अहिल्यानगर |प्रतिनिधी| Ahilyanagar
तोफखाना पोलीस ठाणे हद्दीत दोन ठिकाणी चोरी व घरफोडीच्या घटना घडल्या आहेत. टेम्पोतून सुमारे 50 हजाराचे औषधाचे बॉक्स चोरून नेले तर घरफोडी करून रोकड, दागिने व मौल्यवान वस्तू असा 35 हजाराचा ऐवज लंपास केला. या प्रकरणी तोफखाना पोलीस ठाण्यात गुन्हे दाखल झाले आहेत.
वेलू दुरास्वामी स्वामी (वय 40 रा. कर्नाटक) यांनी दिलेल्या फिर्यादीवरून गुन्हा दाखल करण्यात आला आहे. वेलू हे एका ट्रान्सपोर्ट कंपनीसाठी ड्रायव्हर म्हणून काम करतात. 30 नोव्हेंबर रोजी गुजरातमधील एका कंपनीमधून औषधांनी भरलेला माल घेऊन ते बंगलोरकडे जात होते. रात्री साडेसात वाजता ते कल्याण बायपासवरील समाधान हॉटेलजवळ थांबले होते. जेवण व आरामानंतर रात्री नऊ वाजता त्यांनी पुन्हा प्रवास सुरू करण्याचा प्रयत्न केला. मात्र, त्यावेळी त्यांनी टेम्पोची तपासणी केली असता टेम्पोवरील ताडपत्री फाटलेली दिसली आणि त्यामधील 5 बॉक्स चोरीला गेलेले होते. एकूण किंमत 49 हजार 635 रुपये किंमतीचा ऐवज चोरीला गेला आहे.
अमीन शमशुद्दीन शेख (वय 59, रा. भूतकरवाडी, महेश कॉलनी, अहिल्यानगर) यांनी दिलेल्या फिर्यादीवरून तोफखाना पोलीस ठाण्यात घरफोडीचा गुन्हा दाखल करण्यात आला आहे. चोरट्यांनी 1 डिसेंबर रोजी दुपारी पावणे तीन ते संध्याकाळी सहाच्या दरम्यान शेख यांचे घर फोडले. फिर्यादी आणि त्यांच्या पत्नी घराला कुलूप लावून कामानिमित्त बाहेर गेले होते. चोरट्याने घराच्या मागील दरवाजाचा खालचा भाग कट करून घरात प्रवेश केला आणि 13 हजारांची रोकड, सोन्याच्या अंगठ्या, कानातील रिंग आणि इतर मौल्यवान दागिने असा एकूण 35 हजारांचा ऐवज लंपास केला. घटनास्थळी तोफखाना पोलिसांनी भेट दिली आहे.
