धुळे – Dhule – प्रतिनिधी :
विवाहितेचा छळ करून तिला वशीकरण करण्याचा प्रयत्न केल्याचा प्रकार समोर आला आहे. याप्रकरणी पतीसह सहा जणांवर शिंदखेडा पोलिसात गुन्हा दाखल झाला आहे.
याबाबत प्रियंका गौरव पाटील (वय 29 रा. गाडगेबाबा चौक, अमोल प्लाझा, देवेंद्र नगर, जळगाव व ह.मु पाटण ता. शिंदखेडा) या विवाहितेने शिंदखेडा पोलिसात फिर्याद दिली आहे. त्यानुसार दि. 14 जुन 2020 रोजी तिचे लग्न झाल्यानंतर दोन दिवसांपासूनच लग्ना हुंडा व श्रीधन कमी दिले असे टोमणे मारत पैशाची मागणी करत तिचा सासरच्यांनी छळ सुरू केला.
सासु, सासरे सांगतील तशाच पध्दतीने वागावे, यासाठी जादुटोणा करणारे उस्मान बाबा यांच्याकडून गोळ्या पावडर व औषधी घेवून तिला वशीकरण करण्याचा प्रयत्न केला. तिला औषधी घेण्यास भाग पाडले.
तर पती गौरव याने प्रियंका ही गर्भवती असतांना तिला गर्भपात करण्याचे औषध आणून न कळत दिल्याने तिचा गर्भपात झाला. तसेच माहेरून चारचाकी गाडी घेण्यासाठी पैशांची मागणी करून तिचा शारिरीक व मानसिक छळ केला.
त्यावरून पती गौरव विलास पाटील, सासरे विलास विश्वास पाटील, सासु वंदना विलास पाटील, ननंद भावना गिरीश पाटील, नंदोई गिरीश अजबराव सोनवणे सर्व (रा. गाडगेबाबा चौक, जळगाव) व उस्मानबाबा (रा. जळगाव) यांच्याविरोधात भादंवि कलम 498 अ, 313, 323, 504, 506, 34 सह महाराष्ट्र जादुटोणा कायदा कलम 3 प्रमाणे गुन्हा दाखल करण्यात आला आहे. तपास पीएसआय गजानन गोटे करीत आहेत.
