इगतपुरी । प्रतिनिधी Igatpuri
इगतपुरीतील जोगेश्वरी परिसरात काल सायंकाळी उमंग हॉटेलच्या दुसऱ्या मजल्यावर हॉटेलचे काम सुरू होते त्यावेळी एका तरुणाचा खून झाल्याची घटना घडली.
प्रद्युम्न रामधनी चव्हाण, वय ३४ रा. हसवर, जि. आंबेडकर नगर, उत्तर प्रदेश असे खून झालेल्या व्यक्तीचे नाव असून याच्या डोक्यावर, कपाळावर आणि चेहऱ्यावर लोखंडी हातोडीने जोरदार वार केल्याने त्याचा घटनास्थळीच मृत्यू झाला. घटनेनंतर मयताचा भाऊ रणजीत रामधनी चव्हाण याने इगतपुरी पोलीस ठाण्यात तक्रार दाखल केली. या हत्ये मागील कारण अद्याप अस्पष्ट आहे.
घटनेचे गांभीर्य ओळखून उपविभागीय पोलीस अधिकारी हरीश खेडकर, पोलीस निरीक्षक सारिका अहिरराव व पोलीस उपनिरीक्षक कांचन भोजने यांनी घटनास्थळी आपल्या पथकासह जाऊन पंचनामा केला. इगतपुरी पोलिसांनी खुनाचा गुन्हा दाखल करून संशयित आरोपी जनकराम चव्हाण याला अटक केली असून पुढील तपास पोलीस निरीक्षक सारिका अहिरराव यांच्या नेतृत्वाखाली पोलीस पथक करीत आहे.
