दीड महिन्यानंतर मंगळवारी उघडलेल्या जिल्ह्यातील दारू दुकानांवर मद्यपी अक्षरश: तुटून पडल्यामुळे बुधवारी जिल्ह्यातील 221 देशी-विदेशी दारू विक्रीची दुकाने तसेच बियर शॉप्सवर एकूण 69 हजार 387 लीटर दारूची विक्री झाल्याची माहिती उत्पादन शुल्क विभागाकडून मिळाली आहे.
मंगळवारी सुरू झालेल्या दारू दुकानांवर घसा ओला करण्यासाठी तळीराम अक्षरश: तुटून पडले होते. बुधवारी देखील जिल्हाभरात हेच चित्र सर्वत्र बघावयास मिळाले.
जळगाव जिल्ह्यात असलेल्या 21 वाईन शॉप्स, 99 देशी दारू विक्री दुकाने, तसेच 101 बियर शॉपी अशा एकूण 221 दारू दुकानांवर 69 हजार 387 लिटर दारूची विक्री झाली आहे.
त्यापैकी 35 हजार 48 लिटर देशी, 17 हजार 42 लिटर विदेशी तर 17 हजार 297 लिटर बियरची विक्री जिल्हाभरात बुधवारी झाल्याची माहिती उत्पादन शुल्क विभागाचे प्रभारी अधिक्षक नितीन धार्मिक यांनी दिली आहे.
