औरंगाबाद – Aurangabad
पेट्रोलच्या दरांमध्ये होणारी वाढ सुरूच असून, परभणीमध्ये साध्या पेट्रोलचे दर ९७.३२ रुपये आहेत, तर पॉवर पेट्रोलचा दर प्रतिलिटर १०१.७६ रुपये झाला आहे, अशी माहिती पंप विक्रेत्यांनी दिली.
औरंगाबाद शहरात रविवारी पेट्रोलचे दर प्रतिलिटर ९६ रुपयांच्याही पुढे गेले आहेत. दरम्यान, ‘पॉवर पेट्रोल’चे दर शंभर रुपयांपर्यंत पोहोचले असून, औरंगाबाद शहरामध्ये ‘पॉवर पेट्रोल’ची किंमत प्रतिलिटर ९९.८१ रुपये झाली आहे. तर, राज्यात पेट्रोलचे सर्वाधिक दर परभणीमध्ये आहेत.
देशभरात इंधनाच्या दरांमध्ये काही महिन्यांपासून सातत्याने वाढ होत आहे. पेट्रोल-डिझेलवर लावण्यात आलेले अधिभार; तसेच आंतरराष्ट्रीय बाजारात काही दिवसांपासून कच्च्या तेलाच्या दरात होणाऱ्या बदलांमुळे इंधनाची दरवाढ होत आहे, त्याची झळ सामान्य नागरिकांना बसत आहे. परभणीबरोबरच नांदेड जिल्ह्यामध्येही ‘पॉवर पेट्रोल’ने शंभरी गाठली आहे. अमरावतीमध्येही ‘पॉवर पेट्रोल’चा दर १००.०१ रुपये झाले आहे.
राज्यात परभणी जिल्ह्यामध्ये पेट्रोलचे दर सर्वाधिक असून, त्यानंतर नांदेड जिल्ह्याचा क्रमांक लागतो. पेट्रोलच्या वाहतुकीसाठी येणारा खर्च जास्त असल्यामुळे, तसेच स्थानिक पेट्रोल विक्रीवर असणाऱ्या महापालिकेच्या अधिभारामुळे हे दर जास्त असल्याची माहिती स्थानिक विक्रेत्यांनी दिली.
