पारनेर । तालुका प्रतिनिधी
पारनेर तालुक्यातील विरोली येथील सीमा सुरक्षा दलाचे (BSF) जवान प्रशांत अशोक बुचुडे (वय २७) यांना देशरक्षणाचे कर्तव्य बजावत असताना नागालँडमध्ये वीरमरण आले. नागालँडमधील सटाका चौकीवर नियुक्तीला असताना मंगळवार, ३ फेब्रुवारी रोजी रात्री १० वाजेच्या सुमारास ही दुर्दैवी घटना घडली. एका कर्तबगार जवानाने देशासाठी दिलेल्या या बलिदानामुळे संपूर्ण तालुक्यात हळहळ व्यक्त केली जात आहे.
देशसेवेचे स्वप्न आणि गौरवशाली कारकीर्द लहानपणापासूनच अंगात देशभक्ती भिनलेल्या प्रशांत यांनी देशसेवेचे स्वप्न उराशी बाळगले होते. सैन्य दलात भरती होऊन भारतमातेची सेवा करण्याची त्यांची तीव्र इच्छा होती. आपल्या जिद्द आणि मेहनतीच्या जोरावर ते २०२१ मध्ये सीमा सुरक्षा दलात (BSF) भरती झाले. त्यांनी सीमा सुरक्षा दलाच्या १११ बटालियनमध्ये आपली सेवा सुरू केली होती. कठोर प्रशिक्षण, शिस्त आणि कर्तव्याप्रती असलेल्या निष्ठेमुळे त्यांनी अत्यंत कमी कालावधीत आपल्या वरिष्ठ अधिकाऱ्यांवर आणि सहकाऱ्यांवर कामाची छाप पाडली होती. त्यांच्या या यशामुळे ते विरोली गावातील तरुणांसाठी एक आदर्श आणि प्रेरणास्थान बनले होते.
दुर्गम भागात बजावत होते कर्तव्य नागालँडसारख्या अत्यंत दुर्गम आणि संवेदनशील भागात देशरक्षणाची महत्त्वाची जबाबदारी सांभाळत असताना प्रशांत बुचुडे यांनी आपल्या प्राणांची आहुती दिली. सीमेवर पहारा देताना आलेल्या या वीरमरणामुळे भारतीय सैन्याने एक तरुण आणि धाडसी जवान गमावला आहे. प्रशांत बुचुडे यांच्या निधनाचे वृत्त समजताच त्यांच्या कुटुंबीयांवर दुःखाचा डोंगर कोसळला आहे. त्यांच्या पश्चात आई-वडील, एक भाऊ आणि एक बहीण असा परिवार आहे. कुटुंबाचा मुख्य आधारवड आणि घराचा कर्ता मुलगा अचानक हिरावल्या गेल्याने आई-वडिलांचा आक्रोश हृदय पिळवटून टाकणारा आहे.
हजारो जनसमुदायाच्या उपस्थितीत अंत्यसंस्कार शहीद जवान प्रशांत बुचुडे यांचे पार्थिव त्यांच्या मूळ गावी विरोली येथे आणल्यानंतर संपूर्ण परिसरातून ‘वीर जवान अमर रहे’ आणि ‘प्रशांत बुचुडे अमर रहे’ च्या घोषणा देण्यात आल्या. आज विरोली येथे अत्यंत शोकाकुल वातावरणात त्यांच्यावर शासकीय इतमामात अंत्यसंस्कार करण्यात आले. यावेळी सैन्य दलाच्या वतीने त्यांना शस्त्र सलामी देऊन अखेरची मानवंदना देण्यात आली.
या अंत्यविधीसाठी विविध शासकीय विभागांचे अधिकारी, सामाजिक क्षेत्रातील मान्यवर आणि राजकीय प्रतिनिधी उपस्थित होते. लाडक्या सुपुत्राला निरोप देण्यासाठी पारनेर तालुक्यातून हजारो नागरिकांचा जनसमुदाय विरोली गावात लोटला होता. अतिशय साश्रू नयनांनी ग्रामस्थांनी आपल्या वीर पुत्राला अखेरचा निरोप दिला.
