पाटणा । Patana
बिहारच्या राजकारणात आणि विशेषतः राष्ट्रीय जनता दलात (राजद) आज एका नवीन पर्वाचा उदय झाला आहे. पक्षाचे युवा नेते तेजस्वी यादव यांची राजदच्या राष्ट्रीय कार्यकारी अध्यक्षपदी एकमताने निवड करण्यात आली आहे. पाटणा येथील एका प्रतिष्ठित हॉटेलमध्ये आयोजित करण्यात आलेल्या पक्षाच्या राष्ट्रीय कार्यकारिणीच्या महत्त्वपूर्ण बैठकीत हा ऐतिहासिक निर्णय घेण्यात आला.
राजदच्या या उच्चस्तरीय बैठकीला पक्षाचे सर्वेसर्वा लालूप्रसाद यादव, माजी मुख्यमंत्री राबडी देवी आणि खासदार मीसा भारती यांच्यासह देशभरातील दिग्गज नेते उपस्थित होते. बैठकीच्या सुरुवातीला पक्षाचे नेते भोला यादव यांनी तेजस्वी यादव यांना कार्यकारी अध्यक्ष बनवण्याचा प्रस्ताव मांडला. लालूप्रसाद यादव यांच्या सूचनेनुसार मांडण्यात आलेल्या या प्रस्तावाला उपस्थित सर्व सदस्यांनी हात वर करून उत्स्फूर्त पाठिंबा दर्शविला. यानंतर राजदचे बिहार प्रदेशाध्यक्ष मंगणी लाल मंडल यांनी तेजस्वी यांच्या नियुक्तीची अधिकृत घोषणा केली.
१९९७ मध्ये स्थापनेपासून लालूप्रसाद यादव हेच पक्षाच्या सर्वोच्च पदावर आहेत. मात्र, गेल्या काही काळापासून त्यांच्या खालावलेल्या प्रकृतीमुळे पक्षाच्या दैनंदिन कामकाजात अडचणी येत होत्या. त्यामुळेच पक्षाच्या इतिहासात पहिल्यांदाच ‘कार्यकारी अध्यक्ष’ हे पद निर्माण करून तेजस्वी यादव यांच्याकडे पक्षाची सर्व सूत्रे सोपवण्यात आली आहेत. आता तेजस्वी यादव यांच्याकडे अध्यक्षांचे सर्व अधिकार असतील, ज्यामुळे पक्षाच्या निर्णयप्रक्रियेला वेग येईल.
या निवडीनंतर राजदच्या अधिकृत सोशल मीडिया खात्यावरून तेजस्वी यादव यांचे अभिनंदन करण्यात आले. या पोस्टमध्ये “राजदमध्ये एका नवीन युगाची सुरुवात” असे नमूद करण्यात आले आहे. बैठकीत उपस्थित नेत्यांनी तेजस्वी यांचे कौतुक करताना म्हटले की, ते केवळ पक्षाचेच नव्हे तर संपूर्ण बिहारचे भविष्य आहेत. गेल्या काही वर्षांत तेजस्वी यांनी पक्षाचे नेतृत्व समर्थपणे पेलले असून, आता त्यांच्याकडे औपचारिकपणे ही जबाबदारी सोपवण्यात आली आहे.
राष्ट्रीय कार्यकारिणीच्या या बैठकीसाठी केवळ बिहारच नव्हे तर २० हून अधिक राज्यांतील प्रदेशाध्यक्ष आणि कार्यकारी सदस्य शनिवारीच पाटण्यात दाखल झाले होते. गेल्या विधानसभा निवडणुकीतील पराभवानंतर पक्षाची फेररचना आणि आगामी रणनीती ठरवण्यासाठी ही बैठक अत्यंत महत्त्वाची मानली जात होती. बैठकीच्या शेवटी लालूप्रसाद यादव यांनी स्वतः तेजस्वी यांना नियुक्तीचे प्रमाणपत्र देऊन त्यांचे अभिनंदन केले.
