भंडारदरा |वार्ताहर| Bhandardara
भंडारदरा व निळवंडे धरणांच्या पाणलोटक्षेत्रात पावसाचा जोर ओसरल्याने नवीन पाण्याची आवकही घटली आहे. रविवारी (दि. 29) सायंकाळी 6 वाजता 11 हजार दलघफू क्षमतेच्या भंडारदरा धरणाचा पाणीसाठा 6079 दलघफू (55.07 टक्के) तर निळवंडेचा 3897 दलघफू (46.79 टक्के) झाला आहे. आढळा धरणाचा पाणीसाठाही 949 दलघफू (89.53 टक्के) झाला आहे.
गेल्या दोन-तीन दिवसांपासून धरण पाणलोटक्षेत्रात पावसाचा जोर काहीसा ओसरल्याने डोंगदर्यांवरुन खळाळत येऊन धरणात विसावणार्या नवीन पाण्याचा वेग घटला आहे. परिणामी, पाणीसाठ्यात हळूहळू वाढ होत आहे. त्यानुसार भंडारदरा धरणात गेल्या 24 तासांत (रविवारी सकाळी 6 वाजेपर्यंत) 126 दलघफू तर निळवंडेत 76 दलघफू नवीन पाणी जमा झाल्याची नोंद झाली आहे. आता जून महिना सरत आला असून जुलै महिन्यात पावसाने धूमशान केले तर दोन्ही धरणे लवकरच भरण्याची शक्यता वर्तवली जात आहे.
दरम्यान, पावसाची संततधार सुरू असल्याने निसर्गाने जणू हिरवा शालू पांघरल्याचे विहंगम दृश्य पाहायला मिळत आहे. हा अद्भूत नजारा बघण्यासाठी शनिवार व रविवार अशी सलग सुट्टी साधून पर्यटकांनी मोठी गर्दी केली होती. धो धो कोसळणार्या धबधब्यांत मनसोक्त भिजण्याचा आनंद घेताना दिसून आले. यामुळे काही ठिकाणी वाहतूक कोंडी देखील निर्माण झाली होती. वातावरणात कमालीचा गारवा असल्याने जनजीवन आणि पशुधन गारठत असल्याने आदिवासी शेतकरी शेकोट्या पेटवून ऊब घेत आहे.
गेल्या 24 तासांत पडलेला पाऊस (मिमीमध्ये)
भंडारदरा 20, घाटघर 30, पांजरे 23, रतनवाडी 27, वाकी 14, निळवंडे 11, आढळा 06, अकोले 08
