दिल्ली । Delhi
प्रसिद्ध अभिनेते कमल हासन पुन्हा एकदा वादाच्या भोवऱ्यात सापडले आहेत. त्यांच्या आगामी ‘ठग लाइफ’ या चित्रपटाच्या ऑडिओ लाँच कार्यक्रमात केलेल्या वक्तव्यामुळे कर्नाटकात संतप्त प्रतिक्रिया उमटल्या आहेत. कन्नड भाषेचा उगम तमिळ भाषेतून झाला असल्याचं विधान त्यांनी केलं, आणि त्यावरून वाद निर्माण झाला आहे.
ऑडिओ लाँच कार्यक्रमात सुरुवातीला कमल हासन यांनी तमिळ भाषेचा गौरव करत “उयिरे उरवे तमिळे” असं विधान केलं. याचा अर्थ त्यांनी स्पष्ट केला की, “माझं आयुष्य आणि माझं कुटुंब म्हणजे तमिळ भाषा आहे.” यानंतर त्यांनी कार्यक्रमाला उपस्थित असलेल्या कन्नड सुपरस्टार शिवराजकुमार यांचा उल्लेख केला.
ते म्हणाले, “शिवराजकुमार माझ्या कुटुंबासारखे आहेत. ते दुसऱ्या राज्यात राहतात, पण तरीही ते येथे आले आहेत. मी भाषणाची सुरुवात करताना म्हटलं की माझं आयुष्य आणि कुटुंब तमिळ आहे. कारण तुमची भाषा तमिळ भाषेतूनच जन्माला आली आहे. त्यामुळे मी त्या ओळीत तुमचाही उल्लेख केलाय.” या विधानानंतर कर्नाटकातील कन्नड समर्थक संघटनांनी संतप्त प्रतिक्रिया व्यक्त केल्या.
कन्नड संरक्षण वेदिके यासारख्या संघटनांनी कमल हासन यांच्या वक्तव्याचा तीव्र निषेध केला आहे. त्यांनी असा इशारा दिला आहे की, “यापुढे अशा प्रकारची विधानं केल्यास कमल हासन यांना गंभीर परिणामांना सामोरं जावं लागू शकतं.” याशिवाय, कन्नड कार्यकर्त्यांनी बेंगळुरूमध्ये ‘ठग लाइफ’ चित्रपटाचे फलक (बॅनर) फाडत निषेध व्यक्त केला. सोशल मीडियावरही कमल हासन यांच्या विधानाची जोरदार टीका सुरू आहे.
कमल हासन हे केवळ एक नामवंत अभिनेते नसून राजकीयदृष्ट्याही सक्रिय व्यक्तिमत्त्व आहेत. त्यामुळे त्यांच्या वक्तव्याला अधिक महत्त्व दिलं जातं. भाषिक अस्मितेचा विषय अत्यंत संवेदनशील असतो आणि त्यासंदर्भात केलेल्या टिप्पणीमुळे अशांतता निर्माण होण्याची शक्यता वाढते. कर्नाटकातील अनेक नेत्यांनीही या विधानावर नाराजी व्यक्त केली आहे. काहीजणांनी त्यांना माफी मागण्याची मागणी केली आहे, तर काहींनी त्यांच्यावर बहिष्कार टाकण्याची मागणी केली आहे.
‘ठग लाइफ’ हा चित्रपट सध्या पोस्ट-प्रोडक्शन टप्प्यात असून त्याचं दिग्दर्शन मणिरत्नम यांनी केलं आहे. या चित्रपटात कमल हासन यांच्या भूमिकेची विशेष चर्चा आहे, मात्र वादामुळे चित्रपटाच्या प्रचारावर नकारात्मक परिणाम होण्याची शक्यता निर्माण झाली आहे. या वादावर कमल हासन यांच्याकडून अद्याप अधिकृत स्पष्टीकरण आलेले नाही. मात्र कन्नड समर्थकांच्या संतप्त प्रतिक्रिया पाहता हा विषय लवकरच राजकीय आणि सामाजिक स्तरावर गहन होण्याची चिन्हं आहेत.
