मुंबई / प्रतिनिधी Mumbai
सत्ताधारी महायुतीसाठी राजकीयदृष्टया प्रतिष्ठेच्या ठरलेल्या विधान परिषदेच्या दोन शिक्षक आणि तीन पदवीधर मतदारसंघाच्या निवडणुकीसाठी उद्या , शुक्रवार, २३ ऑक्टोबर २०२६ रोजी मतदान होत आहे. महायुती आणि विरोधी पक्षातील बंडखोरीमुळे प्रचंड चुरशीच्या ठरलेल्या या पाचही मतदारसंघातील सुशिक्षित मतदार कुणाला कौल देतात, याकडे राजकीय वर्तुळाचे लक्ष लागले आहे. या निवडणुकीची मतमोजणी २७ ऑक्टोबरला होऊन निकाल जाहीर केला जाईल.
विधान परिषदेच्या पुणे, नागपूर, छत्रपती संभाजीनगर पदवीधर तसेच पुणे आणि अमरावती शिक्षक मतदारसंघाच्या निवडणुकीसाठी उद्या सकाळी ८ ते दुपारी ४ या वेळेत मतदान होईल. मतदानासाठी निवडणूक आयोगाची यंत्रणा सज्ज झाली आहे. पाच जागांसाठी एकूण १८२ उमेदवार निवडणूक रिंगणात असून १० लाखाहून अधिक मतदार या उमेदवारांच्या भवितव्याचा आज फैसला करतील.
पुणे पदवीधर मतदारसंघात भाजपच्या डॉ. स्मिता जाधव आणि राष्ट्रवादी काँग्रेस शरद पवार गटाच्या हर्षदा देशमुख- जाधव यांच्यात मुख्य लढत आहे. महाविकास आघाडीतील शिवसेना ठाकरे गटाचे सुनील मोदी हे सुद्धा रिंगणात आहेत. पुणे शिक्षक मतदारसंघात भाजपचे अधिकृत उमेदवार कौस्तुभ गावडे यांच्या विरोधात काँग्रेसचे जयंत आसगावकर, शिवसेना शिंदे गट पुरस्कृत सचिन सानप आणि माजी आमदार दत्तात्रय सावंत अशी चौरंगी लढत होत आहे. शिंदे गटाने भाजपच्या उमेदवाराला उघडपणे विरोध केल्याने येथे महायुतीत कमालीचा बेबनाव आहे.
छत्रपती संभाजीनगर(औरंगाबाद) पदवीधर मतदारसंघात राष्ट्रवादी अजित पवार गटाच्या सतीश चव्हाण यांना राष्ट्रवादी शरद पवार गटाच्या डॉ. प्रतापसिंह पाटील आणि शिवसेना ठाकरे गटाच्या दिलीप घुगे यांनी आव्हान दिले आहे. येथे चव्हाण यांना भाजपच्या अंतर्गत विरोधाचा सामना करावा लागत आहे. नागपूर पदवीधरमध्ये काँग्रेसच्या अभिजित वंजारी आणि भाजपच्या सुधाकर कोहळे यांच्यात मुख्य लढत आहे. भाजपचे बंडखोर उमेदवार अनिल सोले यांनी लढतीतून माघार घेतली असली तरी त्यांचे नाव मतदान पत्रिकेवर असणार आहे. त्यामुळे भाजपमधील एक गट सोले यांच्या बाजूने कौल देऊन आपली नाराजी व्यक्त करण्याची शक्यता वर्तवली जात आहे.
अमरावती शिक्षक मतदारसंघात शिवसेना शिंदे गटाचे उमेदवार किरण सरनाईक यांच्याविरोधात शिंदे गटाचे बंडखोर श्रीकांत देशपांडे, भाजपचे माजी मंत्री अनिल बोन्डे यांच्या भगिनी संगीता शिंदे यांनी दंड थोपटले आहे. येथून आदिती पोहरे या काँग्रेसच्या उमेदवार आहेत. विधान परिषद निवडणुकीत पसंतीक्रमानुसार मतदान होणार असल्याने पहिल्या आणि दुसऱ्या पसंतीची मते निर्णायक ठरणार आहेत.
