नाशिक । प्रतिनिधी
दिवसेंदिवस करोनाची वाढती रुग्णसंख्या लक्षात घेता, खबरदारीचा उपाय म्हणून जिल्ह्यात ऑक्सिजन आणि व्हेंटिलेटर पुरवठ्याबाबत सूक्ष्म नियोजन करुन जिल्हा सामान्य रुग्णालय व ग्रामीण भागातील रुग्णालय व कोविड केअर सेंटरमधील बेडची संख्या वाढवावी, असे निर्देश जिल्हाधिकारी सूरज मांढरे यांनी आरोग्य विभागाच्या अधिकार्‍यांना दिले आहेत.
जिल्हा सामान्य रुग्णालय, नाशिक येथे करोना परिस्थिती व उपायोजनाबाबत आढावा घेण्यात आला. त्यावेळी जिल्हाधिकारी सूरज मांढरे बोलत होते. यावेळी मुख्य कार्यकारी अधिकारी लीना बनसोड, अतिरिक्त जिल्हा शल्य चिकित्सक डॉ. किशोर श्रीवास, जिल्हा आरोग्य अधिकारी डॉ. कपिल आहेर, निवासी वैद्यकीय अधिकारी डॉ. प्रशांत खरे, वैद्यकीय अधिकारी डॉ. निखिल सैंदाणे, वैद्यकीय अधिकारी डॉ. अनंत पवार उपस्थित होते.
जिल्हाधिकारी सूरज मांढरे म्हणाले, ऑक्सिजनाचा पुरवठा सुरळीत होण्यासाठी संनियत्रण अधिकारी म्हणून काम पाहणारे डॉ. श्रीवास यांनी जिल्ह्यातील कोणत्याही रुग्णाचा उपचारादरम्यान ऑक्सिजन पुरवठा खंडित होणार नाही, याबाबत दक्षता घेवून केलेल्या कार्यवाहीचा अहवाल सादर करावा. तसेच जिल्ह्यात दौरे करुन ऑक्सिजन पुरवठ्याबाबत पुरेशी व्यवस्थेची तपासणी करण्याची सूचना देखील जिल्हाधिकारी मांढरे यांनी संबंधित अधिकार्‍यांना दिले आहेत.
ग्रामीण भागातील व्हेंटिलेटरचा सुयोग्य वापर करण्यात यावा. जिथे आवश्यकता आहे तिथे व्हेंटिलेटर ठेवून उर्वरीत व्हेंटिलेटर जे रुग्णालय वापरु शकते या ठिकाणी वर्ग करण्याबाबतचा कृती आराखडा तयार करण्याची सूचना यावेळी जिल्हाधिकारी मांढरे यांनी दिली आहे.
वाढती रुग्णसंख्या लक्षात जिल्हा सामान्य रुग्णालयात बेडची संख्या वाढविण्यात यावी. तसेच ग्रामीण भागातील कोविड केअर सेंटर बरोबर खासगी रुग्णालय देखील अधिग्रहीत करण्यात यावे. करोना रुग्णांना तत्काळ उपचार होण्यासाठी एसएमबीटी, मविप्र रुग्णालये अधिग्रहीत करण्यात यावी. तसेच करोनाबाधित रुग्णांची व कोरोनामुक्त झालेल्या रुग्णांची माहिती वेळेवर पोर्टलवर भरण्याची सूचना जिल्हाधिकारी मांढरे यांनी दिली आहे.
कोविडबाधित गर्भवती महिलांसाठी तयार करण्यात येणार्‍या कक्षाला, तसेच नव्याने तयार करण्यात येणार्‍या रुग्ण वर्गीकरण विभागाची जिल्हाधिकारी सूरज मांढरे यांनी पाहणी केली आहे.
