पुणे | प्रतिनिधी Pune
पुणे शहरातील हडपसर परिसरातील फुरसुंगी येथे प्रेमप्रकरणातून एका १७ वर्षीय अल्पवयीन मुलाचा निर्घृण खून झाल्याची धक्कादायक घटना समोर आली आहे. या घटनेने संपूर्ण परिसरात मोठी खळबळ उडाली असून, पोलिसांनी याप्रकरणी एका २० वर्षीय तरुणाला अटक केली आहे, तर त्याच्या एका अल्पवयीन साथीदाराला ताब्यात घेतले आहे. तनिष्क अजय राईकवार (वय १७, रा. हेवन पार्क, काळेपडळ, हडपसर) असे या दुर्दैवी घटनेत मृत्यू झालेल्या मुलाचे नाव आहे. याप्रकरणी तनिष्कचे वडील अजय हरीष राईकवार (वय ४९) यांनी फुरसुंगी पोलिस ठाण्यात रीतसर फिर्याद दिली आहे.
पोलिसांनी दिलेल्या सविस्तर माहितीनुसार, आरोपी रोहित संदीप खाडे (वय २०, रा. पानसरेनगर, येवलेवाडी, कोंढवा) आणि मृत तनिष्क हे एकमेकांचे मित्र होते. मात्र, तनिष्कचे रोहितच्या नात्यातील एका युवतीशी प्रेमसंबंध असल्याचा संशय आरोपीला होता. याच रागातून शनिवारी, २५ जुलै रोजी सकाळी सातच्या सुमारास फुरसुंगी येथील संकेत विहार परिसरातील कचरा डेपोजवळ असलेल्या मोकळ्या जागेत आरोपींनी तनिष्कला गाठले. तिथे आरोपींनी प्रथम तनिष्कला बेदम मारहाण केली आणि त्यानंतर त्याच्या डोक्यात मोठा दगड घालून त्याची हत्या केली. या भीषण कृत्यानंतर आरोपी घटनास्थळावरून पसार झाले होते.
तनिष्क गंभीर जखमी अवस्थेत पडल्याची माहिती मिळताच पोलिसांनी तातडीने घटनास्थळी धाव घेतली. त्याला रक्ताच्या थारोळ्यात पाहून पोलिसांनी तातडीने उपचारांसाठी रुग्णालयात दाखल केले, मात्र तिथे पोहोचण्यापूर्वीच त्याचा मृत्यू झाल्याचे वैद्यकीय तज्ज्ञांनी घोषित केले. पसार झालेल्या आरोपींचा शोध घेण्यासाठी पोलिसांनी वेगाने तपास चक्रे फिरवली आणि त्याच दिवशी दुपारी रोहित खाडे व त्याच्या अल्पवयीन साथीदाराला पोलिसांनी ताब्यात घेतले. सध्या या प्रकरणाचा पुढील तपास फुरसुंगी पोलिस ठाण्याचे वरिष्ठ पोलिस निरीक्षक अमोल मोरे यांच्या मार्गदर्शनाखाली सहायक पोलिस निरीक्षक भूषण पोटवडे करत आहेत.
