मुंबई । Mumbai
महाराष्ट्र राजकारणात सध्या दररोज नवनवीन कलाटणी पाहायला मिळत आहे. दिल्लीत झालेल्या बड्या नेत्यांच्या गुप्त भेटीगाठींनंतर दोन्ही ‘राष्ट्रवादी काँग्रेस’ पक्ष पुन्हा एकत्र येणार आणि शरद पवार राष्ट्रीय लोकशाही आघाडीत (एनडीए) सहभागी होणार, अशा जोरदार चर्चांना उधाण आले होते. मात्र, या सर्व शक्यता आणि राजकीय पतंगबाजीला आता राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी पूर्णविराम दिला आहे. “शरद पवार कधीही एनडीएसोबत जाणार नाहीत,” असा स्पष्ट आणि ठाम इशारा त्यांनी दिला आहे.
मुंबईत प्रसारमाध्यमांशी संवाद साधताना रोहित पवार यांनी दिल्लीतील भेटीगाठींचे खरे कारण स्पष्ट केले. ते म्हणाले, “जंतर-मंतरवर आंदोलन करणाऱ्या विद्यार्थ्यांच्या गंभीर अडचणी सोडवण्यासाठी आणि युवा वर्गावर होणाऱ्या अन्यायाला वाचा फोडण्यासाठी शरद पवार यांनी पंतप्रधान नरेंद्र मोदी यांची भेट घेतली होती. तसेच, येत्या १० ऑगस्ट रोजी दिल्लीत कौटुंबिक लग्नाचे रिसेप्शन आयोजित करण्यात आले असून, त्या निमंत्रणासाठी सुप्रिया सुळे यांनी केंद्रीय गृहमंत्री अमित शाह यांची भेट घेतली होती. या भेटीचा आणि राजकारणाचा कोणताही थेट संबंध नाही.”
प्रफुल्ल पटेल आणि पार्थ पवार यांनी शरद पवारांची भेट घेतल्याच्या वृत्तानंतर दोन्ही पक्षांच्या विलीनीकरणाच्या बातम्या चर्चेत आल्या होत्या. यावर बोलताना रोहित पवार यांनी स्पष्ट केले की, “आमच्या पक्षातील बहुतांश आमदार आणि खासदार अन्यायाविरोधात लढायला पूर्णपणे तयार आहेत. मी नेहमीच जनतेसोबत आणि तत्त्वांसोबत राहिलो आहे. त्यामुळे पुढेही ही लढाई अशीच सुरू राहील.”
राजकीय घडामोडींवर भाष्य करतानाच रोहित पवार यांनी राज्यातील सीईटी (CET) परीक्षेतील गैरप्रकारांवरून भाजप सरकारवर जोरदार हल्लाबोल केला. “भाजपची सत्ता आल्यापासून राज्यातील विविध शासकीय परीक्षांचे पेपर फुटण्याचे प्रमाण वाढले आहे. सीईटी परीक्षेबाबतही विद्यार्थ्यांकडून गंभीर आक्षेप नोंदवण्यात आले आहेत. इतर राज्यांत पेपर फुटल्यावर आंदोलनाचा पवित्रा घेणाऱ्या भाजपने आधी महाराष्ट्रातील भ्रष्टाचाराविरोधात आंदोलन करून दाखवावे,” असे आव्हान त्यांनी दिले.
पेपरफुटीच्या प्रकरणाबाबत गृहखात्याकडून दिला जाणारा नकार फेटाळून लावताना रोहित पवार म्हणाले, “सरकार आधीच सर्वकाही नाकारण्याच्या मानसिकतेत असते. मात्र, आमच्याकडे या गैरप्रकारांचे ठोस पुरावे उपलब्ध असून ते आम्ही गृहखात्याला सादर केले आहेत. विद्यार्थी सातत्याने माहिती पुरवत असून, आम्ही आणखी पुरावे गोळा करत आहोत.” रोहित पवारांच्या या आक्रमक भूमिकेमुळे राज्यातील राजकीय वातावरण आणि शिक्षण क्षेत्रातील वाद आणखी तापण्याची चिन्हे आहेत.
