सोलापूर | Solapur
डॉ. शिरीष वळसंगकर यांच्या मृत्यूनंतर सोलापुरातून हळहळ व्यक्त होत आहे. त्यांनी १८ एप्रिल रोजी स्वत:वर गोळ्या झाडून आत्महत्या केली होती. त्यांनी आत्महत्या करण्यापूर्वी एक सुसाईड नोट लिहून ठेवली होती. या सुसाईड नोटमध्ये त्यांनी मनीषा मुसळे माने हिच्यामुळेच टोकाचे पाऊल उचलत असल्याचा उल्लेख केला आहे. यानंतर मनिषा माने-मुसळे या महिलेला अटक करण्यात आली आहे. आरोपी मनिषाला तीन दिवसांची पोलीस कोठडी सुनावण्यात आली आहे. पोलिसांकडून तपास सुरू असून आता या प्रकरणात अनेक धक्कादायक खुलासे होण्याची शक्यता आहे. आरोपी मनिषा माने-मुसळे ही काळ्या जादूच्या आहारी गेल्याची चर्चा सुरू आहे.
डॉ. शिरीष वळसंगकर यांच्या निकटवर्तीय व्यक्तीने दिलेल्या माहितीनुसार, ‘रूग्णालयात बऱ्याच गोष्टी सुरू होत्या. ज्याचा शिरीष वळसंगकर यांना वैताग आला होता. रूग्णालयात सुरू असलेल्या विविध विषयात त्यांनी लक्ष घालण्यास सूरूवात केली होती. त्यानंतर महत्त्वाकांक्षी असलेल्या मनिषाने त्रस्त झाली. तिने काळ्या विद्येचाही प्रयोग सुरू केला. बिब्बा, लिंबू अन् काळ्या बाहुल्या ती रुग्णालयातील वेगवेगळ्या भागात ठेवू लागली असल्याचे त्यांनी सांगितले.
डॉ. वळसंगकर यांनी २०१७ पासून सर्व कारभार आपल्या मुलासह सुनेकडे सोपवला होता. त्या काळात मनिषाने मनमानी सुरू केली. या दरम्यान मनिषाने आर्थिक बाबींमध्ये गैरव्यवहार करण्यास सुरुवात केली. डॉक्टरांना ही गोष्ट समजताच त्यांनी नाराजी व्यक्त केली. डॉक्टरांना मनीषाचे सारेच समजले तेव्हा तिचे अधिकार काढून टाकले. तिला हॉस्पिटलमध्ये खुर्चीवर न बसता फिरून काम करायला सांगितले. त्यामुळे मनिषा आणखी संतापली होती, असे एका निकटवर्तीयाने माहिती दिली. डॉक्टरांच्या या निकटवर्तीयाला मनिषाने कामावरून काढून टाकले होते.
‘अमावस्येच्या दिवशी मनीषा माने ऑन ड्यूटीवर असताना अचानक मधूनच रिक्षातून कुठेतरी जायच्या. तसेच येताना लिंबू आणि बाहुल्या सोबत घेऊन यायच्या. त्यानंतर लिंबू आणि काळ्या बाहुल्या रूग्णालयात ठेवून कामाला जायच्या’, अशी माहिती डॉ. शिरीष वळसंगकर यांच्या विश्वासू व्यक्तीने दिलीय. एक मशीन बसवतानाही तिने खाली या वस्तू ठेवल्या. तिच्या या प्रकाराला डॉक्टर वैतागले होते, अशी माहितीदेखील समोर आली आहे. त्यांनी दिलेल्या माहितीनंतर परिसरात एकच खळबळ उडाली आहे.
देशदूतच्या व्हाट्सॲप ग्रुपला जॉईन होण्यासाठी लिंकवर क्लिक करा
