अहिल्यानगर (प्रतिनिधी)
कृषी विभागामार्फत रब्बी हंगाम सन 2024 मध्ये सर्वसाधारण व आदिवासी गटासाठी ज्वारी, गहू, हरभरा, करडई व जवस या पिकांसाठी आयोजित पीक स्पर्धेत सहभागी होण्यासाठी 31 डिसेंबर 2024 पर्यंत अर्ज करता येतील.
जास्तीत जास्त शेतकर्‍यांनी या स्पर्धेत सहभागी व्हावे, असे आवाहन कृषी संचालक (विस्तार व प्रशिक्षण) रफिक नाईकवाडी यांनी केले आहे. राज्यामध्ये पिकाची उत्पादकता वाढविण्यासाठी विविध भागांमध्ये शेतकर्‍यांकडून विविध प्रयोग करण्यात येतात व उत्पादकतेत वाढ करण्यात येते. अशा प्रयोगशील शेतकर्‍यांना मिळालेल्या उत्पादकतेबाबत प्रोत्साहन राज्यांतर्गत पीकस्पर्धा योजना राबविण्यात येते.
स्पर्धेसाठी प्रवेश शुल्क प्रत्येक पिकासाठी स्वतंत्र सर्वसाधारण गटासाठी 300 रूपये व आदिवासी गटासाठी 150 रूपये असणार आहे. स्पर्धेत भाग घेण्यासाठी शेतकर्‍याकडे स्वतःच्या नावावर जमीन असणे व ती जमीन तो स्वत: कसत असणे आवश्यक आहे. स्पर्धेत भाग घेणार्‍या शेतकर्‍याला एकाच वेळी एकापेक्षा जास्त पिकांसाठी स्पर्धेत सहभाग घेता येईल. पीक स्पर्धेमध्ये सहभाग घेणार्‍या शेतकर्‍याच्या स्वत:च्या शेतावर त्या पिकाखाली किमान 40 आर क्षेत्रावर सलग लागवड असणे आवश्यक आहे.
सर्वसाधारण व आदिवासी गटातील शेतकर्‍यांसाठी तालुका पातळीवर 5 हजार, 3 हजार व 2 हजार रूपये असे अनुक्रमे पहिले, दुसरे व तिसरे बक्षीस असेल. जिल्हा पातळीवर 10 हजार, 7 हजार व 5 हजार रूपये तर राज्यपातळीवर प्रथम 50 हजार द्वितीय 40 हजार तसेच तृतीय 30 हजार रूपये बक्षीस असेल.
अर्जासोबत जोडा कागदपत्रे
पीक स्पर्धा तालुका, जिल्हा व राज्यपातळीवर राबविण्यात येत आहे. अर्जासोबत विहित नमुन्यातील अर्ज (प्रपत्र- अ), ठरवून दिलेले प्रवेश शुल्क भरल्याचे चलन, सातबारा, आठ (अ) चा उतारा, जात प्रमाणपत्र (केवळ आदिवासी असल्यास), स्पर्धेसाठी शेतकर्‍याने संबंधित सातबारा वरील घोषित केलेल्या क्षेत्राचा चिन्हांकित केलेला नकाशा आदी कागदपत्रे जोडावी.
