नाशिक । प्रतिनिधी Nashik
नाशिकच्या आडगाव परिसरात घरात खेळत असताना बाथरुममधील पाण्याने भरलेल्या बादलीत पडून एका वर्षाच्या चिमुकलीचा दुर्दैवी मृत्यू झाला. हिंदवी दत्तात्रय भोसले (वय १ वर्ष, रा. भोसले मळा, आडगाव फाटा) असे मृत बालिकेचे नाव आहे. या घटनेमुळे परिसरात हळहळ व्यक्त होत आहे.
पोलिसांनी दिलेल्या माहितीनुसार, शुक्रवारी(दि. २२) दुपारी दोन वाजेच्या सुमारास हिंदवी घरात खेळत होती. खेळता खेळता ती बाथरुममध्ये गेली. तिथे पाण्याने भरलेल्या बादलीत वाकून पाहत असताना तिचा तोल गेला आणि ती बादलीत पडली. काही वेळाने हा प्रकार लक्षात येताच वडील दत्तात्रय भिका भोसले यांनी तिला उपचारासाठी आडगाव येथील वसंतराव पवार मेडिकल कॉलेजमध्ये दाखल केले. मात्र, दुपारी डॉक्टरांनी तिला तपासून मृत घोषित केले.
याप्रकरणी आडगाव पोलिस ठाण्यात अकस्मात मृत्यूची नोंद करण्यात आली असून, हवालदार पाटील तपास करत आहेत.
