अहिल्यानगर (प्रतिनिधी)
शनिशिंगणापूर देवस्थानमधील बहुचर्चित अॅप घोटाळ्या प्रकरणी नेवासा येथील न्यायालयाने अटकेतील संशयित दोघा आरोपींचे जामीन अर्ज नामंजूर केले आहेत. संजय तुळशीराम पवार, सचिन अशोक शेटे अशी त्यांची नावे आहेत.
अॅप घोटाळ्यासंदर्भात शनिशिंगणापूर पोलीस ठाण्यात गुन्हा दाखल असून या गुन्ह्याचा तपास येथील सायबर पोलिसांकडून सुरू आहे. त्यांनी पवार व शेटे यांना अटक केली असून ते सध्या न्यायायीन कोठडीत आहेत. त्यांनी नेवासा न्यायालयात जामीन मिळावा यासाठी अर्ज दाखल केले होते. या अर्जांवर जिल्हा न्यायाधीश हरिभाऊ आर. वाघमारे यांच्यासमोर सविस्तर सुनावणी झाली.
पोलीस तपासात आरोपींच्या बँक खात्यांमध्ये एकूण 75 लाख 21 हजार 288 रूपये जमा झाल्याचे स्पष्ट झाले आहे. आरोपींनी वेगवेगळ्या बनावट अॅप्सच्या माध्यमातून भाविकांकडून पैसे स्वीकारून शनिशिंगणापूर देवस्थान ट्रस्टची फसवणूक केली व अपहार केल्याचे तपासात निष्पन्न झाले आहे. हे दोन्ही आरोपी देवस्थानच्या शनि शिंगणापूर विभागात कार्यरत असल्याने विश्वासघाताचा गंभीर आरोप त्यांच्यावर आहे.
सरकार पक्षाच्या वतीने अतिरिक्त सरकारी अभियोक्ता अॅड. विष्णुदास भोर्डे यांनी न्यायालयात बाजू मांडताना सांगितले की, हा गुन्हा अत्यंत गंभीर स्वरूपाचा असून यामध्ये देवस्थानमधील अनेक कर्मचारी व पदाधिकारी यांचा सहभाग असण्याची शक्यता आहे. तत्कालीन कार्यकारी अधिकारी नितीन शेटे यांनी गुन्हा उघडकीस आल्यानंतर आत्महत्या केल्याने या प्रकरणाला आणखी गंभीर वळण मिळाले आहे. तसेच अपहाराची संपूर्ण रक्कम अद्याप हस्तगत करायची असून तपास सुरू आहे.
आरोपी जामिनावर सुटल्यास तपासावर परिणाम होण्याची शक्यता नाकारता येत नाही, असा युक्तिवाद सरकार पक्षाने केला. या सर्व बाबी, गुन्ह्याची गंभीरता, तपासाची स्थिती आणि अपहाराची मोठी रक्कम लक्षात घेऊन न्यायालयाने दोन्ही आरोपींचे जामीन अर्ज नामंजूर केले आहेत.
दरम्यान, शासन आदेश व सर्वोच्च न्यायालयाच्या आदेशानुसार सध्या शनिशिंगणापूर देवस्थानचा कारभार महसूल आयुक्त, नाशिक विभाग यांच्याकडे आहे. त्यामुळे या प्रकरणाकडे शासन व न्यायालय या दोन्ही स्तरांवर गांभीर्याने पाहिले जात आहे.
