पाथरे | वार्ताहर Pathare
येथील चिने वस्ती परिसरात गेल्या काही दिवसांपासून धुमाकूळ घालणार्या बिबट्यास जेरबंद करण्यात वनविभागाला यश आले आहे. यामुळे ग्रामस्थांनी सुटकेचा नि:श्वास सोडला.
परिसरात बिबट्याच्या सततच्या वावरामुळे भीतीचे वातावरण निर्माण झाले होते. उसाची दाट शेती, रात्रीच्या वेळी होणार्या हालचाली आणि शेतकर्यांना शेतीची कामे करताना येणार्या अडचणी यामुळे ग्रामस्थांमध्ये धास्ती वाढली होती. परिसरात मोठ्या प्रमाणावर उसाची शेती असून हीच शेती बिबट्यांना लपण्यासाठी अनुकूल ठरत असल्याने त्यांचा वावर वाढला होता. यामुळे परिसरात पिंजरा लावण्याची मागणी शेतकर्यांकडून होत होती.
या पार्श्वभूमीवर शेतकरी हेमंत चिने यांच्या शेतात वनविभागाने पिंजरा लावला होता. सोमवारी बिबट्या या पिंजर्यात अडकल्याने परिसरातील नागरिकांनी सुटकेचा श्वास घेतला. बिबट्या अंदाजे सात ते आठ वर्षे वयाचा असल्याचे वनविभागाने सांगितले. वनपाल तानाजी भुजबळ, फैजअली सय्यद, आकाश रुपवते, रोहित लोणारे, निखिल वैद्य, नारायण वैद्य व जगन जाधव यांनी बिबट्याला पकडण्यासाठी परिश्रम घेतले. पथकाने बिबट्याला वैद्यकीय उपचार व निरीक्षणासाठी मोहदरी वन उद्यान येथे हलवले आहे.
दरम्यान, परिसरात अजूनही बिबट्यांचा वावर असल्याचे शेतकर्यांचे म्हणणे आहे. नागरिकांनी रात्रीच्या वेळी बाहेर जाणे टाळावे, कोणतीही संशयास्पद हालचाल आढळल्यास त्वरित वनविभागाला कळवावे, असे आवाहन वनविभागाने केले आहे.
