मुंबई । Mumbai
महाराष्ट्राला हादरवून सोडणाऱ्या भोंदूबाबा अशोक खरात लैंगिक अत्याचार प्रकरणाला आता मोठे राजकीय वळण लागले आहे. भाजप आमदार गोपीचंद पडळकर यांनी राष्ट्रवादी काँग्रेस (शरद पवार गट) पक्षाचे प्रदेशाध्यक्ष आणि माजी मंत्री जयंत पाटील यांच्यावर अत्यंत गंभीर स्वरूपाचे आरोप केले आहेत. जयंत पाटील यांनी अशोक खरात याच्याशी निकटचे संबंध ठेवून त्याला विविध प्रकारे मदत केल्याचा दावा पडळकरांनी केल्याने राजकीय वर्तुळात मोठी खळबळ उडाली आहे.
गोपीचंद पडळकर यांनी एका निवेदनाद्वारे जयंत पाटील यांच्यावर अघोरी कृत्यांमध्ये सहभागी असल्याचा संशय व्यक्त केला आहे. पडळकरांच्या दाव्यानुसार, जयंत पाटील आपल्या मुलासह मिरगाव येथे खरातच्या दरबारात गेले होते. त्या ठिकाणी त्यांनी ‘रक्ताची आंघोळ’ केल्याचा धक्कादायक प्रकार घडल्याचा आरोप पडळकरांनी केला आहे. या अघोरी प्रकाराची आणि जयंत पाटील यांच्या खरातसोबतच्या भेटीची सखोल पोलीस चौकशी व्हावी, अशी मागणी त्यांनी मुख्यमंत्री आणि गृहमंत्र्यांकडे केली आहे.
या प्रकरणातील आर्थिक आणि प्रशासकीय मदतीवर बोट ठेवताना पडळकर म्हणाले की, जयंत पाटील जलसंपदा मंत्री असताना अशोक खरातच्या घर आणि संस्थेला विशेष सवलती देण्यात आल्या. दारणा धरणातून तब्बल ४० किलोमीटर लांबीची पाईपलाईन टाकून खरातला पाणीपुरवठा करण्यात आला. एका भोंदूबाबाला सरकारी तिजोरीतून आणि नियमाबाहेर जाऊन एवढी मोठी मदत का करण्यात आली? या निर्णयामागे जयंत पाटील यांची नेमकी काय भूमिका होती, याची चौकशी होणे गरजेचे असल्याचे पडळकर यांनी नमूद केले.
पडळकर यांनी पुढे असाही आरोप केला की, जयंत पाटील यांनीच अशोक खरातला इस्लामपूर (ईश्वरपूर) येथे आणले होते. तिथे खरातने नेमके काय कार्यक्रम केले आणि त्याला कोणाचे संरक्षण लाभले, याची माहिती समोर यायला हवी. “भोंदू बाबाच्या पापाचा घडा भरला असून मुख्यमंत्री एकनाथ शिंदे यांनी त्यावर योग्य कारवाई केली आहे. मात्र, जयंत पाटील यांनी खरातकडे जाऊन जे अघोरी प्रकार केले, त्याबद्दल त्यांना या प्रकरणात सहआरोपी करण्यात यावे,” अशी आग्रही मागणी पडळकरांनी केली आहे.
अशोक खरात याच्यावर अनेक महिलांचे लैंगिक शोषण, बलात्कार, भोंदूगिरी आणि छळवणुकीचे गंभीर गुन्हे दाखल आहेत. खरातला अटक झाल्यानंतर त्याचे राजकीय नेत्यांसोबतचे फोटो आणि व्हिडिओ वेगाने व्हायरल होत आहेत. यापूर्वी अनेक मंत्र्यांची नावे या प्रकरणात चर्चेत असताना, आता थेट जयंत पाटील यांच्यावरच अघोरी कृत्यांचे आरोप झाल्याने प्रकरणाची व्याप्ती वाढली आहे. गोपीचंद पडळकर यांच्या या आरोपांमुळे महाविकास आघाडी आणि महायुतीमध्ये नवा कलगीतुरा रंगण्याची शक्यता आहे. या प्रकरणाची एसआयटी (SIT) किंवा उच्चस्तरीय पोलीस स्तरावर चौकशी करण्याची मागणी आता जोर धरू लागली आहे. जयंत पाटील यांनी अद्याप या आरोपांवर कोणतीही अधिकृत प्रतिक्रिया दिलेली नाही. जर हे आरोप तपासात सिद्ध झाले, तर खरात प्रकरण राज्याच्या राजकारणात मोठा भूकंप घडवून आणू शकते. सध्या संपूर्ण राज्याचे लक्ष पोलीस तपास आणि जयंत पाटील यांच्या प्रत्युत्तराकडे लागले आहे.
