सिन्नर । Sinnar
शहरातील बस स्थानकाजवळील एका लॉजवर नाशिकच्या गंगापुररोड भागात राहणाऱ्या एका एमबीबीएस डॉक्टरने आत्महत्या केल्याचा प्रकार नुकताच घडला. या घटनेमुळे हळहळ व्यक्त केली जात आहे…
डॉ. स्वप्नील पाटील (37) रा. गंगापुररोड, नाशिक असे मयत डॉक्टरचे नाव आहे. आत्महत्येपुर्वी त्यांनी लिहून ठेवलेली सुसाईड नोटही पोलिसांच्या हाती लागल्याने आत्महत्येचे कारण स्पष्ट झाले. बसस्थानका जवळील हिरालाल टॉवरमधील हॉटेल प्रेसिडेन्ट लॉजमध्ये डॉ. पाटील हे शनिवारी (दि.9) दुपारी 1.30 वाजेच्या सुमारास आले होते.
रुम नं. 109 त्यांनी भाड्याने घेतल्यानंतर सायंकाळी 6.30 वाजेच्या सुमारास या रुममधून बाहेर आल्याचे सी.सी.टी.व्ही.त दिसले. त्यानंतर त्यांनी आपल्या रुमचा दरवाजाच उघडला नाही.
रविवारी (10) सायंकाळी 6.30 वाजेच्या सुमारास संशय बळावल्याने लॉजवरील कर्मचाऱ्याने दरवाजा ठोठावला. मात्र, आतुन प्रतिसाद मिळाला नाही. त्यामुळे सदर कर्मचाऱ्याने दरवाजाच्या वरच्या भागात असलेल्या खिडकीतून आत पाहिले असता बेडवर डॉ. पाटील दिसून आले.
माजी नगरसेवक शैलेश नाईक यांनी यासंदर्भात सिन्नर पोलिसांना माहिती दिल्यानंतर पोलिस उपनिरीक्षक सुदर्शन आवारी, हवालदार चेतन मोरे यांनी घटनास्थळी धाव घेत रुमचा दरवाजा तोडून आतमध्ये प्रवेश केला.
यावेळी डॉ. पाटील यांचा मृतदेह बेडवर पडलेला दिसून आला. स्वतःच डॉक्टर असल्याने त्यांनी रुमच्या खिडकीला सलाईन टांगून ते आपल्या हाताला लावून घेतले होते. याशिवाय काही गोळ्याही त्यांनी सेवन केल्याचे आणि त्याची अर्धवट रिकामी पाकीटे मृतदेहाजवळ आढळून आली.
दारूची बाटलीही घटनास्थळी पडून होती. पोलिसांनी जागेवर पंचनामा करत मृतदेह शवविच्छेदनासाठी सिन्नर ग्रामीण उपजिल्हा रुग्णालयात पाठवला. डॉक्टरांनी रक्तनमुना आणि व्हीसेरा राखून ठेवला असून डॉ. निर्मला गायकवाड यांनी शवविच्छेदन केल्यानंतर रात्री उशिरा मृतदेह नातेवाईकांच्या ताब्यात देण्यात आला.
सुसाईड नोटने उलगडा
सुसाईड नोटमध्ये (Suicide Note) हे कृत्य आपण स्वतःच्या मर्जीने करत असून माझ्यावर कुठलाही दबाव नाही. पत्नीने आत्तापर्यंत खूप साथ दिली. आईवडीलांनी, भावाने काबाडकष्ट केले. मात्र, लिवरच्या आजाराने त्रस्त असल्याने मी आत्महत्या करत असून त्यास इतर कोणालाही जबाबदार धरू नये.
मी माझे कर्तव्य पार पाडू शकलो नाही त्याबद्दल मला क्षमा करावी. लिवरच्या आजारामुळे आठ तास काम करणे शक्य होत नाही. त्यामुळे सद्या नोकरी नाही. घरी बसलो तर लोकं नावं ठेवतील, आजारपणामुळे कर्ज झाले आहे. त्यामुळे आत्महत्येशिवाय पर्याय उरला नाही. असे डॉ. स्वप्नील पाटील यांनी आपल्या सुसाईडनोटमध्ये लिहून ठेवले आहे.
