मुंबई । Mumbai
“मी ही झुंज नेमकी कोणासाठी देतोय? सर्वच राजकीय पक्षांतील मराठ्यांच्या लेकी-बाळींचे भविष्य उध्वस्त करण्याचे कारस्थान रचले जात आहे,” असा खळबळजनक आणि थेट आरोप करत मराठा आरक्षण आंदोलनाचे नेते मनोज जरांगे पाटील यांनी पुन्हा एकदा राज्य सरकारविरुद्ध एल्गार पुकारला आहे. जात पडताळणी समितीच्या निर्णयांवर प्रश्नचिन्ह उपस्थित करत, मराठा समाजातील भावा-भावंडांची वैध प्रमाणपत्रे अचानक कशी रद्द होतात, असा तिखट सवाल त्यांनी पत्रकार परिषदेत बोलताना केला.
मराठा आरक्षणाच्या मुद्द्यावरून वातावरण पुन्हा एकदा तापले असून, मनोज जरांगे पाटील यांनी मुख्यमंत्री देवेंद्र फडणवीस आणि भाजप प्रदेशाध्यक्ष चंद्रशेखर बावनकुळे यांच्यावर थेट निशाणा साधला आहे. “शिंदे समितीने अत्यंत मेहनतीने मराठा समाजाच्या तब्बल ५८ लाख आरक्षणाच्या नोंदी शोधून काढल्या आहेत. मात्र, या नोंदी मराठ्यांना द्यायच्याच नाहीत, अशी भूमिका काही नेत्यांची दिसते. मराठा समाजात गैरसमज पसरवून फूट पाडण्याचा हा शेवटचा राजकीय डाव आखला जात आहे,” असा दावा त्यांनी केला.
जरांगे पाटील म्हणाले, “गेल्या वर्षभरात मी एकनाथ शिंदे किंवा देवेंद्र फडणवीस यांच्यावर कधीही वैयक्तिक टीका केली नाही. अनेक राजकीय नेते मध्ये पडले, तरीही मी एका शब्दाने कोणाला दुखावले नाही. कारण माझ्या डोळ्यासमोर केवळ मराठा समाजातील गरीब आणि गरजू घटकांचे कल्याण हेच एकमेव ध्येय होते. मात्र, सरकारच्या मनात वेगळेच शिजत आहे. आरक्षणाच्या मूळ नोंदीच रद्द करण्याचे प्रयत्न सुरू आहेत.” जात पडताळणी प्रक्रियेवरून माध्यमांमध्ये चालवल्या जाणाऱ्या चर्चांवरही त्यांनी नाराजी व्यक्त केली. सरकारकडून २ लाख ६० हजार प्रमाणपत्रांपैकी केवळ २१९ प्रमाणपत्रे अवैध ठरल्याचे सांगण्यात आले. मग उर्वरित प्रमाणपत्रांवर संशय निर्माण करून मराठ्यांमध्ये भ्रम का निर्माण केला जात आहे? असा प्रश्न त्यांनी विचारला.
“जर तुम्ही आता खडबडून जागे झाला नाहीत, तर आपल्यावर उघड उघड अन्याय होईल. त्यामुळे सर्व राजकीय मतभेद आणि गट-तट बाजूला ठेवून मराठा समाजाने एकत्र येणे ही काळाची गरज आहे. राजकारण नंतरही करता येईल, पण आधी आपल्या हक्काचे आरक्षण टिकवणे गरजेचे आहे,” असे आवाहनात्मक वक्तव्य जरांगे पाटील यांनी केले. आपल्याला अटक होण्याची शक्यता वर्तवत त्यांनी इशारा दिला की, “सरकारने सर्व डाव खेळून पाहिले आहेत. आता कदाचित मला अटक करण्याचा किंवा शेवटचा हल्ला करण्याचा प्रयत्न केला जाऊ शकतो. पण मी कोणत्याही दबावाला किंवा अटकेला घाबरत नाही.” मनोज जरांगे पाटील यांच्या या आक्रमक भूमिकेमुळे राज्यातील राजकीय वातावरण आणि आरक्षण आंदोलन पुन्हा एकदा नव्या वळणावर पोहोचले आहे.
