नाशिक । प्रतिनिधी
सोशल मीडियाद्वारे आमिषे तसेच बँक खात्याबाबत भीती दाखवून डेबिट कार्ड तसेच बँक खात्याची माहिती घेऊन ऑनलाईन परस्पर पैसे गायब करत गंडा घालण्याच्या प्रकारांमध्ये मोठी वाढ झाली असून शहरातील सुशिक्षित वर्गही यास बळी पडत असल्याचे समोर येत आहे. नुकताच शहरातील एका उद्योजगास साडेचार लाख तर एका युवतीस 41 हजार रुपयांचा ऑनलाईन गंडा घालण्यात आला.
शहरातील एका उद्योजकास बँकेचा बनावट इ-मेल बनवून त्याद्वारे मेल पाठवत बँक खाते तात्पुरते सस्पेंड केल्याचे भासवून सुमारे साडेचार लाख रुपयांना गंडवल्याचा प्रकार शहरात उघडकीस आला.
या प्रकरणी नीलेश पुरुषोत्तम डहाणूकर (39, रा. कॉलेजरोड) यांनी सायबर पोलीस ठाण्यात फसवणुकीची फिर्याद दाखल केली आहे. डहाणूकर यांच्या फिर्यादीनुसार संशयिताने दि. 5 ते 21 नोव्हेंबरदरम्यान हा गंडा घातला. संशयिताने नीलेश यांच्या ओम साई मोल्डस् अॅण्ड प्लॅस्टिक कंपनीच्या इ-मेलवर बनावट इ-मेल अॅड्रेसवरून मेेल केले. तसेच तुमचे बँक खाते तात्पुरते सस्पेंड केले जात असल्याचे सांगितले. तसेच नीलेश यांना एका बँक खात्याची माहिती देत त्यात पैसे भरण्यास सांगितले.
त्यानुसार नीलेश यांनी भामट्याने दिलेल्या बँक खात्यात 4 लाख 42 हजार 536 रुपये भरले. त्यानंतर नीलेश यांनी चौकशी केली असता त्यांची फसवणूक झाल्याचे लक्षात आले. त्यामुळे त्यांनी सायबर पोलीस ठाण्यात फसवणूक झाल्याची फिर्याद दाखल केली आहे. वरिष्ठ पोलीस निरीक्षक देवराज बोरसे या प्रकरणाचा तपास करीत आहेत.
शहरातील एका तरुणीस नोकरी देण्याचे आमिष दाखवून संशयिताने तिच्या बँक खात्यातून ऑनलाईन पद्धतीने 41 हजार रुपये काढून घेतले. संशयिताने तरुणीस फोन करून तिच्यासह बहिणीस नोकरी मिळवून देतो असे आमिष दाखवलेे. तसेच दोघींच्या बँक खात्याची माहिती घेतल्यानंतर संशयिताने परस्पर पैसे काढून तरुणीस गंडा घातला. या प्रकरणी तरुणीने सायबर पोलीस ठाण्यात फसवणुकीची फिर्याद दाखल केली आहे.
