अहिल्यानगर |प्रतिनिधी| Ahilyanagar
अहिल्यानगर जिल्हा मध्यवर्ती सहकारी बँकेच्या निवडणुकीत अखेरच्या क्षणी मोठी राजकीय उलथापालथ झाली. विधान परिषदेचे सभापती राम शिंदे यांनी काल, सोमवार (दि. 5) उमेदवारी अर्ज दाखल न करण्याचा निर्णय जाहीर केला. गेल्या चार दिवसांपूर्वीच त्यांनी निवडणूक कार्यालयातून उमेदवारी अर्ज घेतला होता. त्यामुळे अर्ज दाखल करण्याच्या अखेरच्या दिवशी त्यांनी घेतलेल्या माघारीने समर्थकांसह जिल्ह्याच्या राजकीय वर्तुळालाही धक्का बसला आहे.
दुपारी पावणे दोनच्या सुमारास नगर येथील शासकीय कार्यालयात समर्थकांशी संवाद साधताना शिंदे यांनी आपण जिल्हा बँकेच्या निवडणुकीतून माघार घेत असल्याचे स्पष्ट केले.
गेल्या महिनाभरापासून त्यांनी सहकार क्षेत्रातील अनेक मातब्बर नेत्यांच्या भेटीगाठी घेत निवडणुकीसाठी वातावरण निर्मिती केली होती. त्यामुळे जिल्ह्यातील प्रस्थापित राजकीय समीकरणांना आव्हान देण्यासाठी शिंदे मैदानात उतरणार, अशी चर्चा रंगली होती. शिंदे यांनी जिल्हा बँकेच्या निवडणुकीत रस घेतल्यानंतर पालकमंत्री राधाकृष्ण विखे पाटील यांच्याशी राजकीय मतभेद निर्माण झाल्याचीही चर्चा होती. आता शिंदे यांनीच उमेदवारी न करण्याचा निर्णय घेतल्याने विखे गटाला काहीसा दिलासा मिळाल्याचे मानले जात आहे. मात्र, शिंदे यांच्या माघारीमागे नेमके कारण काय, याबाबत राजकीय चर्चांना उधाण आले आहे.
कोणत्याही दबावामुळे निर्णय नाही
उमेदवारी न दाखल करण्याचा निर्णय कोणत्याही दबावामुळे अथवा व्यक्तिगत कारणामुळे घेतलेला नसल्याचे शिंदे यांनी स्पष्ट केले. विधान परिषदेच्या सभापती पदाचा मान-सन्मान आणि प्रतिष्ठा राखण्यासाठी आपण अंतरात्म्याचा आवाज ऐकून निवडणुकीपासून बाजूला होण्याचा निर्णय घेतल्याचे त्यांनी सांगितले.
माझ्याविरोधात मीडिया ट्रायल
आपल्या तीन अपत्यांमुळे उमेदवारी करता येणार नसल्याची चर्चा सुरू झाल्याचा संदर्भ देत शिंदे यांनी माध्यमांवरही नाराजी व्यक्त केली. आपण कायद्याची माहिती घेतली असून, सहकार कायद्यातील तरतुदीनुसार आपल्याला उमेदवारी करता येत असल्याचा दावा त्यांनी केला. आमदार रोहित पवार यांनी आपल्या उमेदवारीबाबत हरकत घेतल्याचे सांगत शिंदे म्हणाले की, जिल्हा बँकेत अनेकजण दहा वर्षांपेक्षा अधिक काळ संचालक राहिले आहेत. चंद्रशेखर घुले, सिताराम गायकर, अंबादास पिसाळ यांच्यासह अनेकांची उदाहरणे असताना केवळ आपल्या उमेदवारीचीच चर्चा करण्यात आली. अर्ज घेतल्यानंतर छाननी होण्यापूर्वीच आपल्याबाबत चर्चा सुरू करून ‘मीडिया ट्रायल’ करण्यात आली, असा आरोपही त्यांनी केला.
जिल्हा बँकेची स्वप्ने पाहणार्‍यांचे अर्ज पाहणार
जिल्हा बँकेच्या संचालकपदाची स्वप्ने पाहणार्‍यांचे उमेदवारी अर्ज कसे टिकतात, हे आपण पाहणार असल्याचा सूचक इशाराही शिंदे यांनी दिला. आपण निवडणुकीतून माघार घेतली असली तरी आपल्या समर्थकांच्या पाठीशी पूर्ण ताकदीने उभे राहणार असल्याचे त्यांनी स्पष्ट केले. एकाचवेळी दोन मतदारसंघांतून एकाच नावाचा ठराव होण्याचा जिल्हा बँकेच्या निवडणुकीतील आपला एकमेव इतिहास असल्याचा दावाही त्यांनी केला.
मुख्यमंत्र्यांचा हस्तक्षेप की राजकीय समीकरण?
दरम्यान, शिंदे यांनी जिल्हा बँकेसाठी अखेरच्या दिवशी वाजत-गाजत उमेदवारी अर्ज दाखल करण्याची तयारी केली होती. नगर येथील शासकीय निवासस्थानी मंडप उभारण्यापासून ते समर्थकांच्या उपस्थितीपर्यंत सर्व नियोजन करण्यात आले होते. कर्जत-जामखेडसह जिल्हाभरातील समर्थकांना नगरमध्ये उपस्थित राहण्याचे निमंत्रणही देण्यात आले होते. सकाळी शिंदे यांनी नगरच्या विशाल गणपती मंदिरात दर्शन घेतले. त्यानंतर कार्यालयापासून पायी निवडणूक कार्यालयात जात उमेदवारी अर्ज दाखल करण्याचे नियोजन असल्याची चर्चा होती. मात्र, त्यानंतर अचानक त्यांनी निवडणुकीतून माघार घेतल्याने राजकीय चर्चांना उधाण आले. शिंदे यांना वरिष्ठ पातळीवरून काही सूचना झाल्या का, मुख्यमंत्री देवेंद्र फडणवीस यांच्याशी याबाबत काही चर्चा झाली का, याबाबतही राजकीय वर्तुळात तर्कवितर्क सुरू आहेत. मात्र, शिंदे यांनी स्वतः कोणत्याही दबावाला बळी न पडल्याचे स्पष्ट केले आहे.
कार्यकर्त्यांना वार्यावर सोडणार नाही
निवडणुकीतून माघार घेतली असली तरी कर्जत-जामखेडमधील कार्यकर्त्यांना वार्यावर सोडणार नसल्याचे शिंदे यांनी स्पष्ट केले. माझ्या निवडणुकीपेक्षा कार्यकर्त्यांच्या निवडणुकीत मी अधिक वेगाने काम करतो. जामखेड नगरपालिकेच्या निवडणुकीत हे पाहिले आहे. जिल्हा बँकेच्या निवडणुकीतही माझे पूर्ण लक्ष राहणार असून, दुप्पट ताकदीने काम करणार, असा निर्धार त्यांनी व्यक्त केला. शिंदे यांच्या घोषणेनंतर उपस्थित कार्यकर्त्यांमध्ये भावनिक वातावरण निर्माण झाले. स्वतःच्या उमेदवारीपेक्षा घटनात्मक पदाची प्रतिष्ठा आणि कार्यकर्त्यांची ताकद महत्त्वाची मानत त्यांनी निवडणुकीच्या मैदानातून माघार घेतल्याने समर्थकही भावुक झाले. सभापती राम शिंदे यांच्या या अनपेक्षित माघारीमुळे कर्जत-जामखेडसह जिल्हा बँकेच्या निवडणुकीतील राजकीय समीकरणांना आता नवे वळण मिळाले आहे. शिंदे यांच्या माघारीचा नेमका फायदा कोणाला आणि त्यांच्या समर्थकांची पुढील भूमिका काय, याकडे जिल्ह्याचे लक्ष लागले आहे.
