नाशिकरोड | प्रतिनिधी | Nashik Road
एका नामांकित सॉफ्टवेअर डेव्हलपरच्या (Software Developer) निवासस्थानी व कार्यालयावर जीएसटी विभागाने (GST Department) अचानक छापा (Raid) टाकला आहे. ही कारवाई आज (शनिवारी) सकाळी सुरू झाली असून, उशिरापर्यंत सुरू राहणार असल्याचे समजते.
प्राथमिक माहितीनुसार, श्रीकांत प्रसाद परे असे संशयिताचे (Suspected) नाव असून, मोठ्या प्रमाणावर करचुकवेगिरी व बनावट इन्व्हॉइस तयार केल्याच्या संशयावरून ही कारवाई (Action) करण्यात आली आहे.
सदरची छापेमारी सुरू असताना व पोलिसांच्या (Police) गाड्या बघून नागरिकांनी मोठ्या प्रमाणावर गर्दी केली होती. ही छापेमारी आर्टिलरीसेंटर रोडवरील कपालेश्वर चौकात असलेल्या इमारतीच्या ठिकाणी सुरू आहे.
दरम्यान संशयिताकडून एक पिस्तूल व सहा राउंड जप्त करण्यात आले असल्याचे समजते. त्याचप्रमाणे बनावट सॉफ्टवेअरद्वारे संबंधित व्यक्ती फसवणूक (Fraud) करत होता असेही बोलले जाते.
काय आहे प्रकरण?
संबंधित सॉफ्टवेअर कंपनीने विविध आयटी सेवा पुरवठा केल्याचा दाखला देऊन बनावट इन्व्हॉइस तयार केल्याचे समोर आले आहे. या माध्यमातून कोट्यवधींच्या जीएसटीची चोरी झाल्याची शक्यता वर्तवण्यात येत आहे. याबाबत कंपनीच्या आर्थिक व्यवहारांची व कागदपत्रांची कसून तपासणी करण्यात आली.
संगणक व डिजिटल डेटा जप्त
छाप्याच्या दरम्यान अधिकार्यांनी कंपनीचे संगणक, सर्व्हर, हार्डडिस्क, पेनड्राईव्ह आणि विविध आर्थिक कागदपत्रे जप्त केली आहेत. तर संबंधित सॉफ्टवेअर डेव्हलपरची चौकशी सुरू आहे.
