पाथर्डी (तालुका प्रतिनिधी)- तालुक्यातील रांजणी येथे नवनाथ मारुती घोडके यांच्या घराचे बांधकाम करणार्‍या नगर तालुक्यातील खोसपुरी येथील साहिल पठाण या मजुराचा गावातील गावगुंडानी हप्ता न दिल्याच्या रागातून कुर्‍हाडीने डोक्यात गंभीर वार करून खून केल्याची धक्कादायक घटना घडली आहे.

याबाबत अधिक माहिती अशी की मुबारक अब्दुल पठाण (रा. खोसपुरी, ता. नगर) यांनी पाथर्डी तालुक्यातील रांजणी येथील नवनाथ मारुती घोडके यांच्या घराचे बांधकाम करण्याचा ठेका घेतलेला होता.  या कामावर 10 दिवसापासून इरफान हसन पठाण, रसूल बेग, युनूस पठाण, साहिल पठाण (रा खोसपुरी ता. नगर) हे मजुरीने बांधकाम करत होते. मंगळवारी सकाळी बांधकामाची वाळू चाळण्यास सुरवात केली.

असता दुपारी 1 वाजण्याच्या दरम्यान वाळू चाळत असलेल्या ठिकाणी गावातील आरोपी बुट्ट्या पवार व साहेबराव पवार तसेच ईतर दोन अज्ञात आरोपींनी साहिल पठाण यास बाहेरील मजुरांना या गावात आम्हाला हप्ते द्यावे लागतात असे सांगितले त्यामुळे बांधकाम सुरू असलेल्या घराचे मालक घोडके यांच्या मध्यस्थीने आरोपींना समजावून सांगितले असता त्यांनी रागाने साहिल यास खंडोबा मंदिर जवळच्या बोळीत नेहले व आरोपी बुट्ट्या पवार व साहेबराव पवार तसेच ईतर दोन अज्ञात आरोपींनी साहिल पठाण यांच्या डोक्यात कानाजवळ कुर्‍हाडीने वार करून गंभीर दुखापत केली त्यामुळे साहिल यास तात्काळ पाथर्डी व नंतर नगर येथे खाजगी दवाखान्यात हलवले परंतु गंभीर दुखापत असल्याने रक्तस्त्राव होवून साहिल याचा मृत्यू झाला.

रात्री उशिरा आरोपी बुट्ट्या पवार व साहेबराव पवार तसेच ईतर दोन अज्ञात आरोपीं विरुद्ध खुनाचा गुन्हा दाखल करण्यात आला असून गुन्ह्याचा तपास पोलीस उपनिरीक्षक परमेश्वर जावळे हे करत आहेत. गुन्हा दाखल होताच आरोपी फरार झाले आहेत.

अहमदनगर (प्रतिनिधी) – जिल्हा पोलीस अधिक्षकांच्या निवासस्थानी नेमणुकीस असलेल्या एका पोलीस शिपायाला नगर ग्रामीणच्या पोलीस उपअधिक्षकांनी व त्यांच्या सोबतच्या सहकार्‍यांनी चांगलाच चोप दिल्याचा प्रकार पोलीस मुख्यालयाच्या गेट शेजारी मंगळवारी (दि. 03) रात्री साडेदहाच्या सुमारास घडला. याप्रकरणी तोफखाना पोलीस ठाण्यात अदखलपात्र गुन्ह्याची नोंद करण्यात आली आहे. या घटनेची जोरदार चर्चा पोलीस वर्तुळात रंगली आहे. जिल्हा पोलीस अधीक्षक याविषयी कोणती भूमिका घेतात याकडे पोलीस वर्तुळाचे लक्ष लागले आहे.

पोलीस शिपाई सागर भास्कर तावरे हे मंगळवारी रात्री वरिष्ठांच्या परवानगीने मुख्यालयातील स्वत:च्या निवासस्थानी गेले. तावरे यांनी घरी जेवण केल्यानंतर मुख्यालयातील गेटजवळ असलेल्या एका टायर दुकानासमोर सहकार्‍यांसह गप्पा मारीत थांबले होते. साडेदहाच्या सुमारास नगर ग्रामीणचे पोलीस उपअधीक्षक अजित पाटील हे सहकार्‍यांसह शासकीय वाहनाने पोलीस मुख्यालयाकडे जात होते. तावरे उभा असलेल्या ठिकाणी उपाअधीक्षक पाटील हे सहकार्‍यांसह उतरले व त्यांनी तावरे यांना मारहाण करण्यास सुरुवात केली.

पोलीस कर्मचारी असल्याचे कळाले तरी पाटील यांनी धक्कादायक वक्तव्य केले. ते म्हणाले, तुला मारहाण केली तर बाकी लोक पळून जातील. पाटील यांनी मारहाण केल्याने तावरे हे दुचाकीवरून खाली पडले. ते जखमी झालेत. पाटील यांच्या सोबत असलेल्या सहकार्‍याने तावरे यांचे हात पकडून मारहाण करण्यासाठी मदत केली. तावरे यांच्या सोबत असलेल्या सय्यद नावाच्या मित्राने यांना सांगितले की, तावरे हे पोलीस अधीक्षक यांच्या निवासस्थानी आहे. त्यावर पाटील म्हणाले, तो कुठे असला तरी माझे कोणीच काही करू शकत नाही. पाटील यांनी तावरे यांना शिवीगाळ केले असल्याचे दिलेल्या तक्रारीत नमूद केले आहे.

जिल्हा पोलीस अधीक्षक हे पोलीस अधिकारी व कर्मचारी यांच्याबाबत नेहमीच कठोर निर्णय घेत असतात. आतापर्यंत गैरवर्तन करणार्‍या पोलीस अधिकारी व कर्मचार्‍यांना त्यांनी निलंबनाची कारवाई केलेली आहे. तावरे यांना झालेली मारहाण धक्कादायक आहे. वरिष्ठांच्या आदेशानेच तावरे यांनी पोलिसांत तक्रार दिली असल्याचे समजते. याबाबत आता पोलीस अधीक्षक कोणती भूमिका घेतात याकडे सर्वांचे लक्ष आहे.

शिर्डी (शहर प्रतिनिधी)- साईबाबांच्या दरबारात येऊन मनाला शांती मिळत असून प्रसन्नता वाटते, याठिकाणी मी येत नसून बाबा मला बोलावून घेतात अशी प्रतिक्रिया जेष्ठ सिनेअभिनेता जितेंद्र यांनी शिर्डीत पत्रकारांशी बोलताना व्यक्त केली.

दरम्यान बॉलीवुडचे सुप्रसिद्ध जेष्ठ सिनेअभिनेता जितेंद्र यांनी बुधवारी सकाळी साईदरबारी हजेरी लावत साईसमाधीचे दर्शन घेतले. यावेळी त्यांचा साईबाबा संस्थानच्या वतीने सत्कार करण्यात आला. साईदर्शनानंतर त्यांनी पत्रकारांशी बोलताना सांगितले की मी शिर्डीला येत नाही मात्र साईबाबा मला येथे बोलावतात. आम्ही कितीतरी दिवसांपासून दर्शनासाठी येण्याचा विचार केला होता पण जोपर्यंत साईंचा बुलावा येत नाही तोपर्यंत शक्य नसल्याचे त्यांनी सांगितले.

साईबाबांचे दर्शन घेतल्यानंतर मनशांती होते तसेच आत्मा तृप्त होतो. जणूकाही परमेश्वराला स्पर्श केल्यासारखे वाटते. माझ्या परीवारासह सर्वासाठी साईबाबांना प्रार्थना केली आहे. 22 वर्षापूर्वी स्टुडिओच्या बाहेर पाय ठेवला असून पुन्हा स्टुडिओत जाणार नाही हा संकल्प केला होता. सध्या माझी मुलगी आणी मुलगा यांच्या पाठीमागे उभा असल्याचे जितेंद्र यांनी सांगितले.

एलसीबीची कारवाई । सावेडीतून चोरलेली कारही जप्त

अहमदनगर (प्रतिनिधी) – सावेडीच्या बोरुडे मळ्यातून कार चोरीच्या गुन्ह्यात अटक केलेले दोघे सराईत चोर निघाले. केडगावच्या दोघा चोरांना अटक करण्यात एलसीबी पोलिसांना यश मिळाले. पोलिसांनी या चोरट्यांकडून चोरी केलेली कारही जप्त केली आहे.

गणेश शिवाजी लोखंडे (रा. लोंढे मळा, केडगाव) आणि संकेत सुनील खापरे (रा. विनायकनगर) अशी अटक केेलेल्या दोघांची नावे आहेत. 25 नोव्हेंबरला बोरुडे मळ्यातून या दोघांनी स्वीफ्ट कार चोरी केली होती. चोरी केलेली कार घेऊन हे दोघे सुपा एमआयडीसी परिसरात येणार असल्याची माहिती एलसीबीचे पीआय दिलीप पवार यांना मिळाली होती. त्यानुसार एलसीबीच्या पोलीस पथकाने सुपा एमआयडीसी परिसरात सापळा लावला. कार दिसताच पोलिस पथकाने घेराव घालत दोघांना ताब्यात घेतले. त्यांच्याकडे चौकशी करता त्यांनी ही कार बोरुडे मळ्यातून चोरी केल्याची कबुली दिली. पोलिसांनी दोघांना ताब्यात घेत कार जप्त केली.

औरंगाबाद येथील विजय प्रभाकर लटंगे यांची स्वीफ्ट कार (एम.एच.20,एजी-6758) या दोघांनी चोरी केली होती. त्यासदंर्भात तोफखाना पोलीस ठाण्यात गुन्हा दाखल असून या गुन्ह्यात दोघांना अटक करण्यात आल्याचे पोलिसांनी सांगितले.

शहरातच करायचे चोर्‍या
गणेश लोखंडे विरोधात सहा तर संकेत खापरे विरोधात पाच गुन्हे दाखल आहेत. हे दोघे शहरातच चोरी करत असल्याचे चौकशीत समोर आले. कोतवाली आणि तोफखाना या दोनच पोलीस ठाण्यात दोघांविरोधात चोरीचे गुन्हे दाखल आहेत. त्यामुळे हे सराईत गुन्हेगार असल्याचे समोर आले. चोरीच्या आणखी काही गुन्ह्याची उकल या दोघांकडून होईल असे पोलिसांनी सांगितले.

अहमदनगर (प्रतिनिधी) – नगर अर्बन बँकेने ठेवीवरील व्याजदरात वाढ करण्याचा निर्णय घेतला आहे. ही वाढ 1 डिसेंबरपासून लागू करण्यात आल्याची माहिती प्रशासकांनी दिली.

रिझर्व्ह बँक ऑफ इंडियाने ठेवींवरील व्याजदर ठरविणेबाबत बँकांना स्वायत्तता दिलेली आहे. त्यानुसार नगर अर्बन को-ऑप बँकेच्या व्यवस्थापक समितीने 1 ते 2 वर्षासाठी ठेवीवरील व्याजदरात .25 टक्केने वाढ केली. 1 ते दोन वर्षावरील ठेवींना पूर्वी 8 टक्के दराने व्याजदर दिला जायचा तो आता 8.25 टक्के करण्यात आला आहे.

सुधारित व्याजदराची अंमलबजावणी 1 डिसेंबरपासून पासून नव्याने येणार्‍या व नूतनीकरण होणार्‍या ठेवींसाठी करण्यास सुरूवात झाली आहे. शतकोत्तर गौरवशाली परंपरा असलेल्या नगर अर्बन बँकेच्या सन्माननीय ठेवीदार व सभासदांनी उदंड प्रतिसाद देत बँकेवरील विश्वास वृद्धिंगत केलेला आहे. बँकेच्या दैनंदिन ठेवींमध्ये भरघोस वाढ होत आहे. आपल्या बँकेचे ठेवींवरील व्याजदर इतर बँकांच्या तुलनेने आकर्षक व अधिक फायद्याचे असून सर्व सन्माननीय ठेवीदार व सभासदांनी या संधीचा लाभ घ्यावा असे आवाहन व्यवस्थापक समितीने केले आहे .

सुधारीत व्याजदर
15 ते 90 दिवसांसाठी व्याजदर 4.25%
91 ते 180 दिवसांसाठी व्याजदर 5.00%
181 ते 364 दिवसांसाठी व्याजदर 8.00%
1 वर्ष ते 2 वर्षापर्यंत व्याजदर 8.25%
2 वर्ष ते 10 वर्षापर्यंत व्याजदर 7.75%
टॅक्स सेव्हिंग स्कीम – मुदत 5 वर्ष
(सर्वांसाठी एकच दर) व्याजदर 7.75%
जेष्ठ नागरिक, जेष्ठ नागरिक संघटना,
दिव्यांग व माजी सैनिकांना व्याजदर 0.50% अधिक
15 लाख व त्यापुढील रकमेस 0.25% अधिक

खासदार डॉ. सुजय विखेंनी उठविला संसदेत आवाज

अहमदनगर (प्रतिनिधी) – नगर शहराला मुबलक पाणी अन् शहराचाच भाग असलेल्या भिंगारमध्ये मात्र पाण्यासाठी वणवण. पाणी पुरविण्याची जबाबदारी असलेल्या कॅन्टोंमेंट बोर्डही उडवाउडवीची उत्तरे देतात. खासदार डॉ. सुजय विखे यांना रविवारच्या बैठकीत ही बाब प्रकर्षाने जाणवली. आज त्यांनी भिंगारचा पाणी प्रश्‍न थेट दिल्लीतील संसदेत उपस्थित करत केंद्र सरकारने कॅन्टोंमेंट बोर्डाला आदेश करावेत अशी मागणी केली.

भिंगार हा नगर शहराचाच भाग. भिंगारकरांना पाणी पुरवठा करण्याची जबाबदारी ही कॅन्टोंन्मेंट बोर्डाची. गेल्या अनेक दिवसांपासून कमी दाबाने व अनियमीत पाणी पुरवठा केला जातो. कॅन्टोंन्मेंटचे अधिकारी आणि प्रशासनाकडे तक्रार केली तर ते समाधानकारक उत्तर देत नाहीत, असा तक्रारीचा पाढा त्रस्त भिंगारकरांनी खासदार डॉ. सुजय विखे यांच्यासमोर रविवारी मांडला.

भिंगारकरांच्या या तक्रारीमुळे खा. डॉ. विखे अस्वस्थ झाले. पाणी टंचाईने त्रस्त् नागरीकांना मनस्तापाला सामोरे जावे लागत असल्याकडे लक्ष वेधत केंद्र सरकारने हस्तक्षेप करावा व प्रशासनास योग्य त्या सूचना द्यावी अशी खासदार डॉ. विखे यांनी लोकसभेत शुन्य प्रहारात केली.

भिंगार येथील रहिवाशी कॅन्टोंन्मेंट बोर्डाच्या अधिपत्याखाली येतात. तेथे कॅन्टोंन्मेंट बोर्ड व एमआयडीसी यांच्यात झालेल्या कराराद्वारे पाणी पुरवठा केला जातो. मात्र कॅन्टोंन्मेंट बोर्ड पाणी गळती, जुनी पापईपलाईन या कारणांकडे बोट दाखवुन रहिवाशांना कमी दाबाने पाणी पुरवठा केला जातो. मुळात पाण्याची एकूण मागणी, त्याची विभागणी व पाणी रेशनिंग बाबत प्रशासनाने संधिग्ता बाळगली आहे. त्यामुळे एकीकडे नगर शहराला महापालिकेकडून मुळा धरणातून नियमित पाणी पुरवठा तर दुसरीकडे शहराचाच भाग असणार्‍या भिंगारमध्ये पाणी-बाणी अशी अभुतपुर्व गोंधळाची परिस्थिती निर्माण झाली आहे.

स्थानिक रहिवाशांना कॅन्टोंन्मेंट प्रश्शसनाकडून कुठलीच माहिती व्यवस्थित दिली जात नसल्याची तक्रार दिवसोंदिवस वाढत आहे. नागरीकांचा रोष लक्षात घेता कॅन्टोंन्मेंट हे संरक्षण विभागाच्या अखत्यारीत येत असल्यामुळे केंद्र सरकारने तातडीने याबाबत हस्तक्षेप करावा अशी मागणी खासदार डॉ. सुजय विखे यांनी यावेळी केली. रविवारीच खा. डॉ. सुजय विखे यांनी भिंगारच्या नागरीकांची बैठक घेऊन त्यांचा प्रश्नाबाबत आवाज उठवण्याचे आश्वासन दिले होते. त्यानुसार विखे यांनी थेट संसदेत आवाज उठविला.

कॅन्टोंमेंटकडून तुसडेपणा
सर्वात मोठा सुरक्षा व सैनिकी दलाचा एरिया अहमदनगर लोकसभा मतदारसंघातील भिंगार गाव आणि परिसरात आहे. अनेक वर्षांपासून तिथे असलेल्या संरक्षण विभागाद्वारे रहिवासी भागांमध्ये पिण्याच्या पाण्याचा पुरवठा केला जातो. परंतू मागील काही महिन्यांपासून ओढवलेल्या पाणी प्रश्नामुळे संरक्षण विभागातील अधिकार्‍यांशी चर्चा करण्यासाठी जाणार्‍या रहिवाशांना योग्य प्रतिसाद मिळत नसल्याने, केंद्र सरकारने मध्यस्थी करून हा प्रश्न लवकरात लवकर मिटवावा, अशी विनंती खा. विखे पाटील यांनी केली.

पाणी गळती, जुनी पापईपलाईनच्या नावाखाली कॅन्टोंमेंट बोर्ड भिंगारकरांना कमी दाबाने पाणी पुरवठा केला जातो. पाण्याची एकूण मागणी, त्याची विभागणी व पाणी रेशनिंग बाबत प्रशासनाने संधिग्ता बाळगल्याने भिंगारमध्ये पाणी प्रश्‍न निर्माण झाला आहे.
– खा. डॉ. सुजय विखे