राहुरी |प्रतिनिधी| Rahuri
राहुरी तालुक्यातील ब्राम्हणी, येथील दूध प्लांटची 17 लाख रुपयांची रोकड लुटणार्या टोळीतील विधीसंघर्षीत बालकासह तीन आरोपींना स्थानिक गुन्हे शाखेने ताब्यात घेतले आहे. दि. 30 डिसेंबर 2024 रोजी राहुरी तालुक्यातील ब्राम्हणी येथील मुळा ग्रो प्रोडक्ट लि. ब्राम्हणी या कंपनीचे कर्मचारी 17 लाख रुपये रोख रक्कम बँकेमध्ये भरणा करण्यासाठी चारचाकीमधून घेऊन जात असताना अज्ञात चोरट्यांनी या चारचाकीच्या काचा फोडून, रोकड असलेली बॅग बळजबरीने घेऊन गेले. याबाबत राहुरी पोलीस स्टेशन येथे गु.र.नं. 1313/2024 बीएनएस कलम 309 (6) प्रमाणे जबरी चोरीचा गुन्हा दाखल झालेला आहे.
अहिल्यानगर पोलीस अधीक्षक राकेश ओला यांनी स्थानिक गुन्हे शाखेचे पो.नि. दिनेश आहेर यांना घटनेची प्राथमिक माहिती देताच नमूद गुन्ह्याचा समांतर तपास करून, गुन्हा उघडकीस आणणेबाबत आदेशीत केले होते.या आदेशाप्रमाणे सपोनि. हेमंत थोरात, पोसइ तुषार धाकराव व पोलीस अंमलदार मनोज गोसावी, गणेश भिंगारदे, ज्ञानेश्वर शिंदे, संदीप दरंदले, संदीप पवार, सोमनाथ झांबरे, बाळासाहेब खेडकर, रणजित जाधव, प्रमोद जाधव, अमृत आढाव, विशाल तनपुरे, किशोर शिरसाठ, रमिझ आतार, फुरकान शेख, प्रशांत राठोड, मेघराज कोल्हे, महादेव भांड, अरुण मोरे यांचे दोन स्वतंत्र पथके तयार करुन सदर पथकांना गुन्ह्यातील आरोपींची माहिती व शोध घेणेबाबत सूचना करुन पथके रवाना केले.
पथकाने तात्काळ घटना ठिकाणी भेट देवुन फिर्यादीकडुन आरोपींचे वर्णन प्राप्त करुन तसेच घटना ठिकाणचे आजुबाजुच्या रस्त्याचे सी.सी.टी.व्ही. फुटेज तपासून आरोपीबाबत माहिती संकलित केली.
सदर आरोपीची वर्णन तसेच तांत्रिक विश्लेषणाचे आधारे फिर्यादीचे मुळा ग्रो प्रोडक्ट लि. ब्राम्हणी, ता. राहुरी या डेअरीमध्ये काम करणारा विधीसंघर्षीत बालक याचा गुन्ह्यामध्ये सहभाग असल्याचे निष्पन्न झाल्याने त्यास ताब्यात घेवून त्याचेकडे गुन्ह्याबाबत सखोल व बारकाईने विचारपूस करता, त्याने मुळा ग्रो प्रोडक्ट डेअरीमधील रोख रक्कम बँकेमध्ये कधी भरण्यासाठी जाते, याबाबतची माहिती त्याचा मावसभाऊ अमोल शिंदे यास दिली होती. त्यानुसार अमोल शिंदे याने त्याचे साथीदार सचिन वायदंडे, शुभम गुळस्कर, अभिषेक जाधव, पप्पू कुसळकर, मोहन लष्करे यांचेसह लुटीचा कट तयार करुन मोहन लष्करे याने रोकड असलेल्या गाडीवर पाळत ठेवुन गाडी डेअरीमधुन निघाल्यापासूनची संपूर्ण माहिती आरोपींना दिली. त्यानंतर रोकड असलेली गाडी अडवुन, गाडीच्या काचा फोडुन गाडीमधील रोकड असलेली बॅग लुटून ते पसार झाले.
गुन्ह्यातील इतर आरोपींचा पथके शोध घेत असतांना तांत्रिक विश्लेषणाचे आधारे व मिळालेल्या गोपनिय माहितीनुसार आरोपी सचिन राजेंद्र वायदंडे (वय 24 वर्षे, रा. गेट नं. 06, सम्राटनगर, नागापूर, एम.आय.डी.सी. ता. जि. अहिल्यानगर, मुळ रा. अचानकनगर रोड, खंडाळा, ता. श्रीरामपूर जि. अहिल्यानगर), शुभम मनोज गुळस्कर (वय 24 वर्षे, रा. बोल्हेगाव, एम.आय.डी.सी. ता.जि. अहिल्यानगर), अभिषेक लक्ष्मण जाधव (वय 24 वर्षे, रा. नवनागापूर, गजानन कॉलनी, ता.जि. अहिल्यानगर) हे बोल्हेगांव, एम.आय.डी.सी. परिसरामध्ये मिळुन आल्याने त्यांना ताब्यात घेवुन त्यांच्याकडे गुन्ह्यातील चोरी गेलेल्या मुद्देमालाबाबत सखोल व बारकाईने विचारपूस करुन आरोपींकडुन गुन्ह्यातील गेले मालापैकी 3 लाख रुपये रोख रक्कम, 1 लाख रुपये किमतीची गुन्ह्याचे वेळी वापरलेली दुचाकी, 1200 रुपये किमतीचे गुन्ह्यात वापरलेले हत्यार एक लोखंडी तलवार, लोखंडी फायटर असा एकुण 4,01, 200 रुपये किमतीचा मुद्देमाल जप्त करण्यात आला आहे.
ताब्यात घेण्यात आलेल्या आरोपीपैकी शुभम मनोज गुळस्कर हा रेकॉर्डवरील सराईत गुन्हेगार असून त्याच्याविरुध्द यापुर्वी नारायणगाव पोलीस स्टेशन येथे खुनाचा गंभीर स्वरुपाचा गुन्हा दाखल आहे. ताब्यातील आरोपी व विधीसंघर्षीत बालक यांना गुन्ह्याचे तपासकामी राहुरी पोलीस स्टेशन येथे हजर करण्यात आले असून गुन्ह्याचा पुढील तपास राहुरी पोलीस करीत आहे.