लोकांची इच्छा असली, तरी योग्य वेळी योग्य निर्णय घेतले जातील, असे राऊत यांनी नमूद केले. त्यांनी भाजप आणि मिंधे गटावर टीका करताना म्हटले की, ज्यांना हे दोघे एकत्र येणे अशक्य वाटत होते, ते आता युतीला आव्हान देत आहेत. “ठाकरेंवर दबाव आणण्याचा प्रयत्न कोण करत आहे?” असा सवाल त्यांनी उपस्थित केला.
राऊत यांनी सांस्कृतिक मंत्र्यांनी मराठी भाषेच्या आंदोलनाची तुलना पहलगामच्या दहशतवादी हल्ल्याशी केल्याचा निषेध केला. ते म्हणाले, “सांस्कृतिक मंत्र्यांनी तरी संयमी आणि सुसंस्कृत भाष्य करावे. मराठीसाठी लढणाऱ्या कार्यकर्त्यांना दहशतवादी ठरवणे चुकीचे आहे. सरकारला मराठी माणसाची एकजूट आणि मराठी भाषेचा गौरव नको आहे, हे यातून स्पष्ट होते.” राऊत यांनी भाजप नेते आशिष शेलार यांच्यावरही जोरदार हल्ला चढवला.
मेळाव्यानंतर ठाकरे गट आणि मनसेच्या युतीची चर्चा जोरात सुरू आहे. मात्र, राज ठाकरेंनी युतीबाबत कोणतेही स्पष्ट संकेत दिलेले नाहीत. याबाबत विचारले असता राऊत म्हणाले, “युतीचा प्रश्न राज ठाकरेंनाच विचारा. आम्ही मराठी माणसासाठी आणि महाराष्ट्रासाठी नेहमीच पुढाकार घेतला आहे. ठाकरे कुटुंब आणि मराठी एकजुटीबाबत आमची भूमिका सकारात्मक आहे. मला विश्वास आहे की, मनसे आणि राज ठाकरेंचीही तीच भूमिका आहे.” गेल्या काही दिवसांपासून दोन्ही पक्षांचे कार्यकर्ते एकत्र आंदोलने आणि उत्सव साजरे करत असल्याचेही त्यांनी नमूद केले. “या एकजुटीत मिठाचा खडा टाकण्याचे काम कोणी करू नये,” असे आवाहन त्यांनी केले.
दरम्यान महाविकास आघाडीतील सहकारी पक्ष असलेल्या काँग्रेसने या मराठी विजय मेळाव्यापासून अंतर राखल्याने प्रश्न उपस्थित झाले आहेत. काँग्रेस स्वबळाची चाचपणी करत असल्याच्या चर्चांवर राऊत म्हणाले, “महाराष्ट्र काँग्रेस मराठीच्या प्रश्नापासून दूर जाणार नाही. मराठी ही आपली मातृभाषा आहे. बाह्य भाषेचे आक्रमण रोखण्यासाठी काँग्रेसचे मराठी नेते आमच्यासोबत आहेत. मराठीच्या प्रश्नावर आम्ही सगळे एकत्र आहोत.” त्यांनी महाविकास आघाडीतील एकजुटीवरही भर दिला.
तसेच राऊत यांनी मुख्यमंत्री देवेंद्र फडणवीस यांच्यावरही जोरदार टीका केली. मराठी भाषेच्या आंदोलनाला “रडगाणं” म्हणणाऱ्या फडणवीसांचे राजकीय आणि ऐतिहासिक ज्ञान कच्चे असल्याचा टोला त्यांनी लगावला. “1857 चे बंड आणि 1978 मधील सत्तापालट अशाच रडगाण्यातून झाले. फडणवीसांनी इतिहासाचा अभ्यास करावा. शिकवणी हवी असेल तर आम्ही द्यायला तयार आहोत,” असे राऊत यांनी ठणकावले.
ठाकरे बंधूंच्या मेळाव्याने मराठी माणसाच्या मनात नव्या आशा निर्माण झाल्या आहेत. मात्र, युतीच्या शक्यतेबाबत अद्याप अनिश्चितता आहे. दोन्ही पक्षांचे कार्यकर्ते एकत्र येत असले, तरी राजकीय युतीचा निर्णय योग्य वेळी घेतला जाईल, असे राऊत यांनी स्पष्ट केले. मराठी भाषा आणि महाराष्ट्राच्या गौरवासाठी लढणाऱ्या या एकजुटीला जनतेचा पाठिंबा मिळत आहे. येत्या काळात ठाकरे बंधूंच्या या मेळाव्याचा महाराष्ट्राच्या राजकारणावर काय परिणाम होतो, हे पाहणे औत्सुक्याचे ठरेल.
